2 Timute 2

Mala megemir Yesuw Kiristi ndzer ŋana

1 Kəla gà, ndza ka, ɓəŋɓəŋ lele agəra ŋgwal Mbulum ana a gik nda ahər Yesuw Kiristi ya, dite ndzəɗa yak ma səkah aaka. 2 Bazlam ana akahər ata kà tsarakawa i təv ga ya, ika miɗ gà mburma hinne ya ka, mà dər a gà mburma ana tar gà ɓəzla ndzer ŋa ya, dite ka, tar ti sle aà mimè a dər a gà misle ŋgiɗ mbaŋa ya.

3 Tikema gər ka, aà mege megemir Yesuw Kiristi nda ndzer ŋa kamala mala guvəl ana a geye a ikaba ya ya. Hadzal ba yak aà mesewere are nda iye aɗaba ŋgat. 4 Kamala taŋa ya, sliwdze ana ndzer ŋa a de a a guvəl ka, a wisebe a à gər nda megemir ana i ma ŋgar ŋa ya asa tsa. Aɗaba a sasar megemir ŋgar ma da a gər ka, a batsah ŋgar ŋa ɗekɗek pəra. 5 Wele ana a tètìɗ a à mile ŋgar, a vel a sah lele, a sasar a ndze a a təv ana a ndisl aɗəm a ya tekeɗe ka, aka gwa, i lèh a aka miɗ mburma ka, say na bəla a vel a ka, ndaka vatwa ŋa lele ya dzekwiŋ, na dite ta viler a dukw maya ba ŋgar a. 6 Dite mala mifìte ibam ka, a ge a megemir lele, a ye a ba dzekwiŋ, na dite à lèh aà mimìndzir a dukw ŋgar ana a pala i bəɗ a, a zim a ya. 7 Ama dzala gà gər ka, aka dukw ana i tsik a, a ge a ba kataya ya. Kər kà sər ka, BATSAH kwa ŋa na a zlèk a kər, dite ki tsereke a lele, ki sir a ikaba à gà duwa ya tserdze ya.

8 Madzala gà gər yak ma da ka, a təv Yesuw Kiristi kəla pat. Aɗaba ŋgat a dara ka, i gwala Dawda a. Mbulum na a mbəlara à ŋgat i məməta ya, kamala ŋgwal bazlam ata i tsik, i ɗifewa dər a mburma ya mbaŋa. 9 Aɗaba ŋgwal bazlam ata na iye ihər i sèwèr a are, tə dàn iye i daŋgay nda tsitsirɓe gədzə̀zlzla, kamala ana iye mala bakal a ya. Ama bazlam Mbulum kə̀la ka, tsitsik tsitsik ti sle aà meŋgete a, dite ta gis a a daŋgay tsidze. 10 Aɗaba taŋa, i simehe a mesewere are tserdze ka, agəra gà mburma ana Mbulum a pala tar a, dite tar tekeɗe ka, ta mbele a nda ahər Yesuw Kiristi, ti de a a təv mipise ahəm ŋgar nda təv maŋgayaba ŋgar ana a ndze a aà biybiy a. 11 Bazlam ana ndzer a ka, araha, na ki slekwe aà metìkè aaka a madzala gà gər kwa ya:

Na kàa matakwa akaba a təv ilik ŋa

nda gà Yesuw Kiristi ka, kwa tekeɗe,

ki ti ndzekwe a nda gà mesife

i təv ilik ŋa nda gà ŋgat mbaŋa.

12 Na kàa gə̀sakwa gəzləŋ i təv gà mesewere are ya

nda gà ŋgat ka, kwa tekeɗe,

ki ta kwerekwe akaba a gər ahəɗ

nda gà ŋgat tserdze mbaŋa asa.

Ama na bəla kwa kàa miyakukwa à ŋgat ka,

ŋgat tekeɗe, a ta miyek a à kwa mbaŋa te.

13 Ama ku mege megìse kwa a riŋ tsa,

ki nekwe a à ŋgat bakal tekeɗe,

ŋgat ka, mala ndzer ŋa hiywe.

Aɗaba dukw ana aka mbər megweɗe,

i ge a ka, a ge a kaɗəŋ,

a sle a aà masasa pàrsa tsidze.

Mala megemir Mbulum ndzer ŋana

14 Mà à bazlam ata a zləm a gà mburma Mbulum ana tserdze ya. Gwaɗa a tar ka, ta miyak à mimbètsèba ahəm ana ika magər tar a. Ka pala a tar ahəm ika miɗ Mbulum. Aɗaba bazlam ata ka, taf masakəŋa, tsəka, a ge a ŋgulum tsidze. A nis a ka, à gà na tə dzar zləm a ivaɗ. 15 Mər aba, ka ndaɗa akaba hwarwa tsa, na dite mege megemir yak ana ki ge a ya ka, à tsehin a aà Mbulum a. Mà à bazlam Mbulum ka, ndaka vatwa ŋa, tsəka, ka zle ahər tsa. Ama kà nikiɗ dər ihər a tsa asa. Na kàa ge dər kamala taŋa ya ka, kàa ne mala megemir Mbulum ndzer. 16 Ama ka, ka tə dza zləm a mifefile gà mburma ana ti zezem a vatwa Mbulum tsiye tsa. Aɗaba gà bazlam tar ata ka, taf masakəŋa, tì tìz a dər ka, aà Mbulum a ivaɗ. 17 Gà bazlam tar ana ti dzeŋge a a mburma ya ka, ar ka, kamala mbəlak ana à sìkèh a wànə̀nə̀nna ya. Ika magər tar ka, gà Himanayas nda Filitus. 18 Tar ka, tàa miyak à vatwa ndzer ŋana. Ta gwa: «Mimbile kwa ana ki mbilekwe a i məməta ya ka, aka mbər mege ba aka ndəv.» Tsaatsa, pàrsa. Kamala taŋa ya, ti dzeye a ka, à mburma ika vatwa Mbulum a hinne. 19 Ama gà mburma ana Mbulum a pala tar a ka, ndzer kaɗəŋ, pàrsa iɗəm tsa. Ti ne ka, kamala madzàha ga ana tə dzàha ɓəŋɓəŋ lele, a mbezle a tsiye. Dukw ana mewetse ŋa agəra tar a ka, ta gwa: «BATSAH kwa ŋa ka, a sər gà na ti ne ga mburma ŋgar a.» Dite a gwa asa ka: «Wur ana aka gwa, iye mburma Mbulum a ka, say mə miyak à mege dukw ana ŋgwala tsa a gewa ya.»

20 Kər kà sər, i ga i bəra Əbay ka, gà maŋgara gà gərwa a riŋ pampam hinne. Gà biy ŋgiɗ ka, ta və̀ɗ nda gura ana à sìkim a ba tsiye, kige tsa nda ndzemde. Dite gà biy ŋgiɗ asa ka, ta pàpə̀z dizl. Biy ŋgiɗ ibam, ta ŋgar nda dwaɗwa. Gà asiŋ ŋana ka, tə tsahən lele, tsireŋŋè tì dze a aba ya, ta ge a dər megemir ka, a pat megirive. Ama gà asiŋ ŋa aaha ka, ta kwiris a dər dukw aruwaŋ pəra. 21 A riŋ ika magər gà mburma kamala taŋa ya mbaŋa. Gà biy ŋgiɗ ka, gà ŋgwal ŋa. Gà biy ŋgiɗ ibam, gà ŋgwala tsa. Aɗaba taŋa, na wele ana aka dara i liwiŋ gà mburma ata ya ka, aka bara ba ŋgar tsəɗaŋŋa lele, idep dukw bakal duwa i təv ŋgar asa tsa. A ge a megemir Mbulum ka, kəla pat ndaka vatwa ŋa lele. A ne a ka, kamala maŋgara dukw ata ŋgwal ŋa, a ge a ŋgulum a mala ga ya. Aɗaba dukw ata a ge a dər ka, dukw ana ŋgwal ŋa ya ɗekɗek.

22 Aɗaba taŋa, kər ka, Timute, ka zazam dukw gà asiŋ gà gawla ana ta ge a ŋgwala tsa pampam a tsa. Ama mə̀r aba, dite ka ne mala ndzer ŋa ika miɗ Mbulum, kə̀ gəs ŋgat nda gəzləŋ kəla pat. Ka waya gà Mbulum nda mburma lele, dite ki ndzwim a lele nda gà mburma ana ta hamawa a Mbulum, tar gà tsəɗaŋŋa ya asa mbaŋa. 23 Ama ka, ka tə dza zləm a gà bazlam gà mburma ana ti tsik a taf masakəŋa ya tsa. Aɗaba medzibe gà mburma ata ka, tə sər duwa tsa. Ka ta gəs tsidze. Ama kər ka sər, gà dukw ata tì sìkèh a ka, à məpàlàba ahəm ika magər kurum ɗekɗek. 24 Aɗaba kər mala megemir a Mbulum ka, ki mbetswimbe a ahəm nda gà misle ŋgiɗ tsa. Ki fèfil a mburma ka, lifeɗiɗe seyiŋ ivaɗ. Dite ki ɗif a ter a à vatwa ndzer ŋana ta gis a dər Mbulum a lele. Ki gis a gəzləŋ i təv gà dukw ana ta gik a ya. 25 Na bəla gà ɓəzla mene are yak ta gəs mege dukw ana ŋgwal ŋa ya tsəka, ɗif a tar dər nda zèyezèye nda himmè bazlam ivaɗ. Na kàa tsik a tar kamala taŋa ya ka, biytsa Mbulum a vile a ter a metsehe, ta mbìɗ a à madzala gà gər, na dite ta gis a vatwa ndzer ŋana ya. 26 Tàa ŋgat metsehe kataya ka, ti sle a aà mibeyera i mekwere Əbay sitene ya kuɗa. Aɗaba piŋŋe ka, ŋgiziw ŋgiziw aka gasa tar a ziwiɗ ŋgar kamala ana ta gəs takurah nda ziwiɗ a, na dite ka, ta ger a dukw ana a sasar a ya.