4
1 Iye ihər i gik a kamkam ika miɗ gà Mbulum nda Yesuw Kiristi.
Aɗaba Yesuw ka,
wele ana a ta ge a seriye a mburma tserdze ya,
ku mege gà na tar riŋ nda gà mesife ya,
ku gà na tàa mata ya asa mbaŋa.
Kər kà sər ndzer,
a ta mèriŋa,
na dite ka,
a de a a mekwere ŋgar ana a ta kwere a ya.
2 Ama kər ka,
i gik a kamkam:
Tsikewa bazlam Mbulum a mburma hiywe,
ku mege bəla a tsahən aà tar tsa tekeɗe ya.
Na bəla ta ge a dukw ana ŋgwal ŋa tsiye ka,
ɗif a tar à metsehe lele,
dza aà tar magəɗa,
aɗaba gà bakal tar,
dite kà ma a taraha à arəv aɗaba mazazama vatwa Mbulum.
Dzeŋge a tar dukw ana a de a ndaka vatwa Mbulum a kəla pat,
ka ti ya ba tsa.
3 Aɗaba pat ŋa a ndzere a mba ka,
gà mburma tì dze a zləm a wele ana a ɗif a ter a à ndzer ŋa ya asa tsa.
Ama a ti ses a ter a ka,
mazazama dukw meeweke ba tar ɗekɗek pəra.
Kamala taŋa ya,
ti ti yehe a gà ɓəzla medzeŋge a mburma meyehe,
dite ti dzeŋge a tar ka,
dukw ana hùhunnà a ge a ter a tsegèɗik i zləm lele ya.
4 Ti ti dze a zləm aà dukw ana ndzer a asa tsa.
Ti ti mbìɗ a aba nda təv gà guma ana pàrsa iɗəm a,
ti ti dzer a zləm lele ivaɗ.
5 Ama kər ka,
ge metsehe à dukw ana ndzer a terwihhwe lele,
ka zazam aka miɗ aka miɗ.
Bàs gəzləŋ i təv gà mesewere are ana tì sèwèrek a ya.
Tsik bazlam ŋgwal ŋana a mburma,
ma ɗe zləm ŋgarra lele,
mà səkah aka miɗ aka miɗ.
Ge megemir ana zləma Mbulum aka vəlak a ahər a.
6 Aɗaba iye kinehe ka,
i ne kamala dukw taf ana ta vile a a Mbulum a.
Pat ana i miyek a à gər ahəɗ,
ta kiɗ a iye ya ka,
aka à mendze aɗəm.
7 Iye ka,
Yàa ge megemir Yesuw Kiristi nda gəzləŋ ilik,
kamala gà wele ana tì dzìr a ba aà mivele,
ta mir aàba a sàh lele ya.
Yàa ndəv à dukw ana Mbulum a gweɗiŋ,
ge ya,
kamala gà wele ata ta vel a a təv ana ti ndisl aɗəm a ya.
Yàa gəs Yesuw Kiristi nda gəzləŋ ilik.
Yàa məsak dər tsa.
8 Kinehe ka,
dukw mayaba gà a riŋ a veve a iye i təv Mbulum.
A viliŋ a ka,
aɗaba ana i ne ŋgwal ŋa ika miɗ ŋgar a.
Kamala taŋa ya,
a pat ana Yesuw Kiristi BATSAH kwa ŋa,
wele ana ŋgat mala masasa ikaba seriye ya nda ndzer a,
aka dara ka,
à piliŋ a dukw mayaba gà fit.
Ama ka,
a iye ɗekɗek tsa.
Gà na ta veve a ŋgat,
à kiv a ter a hinne,
ta waya ma dara a təv tar a tekeɗe,
ta ŋget a dukw mayaba tar mbaŋa.
Pul a tsik dukw ana a ge ba aɗaba ŋgat a
9 Kamkam,
dara a təv ga ya bise,
kə gasa aàba tsa.
10 *Aɗaba Demas ka,
aka miyak à iye,
agəra ana a sasar dukw gər ahəɗ hinne,
a be a ŋgat i gəzləŋ a.
Aka da a kwite Tesalunike.
Ama Kereskes ibam,
aka da aka ahəɗ Galatiya.
Dite Titus tekeɗe,
aka da aka ahəɗ Dalmatiya mbaŋa.
11 Say Luka pəra na mandza ŋa ɗa i təv ga ya.
Na ki dere a ka,
ŋgulum ki dwimera nda Markus a məma.
Aɗaba ŋgat ka,
a sle a aà mazlàkà iye lele mbaŋa.
12 Ama Tikikus ka,
Yàa sləraha ŋgat a kwite Efesiya.
13 *I təv ana ki dere a ya ka,
ka da nda kwite Turuwas.
Aɗaba andiw gà duwa a riŋ i tikewa akaba aà mə̀tasl a,
aka mətsa a riŋ i fata i bəra Karpus.
Kàa daha ka,
ka zliŋara a faha ya te.
Dite kà ndzìkiŋ dərra gà wakita ga a riŋ i fata ya asa mbaŋa.
Ki ndzikiŋara a ndeyndey ka,
gà wakita ana malàmbàɗà ŋa nda kwiye ya.
14 *Aleksandire,
mala mivìɗe duwa,
aka giŋ dukw ana ŋgwal ŋa tsiye hinne.
Ama ka,
BATSAH kwa ŋa à mèr aɗəm a à bakal kalkal dukw megemir ŋgar ana a gewa ya.
15 Kər ka,
ge metsehe agəra ŋgat lele,
tsəka,
bəla a ti yehe a vatwa aà megìk dukw ana ŋgwala tsiye asa mbaŋa.
Aɗaba ŋgat ka,
a ŋgewa vatwa a bazlam mə̀r hinne,
a sasar mə̀r tsidze.
16 A pat ana ta gəs iye aka miɗ mala seriye malahalah ŋa,
dite i fàfəl ikaba ya ka,
mala mezleke iye a riŋ ilik tsidze.
Tàa miyak à iye tserdze.
Ku mege ta ge kataya tekeɗe,
Mbulum ma ti tike bakal ŋa aka gər tar ɓav tsa.
17 Ama kəla ka,
BATSAH kwa ŋa aka zlak iye,
a viliŋ ndzəɗa,
na dite i tsik bazlam Mbulum a mburma parakka,
i həmbər duwa tsa,
dite ka,
ku mege weke ɗa i faha ika magər gà na tar ga Yahuda tsiye ka,
ma tsaraka ya.
BATSAH kwa ŋa a be à iye i ahər məməta ya,
kamala ana ta bera à duwa i bazlam azil a.
18 Ŋgat ka,
a ta be a à iye i dukw ana ŋgwala tsiye tserdze asa mbaŋa.
A kesle a iye lele,
na dite i de a a təv mekwere ŋgar ana i gər ŋa ya ndzer a.
Kamala taŋa ya,
mezlibe ana tì zlibe a à ŋgat a ka,
ma ne biy ŋgar aà biybiy.
Zàmbaɗakwa à ŋgat.
*Amin.
Mandəvandəv mege wusa
19 Giŋ wusa a gà Piriska nda zal ŋgar Akila,
dite a gà mburma ana i bəra Winesifarus a tserdze mbaŋa.
20 *Arastus ŋgat ka,
a ndze a riŋ i kwite Kurintiya.
Dite Tarufimus ka,
i miyak à ŋgat i kwite Miletus,
agəra ana a sle a mendzera tsa,
aɗaba dukw məməta ya.
21 I gik kamkam,
dara a təv ga ya bise,
na dite ələk mə̀tasl à dze ahər a ba ka,
kàa mbər medera ya.
Gà Awubulus nda Pudenas nda gà Linus,
nda gà Kəlawdiya məkəs ŋa,
nda gà asiŋ gà mburma ana ɗa ti ne gà damər kwa ika vatwa Mbulum i faha ya tserdze,
ta gikeha wusa mbaŋa.
22 Iye ihər i heme a a BATSAH kwa ŋa,
dite ma ndza i təv yak hiywe.
Mbulum mi pisewa a kurum ahəm tserdze.