Titus 1

Wakita ana Pul a wetseha

a TITUS a

Mege wusa

1 Na a wetse wakita aaha ka, iye Pul ana i ge a megemir Mbulum, dite iye mala meslire Yesuw Kiristi ya mbaŋa. Ama Mbulum a slər iye ka, dite i tsik a bazlam ŋgar a gà na a pala tar a, na dite ta gis a ŋgat nda gəzləŋ, ti sir a guma ŋgar ana ndzer ŋa, a ɗifekwe a à mede kwa ana à tsehin a aà Mbulum a tserdze ya mbaŋa. 2 I tsikewa kamala taŋa ya ka, na dite mburma ti sir a dər ka, ta ŋget a mesife ana à ndìv a tsa aà biybiy a. Aɗaba akahər ana Mbulum aka ge gər ahəɗ zukw tsiye ka, aka mbər metsike a kwa aba i sida ya, a gwa: «I ta vile a kurum a mesife ata.» Ŋgat ka, à ses a pàrsa tsidze. 3 Ama tits a təv ana a ndze aɗəm a ka, a pàt a kwa à mesife ata a gwa, i ta vile a kurum a ya, i huɗ bazlam ŋgar ana ŋgwal ŋa, gà ɓəzla meslire ŋgar ti tsik a. Na a viliŋ bazlam ata a ahər ka, Mbulum ana ŋgat mala məmbə̀là à kwa, a gweɗiŋ, ti tsik a gà asiŋ gà mburma ŋgiɗ mbaŋa ya.

4 I wetseha ka, a kər Titus ana kər kà ne kəla gà, kà nema ilik i təv megìse ana kə̀ gə̀sama Mbulum a ya.

I heme a a Mbulum Tsir kwa nda Yesuw Kiristi ana ŋgat mala məmbə̀là à kwa ya, ta gek ŋgwal ŋa, ta vəlak matasla yam a gəzləŋ zayya lele.

Mege megemir Titus ana a ge ika ahəɗ Kereta ya

5 I məsak riŋ à kər ika ahəɗ Kereta ka, dite kà làmbaɗa dukw ana a zeha, Yàa sle aà malàmbàɗà ŋa asa tsiye ya. A sèsiŋ ka, ki pele a gà mburma, dite ki ne a à ter a gà bàba ŋa ika magər gà na ta gəs Mbulum a, ku mege i kwite awara tserdze. Ki ge a ka, kamala ana i tsikik a, ma ta mətsak gər tsa. 6 Wur ana a ne a batsah ŋa ika magər gà mburma ana ta gəs Mbulum a ka, say ma ne ka, mala ndzer. Bakal ŋgar ma ge riŋ tsa, məkəs ŋgar tekeɗe, say ma ge ka, ilik pəra. Gà ɓəza ŋgar ibam ka, ta gəs Yesuw Kiristi nda gəzləŋ tar. Mede tar ma ge ka, ŋgwal ŋa, wura ma wala aà tar a agəra dukw ana ta ge a ŋgwal ŋa tsiye tsa, ta gəsawa ahər ahəm ka, lele mbaŋa. 7 Say wur ana a ne a batsah ŋa ika magər gà na ta gəs Mbulum a ka, say ŋgat ma ge ka, mala ndzer ŋa, bakal ŋgar ma ge riŋ tsa, aɗaba ana ŋgat ka, mala meslire Mbulum a. Mà sə̀ŋgə̀r à ba ŋgar tsa, matsəɓatsəɓ ibam, ma ndzawar i gəzləŋ hiywe tsa, kige tsa, ma ne mala mekweye tsa, ma ge maàga nda mburma tsa asa, nda gà ma ne mala perziz siŋgwe tsa asa mbaŋa. 8 Ama ma ne ka, mala mege gər a gà mbəlakw lele ivaɗ. Ma waya ka, mege dukw ana ŋgwal ŋa ya, ma ne mala metsehe, ma ge dukw ana ndzer a ika miɗ Mbulum tsəɗaŋŋa, bakal ihər tsa. Ma kwara ba ŋgar lele. 9 Say ma kasla bazlam ndzer ŋa ana mì ɗifer dər a i gəzləŋ ŋgar lele. Kamala taŋa ya, a sle a aà medzeŋge bazlam ata a gà asiŋ gà mburma Mbulum, à me a terehe a à arəv. Dite a ŋget a vatwa aà meɗife à metsehe a gà ɓəzla mimbètsè ahəm ana ti niw bazlam ata ya, ika miɗ mburma tserdze mbaŋa.

10 Aɗaba gà mburma a riŋ hinne na ti dze a zləm a bazlam Mbulum ana ti tsik a ya tsiye. Tar ti tsikewa ka, gà bazlam ana hinne pampam taf masakəŋa ya. Ta bene a mburma nda pàrsa mbaŋa asa. Na a gewa kamala taŋa ya ndeyndey ka, gà Yahuda ana ta waya masasa ba, dite ta gweɗe a kurum a ka, sasayum ba ya. 11 Say ta handaka a taraha aà bazlam, aɗaba tar ihər tì ndzikere a gà mburma ana i ga i ma tar a pampam tserdze, ika vatwa ana ŋgwal ŋa ya, nda medzeŋge gà dukw tar ata ŋgwal ŋa tsa kweleŋ a. Aɗaba ta ge a kataya ka, dite aà ta ŋgat iɗəm siŋgwe ya hinne pəra. 12 Wele duwa a riŋ ilik i liwiŋ gà mburma ata, ŋgat gà Kereta. Ŋgat ka, kìlìŋŋa, a sərawa gà dukw ana ti ta ge a ba ika miɗ mba ya ya. A gwaɗawa a gà mburma ana ɗa ika ahəɗ Kereta ya ka: «Gà ɓəzla pàrsa hiywe, na tar a. Tar ti ne ka, kamala gà dukw dala ana gà ŋgwal ŋa tsiye. Tar ka, gà màsar ŋa hinne asa, dite tar tə dzalawa ka, aka mazəma gà dukw mezime ana ti zimeye a a gà hitwis tar a ɗekɗek pəra.» 13 Kaɗəŋ, wele ata a tsik a ka, ndzer. Aɗaba taŋa, kwara akaba tar kwirik kwirik, na dite ka, ta ge a metsehe, ti zezem a vatwa Mbulum lele ya. 14 Kwara akaba tar ka, dite tə̀ dza zləm aà gà ahəm hiyeŋ gà Yahuda ana tə ɗamawa taf masakəŋa ya asa tsa. Tə tə zazam məpala ahəm gà mburma ana ta miyak à dukw ana ndzer ŋa ya asa tsa. 15 I təv gà na gəzləŋ tar tsəɗaŋŋa məbara ŋa lele ika miɗ Mbulum a ka, dukw ana ta ge a tserdze ya tekeɗe, tsəɗaŋŋa ŋgwal ŋa lele mbaŋa. Ama gà na gəzləŋ tar ga ŋgwal ŋa tsa, ta gəs ahəm aà Mbulum tsiye ka, duwa a riŋ tsəɗaŋŋa i təv tar tsidze. Dukw ana tə dzalawa ya ka, ŋgwal ŋa tsa. Dite ku mege a sàs a tar mege dukw ana ŋgwal ŋa tsiye tekeɗe ka, gəzləŋ tar a wir a tsa, aka ne ba tar. 16 Tar riŋ ihər ta gweɗe a ka, waytsa mì sər Mbulum ndzer, tsaatsa i təv gà dukw tar ana ta ge a ya ka, pàrsa, tə sər tsa. Tar ka, gà ŋgwal ŋa tsa fit, aɗaba ana a sàs a tar magəsa ahəm aà Mbulum tsiye, dite ka, tar tekeɗe, ti sle a aà mege dukw ana ŋgwal ŋa tsiye asa mbaŋa.