Mendze gà ɓele ana tì zlibe a à gà ɓəzla ga tar a
6
1 Say gà ɓele ana ika magər kurum,
ti ziwe a gər tar tsiye ka,
tə̀ zlə̀b à gà ɓəzla ga tar lele.
Na tàa zlə̀b à tar ka,
wura a tsik a manəsa bazlam aà Mbulum asa tsa,
kige tsa aà guma ana kwa ihər ki tsikikwe a ya tsa.
2 Na bəla gà ɓəzla ga tar ata tar riŋ ti zezem a Yesuw Kiristi nda gà tar tserdze ka,
tə ta dzala ka,
mə̀r ilik ika miɗ Yesuw Kiristi tsam ana,
là ŋa ya,
aàmala na mìi zlibe a à tar a asa ya tsa.
Seyiŋ tsa,
ŋgwal ŋa ka,
ta ge a tar megemir nda gəzləŋ ilik lele,
mà za dər na tə lah ahər piŋŋe ya.
Aɗaba gà ɓəzla ga tar ata ta gəs Yesuw Kiristi nda gəzləŋ a,
ta waya tar,
dite tar tekeɗe,
ta ge ŋgwal a gà mburma aaha mbaŋa.
Araha,
naha ka,
gà dukw ana ki ɗif a dər a mburma,
ki mbizle a ter aaka a,
ta ge kamala taŋa ya.
Bazlam mazazama limana nda bazlam ŋgwal ŋa ana ndzer a
3 Na wura a ɗif a ka,
à bazlam ŋgiɗ pam,
à gis bazlam Yesuw Kiristi BATSAH kwa ŋana ndzer a tsa,
nda gà dukw ana ti ɗifewa a kwa dər agəra mede kwa ana ika miɗ Mbulum a tsəka,
4 taŋa ŋgat ka,
kamala mala hala gawla ana i liwiŋ mburma,
à sìŋgìr a à ba ŋgar ka,
tsaatsa,
ŋgat ŋa a sər duwa tsidze ya.
A sər i ŋgar ka,
are mimbètsè ahəm,
nda mayaha ahəm pìrèh pìrèh aà gà mburma ɗekɗek.
Aɗaba wele ata aka ge gà dukw ata kataya ka,
na ika magər tar nda gà mburma ka,
say mene ba are,
nda mege maàga kəla pat nda mandàvàyà ba,
nda gà madzala gà gər gà dukw ana ŋgwal ŋa tsa masakəŋa taf nda təv misle ŋgiɗ a.
5 Ama bazlam ana ti tsik a ika magər tar biy maàga ya ka,
à ndìv a tsa,
vìrìɗìɗɗe kəla pat.
Aɗaba metsehe tar ana ti dzele a ya ka,
kəzlah aka ndaha ika vatwa ya,
dite ka,
tə sər dukw ana ndzer a tsa asa.
Aɗaba gà taŋa ti dzele a i tar ka,
na tàa zazam vatwa Mbulum ka,
limana tar a ge a riŋ ka,
hinne.
6 Kaɗəŋ,
kàa zazam vatwa Mbulum nda ndzer ka,
ki ŋget a limana hinne,
kamala megweɗe ya ka,
dukw ana à ndìv a tsa i təv ŋgar a.
Ama ka,
say na kàa ŋgaya ba a dukw ana kə ŋgat a pəra.
7 Aɗaba ta wara kwa ya ka,
sakurɗumma kataya,
duwa aà kwa i ahər tsa.
Ama ki slekwe a aà mendzìke dər duwa a ahər ɓav tsa na ki metekwe a ya asa mbaŋa.
8 Aɗaba taŋa,
na kàa ŋgatakwa dukw mezime nda petek ka,
taŋa ka,
biy kwa ide.
9 Ama gà na ta waya mesikehe à limana hinne ya ka,
Əbay sitene na a beze a ter a za ya,
tì dìɗ a a ɓele ŋgar mba.
Ti dzele a gà gər ka,
aka meeweke gà dukw pampam.
Gà dukw ata na a vile a ter a mendìfè sik masakəŋa ika vatwa ya ya,
dite a nis à ter a,
ti dzeye a kweleŋ a.
10 Aɗaba madzala gà gər siŋgwe ka,
a we a bakal tserdze vìrìɗìɗɗe kamala dukw ana mawà ŋa ya.
Aɗaba gà misle ŋgiɗ a riŋ kataya,
tàa məsak à vatwa Mbulum agəra ana tàa vəl gəzləŋ tar a siŋgwe,
ti yehe a tsilikw tsilikw a.
Dite ka,
gəzləŋ a wir aà ter a hinne asa,
aɗaba dukw ata ti yehe a nda madzala gà gər tar a.
Mandəva à meɗìfè à metsehe
11 Ama kinehe ka,
Timute,
kər ana mburma Mbulum a ka,
are yak ma ta ge ika gà dukw ata ŋgwal ŋa tsiye tsa.
Mər aba,
dite ka ne mala ndzer ika miɗ Mbulum,
zazam vatwa ŋgar lele.
Vəlar gəzləŋ yak kəla pat.
Ka waya mburma lele.
Gəs gəzləŋ i təv dukw ana ŋgwal ŋa tsa tserdze ya,
dite kà fàfəl a mburma lifeɗiɗe asa mbaŋa.
12 Ne mala aka miɗ i təv magəsa gəzləŋ ana ika vatwa Mbulum a,
kamala gà wele ana tì dzìr a ba aà mivele,
ta mir aàba a sah lele ya.
Gəs vatwa mesife ana à ndìv a tsa aà biybiy a nda gəzləŋ yak,
dite ma ne biy yak.
Aɗaba Mbulum a zalak ka,
aà mesife ata akahər ata kà tsik ika miɗ mburma hinne,
meme na kə̀ gəs bazlam Yesuw Kiristi nda ndzer a gəzləŋ yak a ya.
13 Iye ihər i gweɗek a nda zləm Mbulum,
mala məvəla mesife a gà dukw ana tserdze ya,
dite nda zləm Yesuw Kiristi,
wele ana a tsik dukw ana ndzer a,
ika miɗ Əbay Puntiyus Pilatus akahər ata ya:
14 Tike gər a guma ata Mbulum a tsikik a.
Ma ta mətsak gər tsa.
Ka ta ge dukw ana,
dite mburma ta meke a à bakal ŋa ya tsa,
haa a pat ana Yesuw Kiristi BATSAH kwa ŋa à mère a i mbulum a.
15 A mère a ka,
a pat məpaslà ahər ŋgar ana Mbulum a tsiker a.
Aɗaba ŋgat na ndzəɗa ŋgar a za gà dukw tserdze ya.
Ŋgat ka,
Mbulum ilik.
Ŋgat asa ka,
təv mipise ahəm nda maŋgayaba kəla pat.
Ŋgat na batsah ŋa ika gər gà Əbay tserdze ya,
nda gà ika gər gà bàba ŋana tserdze ya asa mbaŋa.
16 Aɗaba ŋgat ilik na a ndze a aà biybiy a.
A ndze a ka,
i təv dzaydzay ŋa ana wura a sle a aà mede aɗəm a tsiye.
Wura a aka ŋgatar ilik tsa,
dite kinehe tekeɗe,
wura a riŋ a sle aà meŋgeter a zukw tsa asa ya mbaŋa.
Gà mburma tə̀ zlə̀b à ŋgat,
Əbay ŋgar ma ndza aà biybiy.
*Amin.
17 Gwaɗa a gà ɓəzla limana ana ika gər ahəɗ kinehe ya ka,
ti ɗe à gər tar agəra limana tsa,
dite tə ta fə̀r aà limana tar ata kamala dukw ana ŋgwal ŋa ndzer a tsa asa.
Aɗaba tə sər pat ana à ndìv a ya tsa.
Say tə dzala ka,
Mbulum na ŋgwal ŋa ndzer,
a vile a kwe a dukw tserdze ya,
dite na ki ŋgeyekwe a dər ba ya.
18 Gwaɗa a tar ka,
say ta gewa ka,
dukw ana ŋgwal ŋa ya,
tə̀ zlak mburma lele,
ta vəl ahər fə̀làh fə̀làh.
Ta ge gà ɓəzla hə̀za tsa.
19 Na tàa gewa kataya ka,
ta kèhe a aba duwa ya ka,
a təv ŋgwal ŋana lele,
a nis a tsa,
aləka ti ta ŋgeye a dər ba aka miɗ mba ya,
na dite ka,
ta ŋget a mesife ndzer ŋa ana i təv Mbulum a.
20 Ana mà Timute:
Kasla megemir ana Mbulum a vəlak a ahər a lele,
manəsa bazlam ma tə dara i bazlam yak a tsidze.
Ka tə dza zləm a bazlam gà mburma ana ti tsik a ka,
ta gwa i tar ka,
metsehe,
tsaatsa ŋgwal metsehe duwa tsiye ka,
ma tə dara i bazlam yak a tsidze mbaŋa.
21 I tsik taŋa ka,
aɗaba gà asiŋ gà mburma ŋgiɗ a riŋ ta gwa,
metsehe tar a riŋ ka,
hinne.
Tsaatsa,
metsehe tar ŋa ka,
ndìfwille masakəŋa.
Tar ka,
tàa dzeye ika vatwa Mbulum a.
Taŋa Mbulum mi pisewa a kurum ahəm hinne.