2 Timute 3

Məmìyàkà à Mbulum ana gà mburma ti ta miyek a dər

a pat mandəvandəv gər ahəɗ a

1 Sər dər, na pat mandəvandəv gər ahəɗ aka à mendzera ka, mendze kwa a ge a mawùràba ŋa hinne. 2 Aɗaba a pat ata ka, gà mburma ata ti ti dzele a ka, ba tar ɗekɗek, a ta ses a ter a ka, mayaha gər a siŋgwe hinne, nda mege zlapa, ŋgakŋgakəkka tì sìŋgìr a à ba tar. Ti ti ndeveye a a mburma. Gà ɓəza ta gis a ahəm aà gà tsir tar asa tsidze. Ku weke a ta fir a aà dukw ana tsəɗaŋŋa biy Mbulum a ka, kamala za ya. Ti ta ge a kəkaaha aɗaba dukw ana ta ge a ter a ya tsidze. 3 Gà mburma ata ta weye a gà asiŋ gà mburma ana i ga i ma tar a asa tsa. Ti ndze a ka, tesìw tesìw nda matsəɓatsəɓ ŋa. Dite vìrìɗìɗìɗɗe ti tsik a dukw ana ŋgwala tsiye aà gà misle ŋgiɗ asa mbaŋa. Ama tar ka, ta kwere a ba i təv dukw ana ŋgwala tsiye tsa. Dite ta ge a madzək a mburma ka, hinne. Ti ne are a dukw ana ŋgwal ŋa ya ivaɗ. 4 Ti dzewe a à mburma a gà ɓəzla mene are tar. Dite tar ka, dukw ana tàa tsik i sida ya, tàa gwa, mìi ge a ya ka, ta ge a tsa. Tì sìkèh a à ba ka, hinne, ta weye a Mbulum tsa. Ta weye a ka, ba tar ɗekɗek ivaɗ. 5 Gà medzibe gà mburma ata ta gweɗe a, waytsa mə̀r ka, gà mburma Mbulum. Tsaatsa tàa gəs Mbulum ana a sle aà mivile a ter a ndzəɗa, dite à mbìɗ a à madzala gà gər tar a ka, ta gəs tsa. Medzìbe gà mburma ata ka, tsakàlàk ndza aà tar a diriŋ. 6 Aɗaba ku mege kinehe tekeɗe ka, gà asiŋ ŋa ika magər tar a, sereh sereh ti deye a a gà ga pampam, a sàs a tar ka, ta beneye a mburma. Ta bene a ndeyndey ŋana ka, gà məkəs ana gà falày ŋa ya, dite ka, ta gəs bazlam tar ata. Gà na tàa gəs a kuɗa ka, bakal a be a tar deɓìz deɓìz hinne, ta gewa ka, gà dukw meeweke ba tar ana pampam ta waya ya. 7 Gà medzibe gà məkəs ata ka, a sàs a tar ti sinike a ba à duwa kəla pat. Ama ka, ti sir a dukw ana ndzer a ɓav tsa. 8 Gà ɓəzla məbànà mburma ata ka, tàa niw dukw ana ndzer a, kamala gà Yanas nda Yembires ana ti niw bazlam Musa, ta màr à bakal akahər ata ya mbaŋa. Metsehe ana i gər tar a ka, manəsa ŋa fit. Tàa dzawa ika vatwa Mbulum ana zləmana ta gis a a gəzləŋ tar a. 9 Ama megeye gà dukw tar ata ka, a de a aka miɗ hinne tsa. Aɗaba megeye gà falày gà dukw tar ata ŋgwal metsehe iɗəm tsiye ka, à pèt a ndərzayya ika miɗ mburma tserdze, kalkal kamala biy gà Yanas nda Yembires ana akahər ata a pàt aba ya mbaŋa.

Mandəvandəv meɗìfè à metsehe

10 Ama kər ka, kàa gəs dukw ana i dzeŋgewa a mburma ya, kàa zazam lele. Dite kàa zazam mede gà ana i dawa i liwiŋ gà mburma Mbulum a, nda dukw ana a sèsiŋ i gewa i huɗ mege megemir gà ya mbaŋa. Dite megìse gà ana i gəs Mbulum nda gəzləŋ a, nda miveve ga, dite nda mawàyà mburma ana i waya ya tekeɗe, kàa ge terwihhwe asa mbaŋa. Mendze gà ana i mà aba à arəv ɓəŋɓəŋ ika miɗ Mbulum a, 11 nda gà matawak ana ta gewiŋ a, nda mesewere are gà ana i sèwèrewa ya ibam, makàhà ŋa aà kər a tsa mbaŋa asa. Kàa sər mesewere are ana a le aà iye ika ahəɗ gà Antakiya nda Ikuniya, nda gà i Listira ya tserdze. Ti sèwèriŋ are hinne ka, i fata. Ama ku mege tàa ge à iye kataya tekeɗe ka, BATSAH kwa ŋa a bewera aà iye i gà dukw ata ya tserdze. 12 Ama ka, ku mege weke na a sasar a ge a dukw ana a tsahən aà Mbulum a, aɗaba ŋgat mandza ŋa i təv ilik ŋa nda Yesuw Kiristi ya ka, ta ger a matawak ndzer, dukw ŋgar. 13 Taŋa gà mburma ana ta gewa duwa ŋgwala tsiye, nda gà na ta bene a mburma nda pàrsa ya ka, tì sìrìk a tsakàlàk i təv Mbulum a, ti de a dər aka miɗ aka miɗ. Ta bene a gà misle ŋgiɗ, dite tar ŋa tekeɗe, gà misle ŋgiɗ aaha ta bene aɗəm a tar ŋa mbaŋa. 14 Ama kər kinehe ka, zazam bazlam ana ndzer ŋa, ti ɗifek dər aɗaba Mbulum, dite ka tike aaka madzala gà gər yak fit dze ya. Zazam aka miɗ aka miɗ nda gəzləŋ ilik, ka miyak dər tsa. Aɗaba kà sər ndzer, gà na ti dzeŋgek a lele, 15 dite kàa sər bazlam ana Mbulum a tsik a ka, daga aà gər ana kər kəla ndirkiz mba ya mbaŋa. Taŋa na a vilek a metsehe, dite ki mbil a dər a. Ki mbil a ka, aɗaba megìse yak ana kə̀ gəs Yesuw Kiristi nda gəzləŋ ilik a. 16 Dukw ana mewetse ŋa a riŋ i huɗ wakita Mbulum tserdze ya, a dara ka, ika arah Mezite Mesife Mbulum a. Dukw ana i huɗ wakita ya ka, à zlèk a kwa, aà meɗìfè à vatwa Mbulum a mburma. A pèt a kwe a à gà bakal kwa ndərzayya, nda meɗìfè a kwa à metsehe lele asa mbaŋa, na dite ki gekwe a dukw ana ŋgwal ŋa ika miɗ ŋgar, ki sìkèhekwe a dər a. 17 Mezite Mesife ata a ge dər kamala taŋa ya ka, na dite gà na ti ne gà mburma Mbulum a ka, ta hadzal ba aà mege dukw ana a sàs a Mbulum a. Aɗaba tàa ŋgat ndzəɗa a ahər tar, aà mege dukw ata ŋgwal ŋa ya tserdze.