1 Timute 5

1 Ka ti ɗif à metsehe a màndawal gà asləka nda magala tsa. Say ki ɗifer a dər ka, nda zèyezèye ŋa, kamala ana ŋgat ka, tsir yak a. Ki ɗif a dər a gà gawla gà mburma ibam ka, kamala ana ki tsik a ka, a gà damər yak a. 2 Ki ɗe a dər a gà màndawal gà məkəs tekeɗe ka, kamala ana ki tsik a ka, a gà mama yak a. Dite a gà daala gà məkəs ibam ka, kamala ana ki tsik a ka, a gà damər yak gà dəm ŋana ya mbaŋa. Hwarwa ma ta ge a tar tsidze.

Mazlàkà gà madakwa gà məkəs ana wur tar a riŋ tsiye

3 fafəl a gà madakwa gà məkəs ana wur tar a riŋ tsiye lele, kà zlak tar. 4 Ama na madakwa məkəs ŋa a riŋ nda gà ɓəza, kige tsa nda gà ɓəza gà ɓəza ŋgar ka, say ki ɗif a ter a dər, meme na ti sle a aà magəsa gà mama tar lele ya, bəla məmər tar, kige tsa batsah məmər tar a. Malahalah ŋa ka, say gà ɓəza ata ti sinike a ba à mazlàkà tar dzekwiŋ, kamala gà tsir tar ana ta waya tar, ta gala tar piŋŋe ya. Aɗaba taŋa ka, a tsahən aà Mbulum. 5 Ama madakwa məkəs ana wur ŋgar a riŋ tsa, biy mandza are tsehe ya ka, ŋgat a tike madzala gà gər ŋgar ka, a təv Mbulum ilik, a hemer a kəla pat i hawa i mèkwède, dite ka, mà zlak ŋgat. 6 Ama kəla ka, madakwa məkəs ana aka waya ka, say dukw gər ahəɗ ɗekɗek a ka, a ne kamala məməta ŋa ya, ku mege ŋgat a riŋ nda are ŋgar tekeɗe ya. 7 Aɗaba taŋa, ɗif a tar à guma ata, ta gəs gà mburma tar lele. Gà madakwa gà məkəs ata ibam, wura ma tə ɗə̀v a tar zləm a təv matsama bazlam tsa. 8 Na wur ana a ge a gər a gà mburma ŋgar tsəka, ŋgwal ŋa tsa. Ndeyndey ŋa ka, wur ana a ge a gər a ga mburma ana i ga i ma ŋgar a tsiye. Taŋa ka, ŋgwìɗik aka miyak à bazlam Yesuw ana kə̀ gə̀sakwa ya. Ama ka, ŋgulum wur ana aka gəs Yesuw tsiye.

Mege megemir gà madakwa gà məkəs ana ta gewa ika magər

gà mburma Mbulum a

9 Madakwa məkəs ŋa mive ŋgar a sle dzik ndilik tsəka, ka ta wetse zləm ŋgar a liwiŋ gà na tì zlèk a tar a tsa. Ki wetse a ŋgat ka, say na a da a zal ka, ilik pəra ya. 10 Dite megemir ŋgar ana a ge a ya, gà mburma tə sər dər ka, ŋgwal ŋa lele, kige tsa na aka gala gà ɓəza ŋgar nda metsehe lele ya, nda gà bəla a gewa gər a gà mbəlakw ana tə dawaha a ma ŋgar a, dite bəla a barawa ahəɗ aà sik a gà mburma Mbulum ana tə dawaha mbaŋa ya, kige tsa na bəla a zlàkawa gà ɓəzla mesewere are asa ya. Na kàa ŋgatar, a gewa gà megemir ana ŋgwal ŋa ya kataya ka, wetse ŋgat kuɗa.

11 Ama kə̀la ka, ka ta wetse zləm gà madakwa gà məkəs ana gà daala ŋa ya tsa. Aɗaba na bəla meeweke gà zal aka gəs tar ka, ta miyek a à vatwa Yesuw Kiristi. 12 Na tàa miyak dər ka, seriye Mbulum à gis a tar. Aɗaba megweɗe ana ta gwa ika miɗ Mbulum, mìi ge a meslire ŋgar, a sàs a mə̀r gà zal asa tsiye ka, aka ne pàrsa. 13 Ku mege bəla tə da a zal tsa ndeɗiŋa tekeɗe ka, ta mìts a ka, aà mayaha duwa zilikw zilikw ika biye hərmaga mburma ya ɗekɗek, sìrètitte ta ge a megemir ɓav tsa. Ndeyndey ŋa ta mìts a ka, aà melèvekè bazlam aà mburma ɗekɗek. Ta ge a tsapà nda rawraw hinne, ti tsik a ka, bazlam ana biy metsike tsiye. 14 Aɗaba taŋa na a sèsiŋ ka, ta wetse a zləm gà madakwa gà məkəs ana gà daala ŋa ya tsiye. I waya ka, tə da a zal asa, ta waya mawà kəla, dite ta ge gər a gà ɓəza tar, ta gəs tar lele. Na tàa ge kamala taŋa ya ka, gà ɓəzla mene are kwa ta ŋget a vatwa aà metsìkè aà kwa dukw ana ŋgwal ŋa tsiye asa tsa. 15 I tsik kataya ka, aɗaba gà asiŋ gà madakwa gà məkəs ŋgiɗ a riŋ tàa miyak à vatwa Mbulum. Tàa mbəɗ gər aka mazazama Əbay sitene.

16 Na məkəs ana a zezem a Yesuw Kiristi ya, wur ŋgar a riŋ madakwa ŋa ka, say mà zlak ŋgat, na ŋgwal ŋa ya. Aɗaba mazlàkà medzibe gà madakwa gà məkəs ata ka, gà mburma ana i ga Mbulum a tsa na à gis ahər a ahər a. Na aka zlak ŋgat ka, taŋa gà mburma ana i ga Mbulum a, ta ŋget a vatwa aà mazlàkà gà madakwa gà məkəs ana wura tar a riŋ tsiye lele.

Mede gà bàba ŋana ika magər gà mburma Mbulum a

17 Gà bàba ŋana tar riŋ ta ge a megemir ndaka vatwa ŋa ika magər gà mburma Mbulum a ka, zlə̀bum à tar hinne. Ta ŋgat dukw maya ba tar mbaŋa. Ndeyndey ŋa ka, gà na tar riŋ ti tsik a bazlam Mbulum, ti ɗif a à guma ŋgar a mburma ya. 18 Aɗaba Mbulum a gwa i wakita ŋgar a ka: «Na sla a riŋ a gik a megemir ka, ka tiker *tikwirek aka bazlam tsa.» Dite a gwa asa ka: «Wur ana aka ge megemir a ka, ma ŋgat dukw maya ba ŋgar mbaŋa.» 19 Na wura aka dara a təv yak a, aà metsikik dukw ana ŋgwala tsa aà wele ana batsah ŋa ika magər gà mburma Mbulum a ka, ka ta gəs zukw tsa. Ki gis a ka, say na kàa tsaraka aà gà mburma ya sula, kige tsa makər a dzekwiŋ. 20 Na gà bàba ŋa ata tàa ge bakal ka, tsik a tar aà metsehe ika miɗ mburma tserdze, dite gà asiŋ gà mburma ŋgiɗ ta ge a magəɗa.

21 Iye ihər i gik a kamkam, Timute, ika miɗ Mbulum, ika miɗ Yesuw Kiristi asa mbaŋa, dite ika miɗ gawla Mbulum ana a ndzək tar a: Ama zazam dukw ana i tsikik a nda ndzer. Iye ihər i gik a kamkam asa ka, ka tə dàn bemeze aà wura a tsa. Ama ka, ka ta wìy ba a wura aɗaba ana ŋgat wur yak a tsa asa. Ka ta ge kataya tsa, na i təv megemir yak a. 22 Na aka sàsak mazla wura aà megemir i ga Mbulum ka, say fə̀r aà metsehe ŋgar lele dzekwiŋ, dite na ki tike aɗəm a ŋgat, ki tiker a ahər aka gər a. Ka tə ndàb a bakal gà misle ŋgiɗ tsa. Ama say kasla iɗəm ba yak a lele.

23 Agəra dukw məməta ana a wurawa aà kər i hitwis a ka, ka sawa yam ɗekɗek tsa, say ki se a meɗwitse mawà dukw ana makwàsà ŋa ya zaakwa, dite mə pə̀lak à hitwis yak ana ŋgwal ŋa tsa, a wurawa aà kər kəla pat a.

24 Gà asiŋ gà misle ŋgiɗ riŋ ka, ti ndze a aka miɗ seriye dzekwiŋ tsa, na bakal tar à pèt a a bəra ndərzayya ya. Ama biy gà misle ŋgiɗ à pèt a ka, say na tàa ndze aka miɗ seriye ya dzekwiŋ. 25 Mege i təv megemir ana mburma ta ge a ŋgwal ŋa kinehe ya tekeɗe ka, à pèt a aba bise kamala taŋa ya mbaŋa. Ku mege aka pàt aba kinehe tsa tekeɗe ka, a sle a aà makàhà ba tsa, à pèt a aba aka miɗ mba.