Gà mburma ana ti tsik a bazlam ka, nda pàrsa ya
4
1 A pat ana gər ahəɗ aka à mendìve ya ka,
gà asiŋ gà mburma ŋgiɗ ta miyek a à megìse tar ana ta gəs Yesuw nda gəzləŋ ilik a.
Aɗaba tì dze a zləm ka,
a gà mburma ana ti ɗif a ter a à duwa nda pàrsa ya.
I dəba ŋa ya,
ti zezem a ka,
bazlam ana sitene a tsik a ter a ya ɗekɗek pəra.
Na a ɗif a à gà dukw ata parakka lele ka,
Mezite Mesife Mbulum.
2 Gà mburma ana ta pese a ter a za ya ka,
gà ɓəzla mimbèhè are.
Dukw ana ti tsik a ya ka,
nda pàrsa.
Gà mburma ata ka,
ti ne kamala zlir akwa ana aà lùŋguɗ à gis a ka,
a wir ahər a tsiye.
Tar tekeɗe,
ti dzele a aka bakal ana i gəzləŋ tar tsa asa.
3 Ama tar ta gweɗe a a mburma ka,
mazla daala ka,
lele tsa,
ta pele a ter a ahəm.
Ta gweɗe a asa ka,
mazəma dukw aaha,
kige tsa dukw aaka ka,
lele tsa,
awisl.
Tsaatsa,
Mbulum a ge gà dukw ata ka,
dite mburma tə zəm.
Ama gà na ta gəs Yesuw Kiristi,
tə sər gà dukw ana nda ndzer a ka,
ta ge kəkaaha a Mbulum,
dite tə zəm,
a ge a duwa tsa.
4 Aɗaba dukw ana Mbulum a ge a ya ka,
ŋgwal ŋa fit dze.
Ka tawalakwa ikaba gà dukw mezime ya pampam tsa.
Ki gekwe a kəkaaha a Mbulum,
dite ki zimekwe a pəra.
5 Aɗaba dukw mezime tserdze ka,
lele,
agəra ana Mbulum a tsik kataya ya,
dite agəra ana kàa hamakwa aka gər ŋa ya asa mbaŋa.
Ŋgwal mala megemir Yesuw Kiristi
6 Na ki ɗif a à bazlam ata a gà na ti ne gà damər yak ika vatwa Mbulum a ka,
ki ne a mala megemir Yesuw Kiristi ŋgwal ŋa ndzer.
Dite gà bazlam Mbulum ana kə̀ gə̀sakwa,
nda gà guma ŋgwal ŋa ana ki zezem a kamala dukw mezime ana kər riŋ ihər ki zim a kəla pat a ka,
tì sikeheke a à ndzəɗa yak aka miɗ aka miɗ.
7 Ka tə dza zləm a gà guma məfara ŋa ana a tsahən aà Mbulum tsiye tsa.
Say mede yak ma da ka,
aka miɗ aka miɗ kamala ana a sàs a Mbulum a.
8 Na wura a ge a màhaw ika dàɓa,
à tètìɗ a à mile ŋgar ka,
taŋa ka,
a ge a ŋgulum a slu ba ŋgar zaakwa.
Ama wur ana à tètìɗ a à magəsa ahəm aà Mbulum ika vatwa Mbulum kəla pat a ka,
taŋa ka,
a ger a ŋgulum hinne dze.
Aɗaba a ge a ŋgulum ka,
a mesife ŋgar ana kinehe ika gər ahəɗ a,
dite a ta ge a ŋgulum a mesife ana ika miɗ à ndìv a tsa aà biybiy a asa mbaŋa.
9 Bazlam aaha ka,
bazlam ana ndzer,
biy megìse nda gəzləŋ ilik a lele.
10 Agəra taŋa na kə̀ gə̀sakwa megemir ŋgar,
dite kà vəlakwar ndzəɗa kwa fit,
ki mirekwe ahər a aba sah lele ya.
Aɗaba kàa tikekwa madzala gà gər kwa fit a təv Mbulum ana a riŋ nda mesife ya.
Ŋgat ka,
mala məmbə̀là à mburma tserdze.
Ndeyndey ŋa ka,
gà na tàa gəs Yesuw Kiristi nda gəzləŋ tar ilik a.
11 Timute,
tsik a tar,
ta ge gà dukw ata,
dite ka ɗif a tar dər lele.
12 Aɗaba na kər gawla,
gà ɓəza mba ya ka,
wura ma ta fə̀r aà kər ka,
kamala kəla ndirkiz a ndeyndey ɓav tsa.
Ama say ki ɗif a à vatwa a gà ɓəzla mazazama Yesuw Kiristi ivaɗ.
Tə dəɗ aka bazlam yak ana ki tsik a ya,
mege nda gà dukw ana ki ge a ŋgwal ŋa ika miɗ tar tekeɗe ya,
bəla nda təv mawàyà mburma ya,
kige tsa nda təv guma ana kə̀ gəs nda gəzləŋ yak ika miɗ Mbulum a,
ku mege nda təv gəzləŋ yak ana lele,
aruwaŋ iɗəm tsiye tserdze mbaŋa.
Na kàa ge kataya ka,
mede yak a ɗe a ter a à vatwa,
dite na ti zezem a vatwa ata ŋgwal ŋa ya.
13 Dzeŋge bazlam Mbulum ana i wakita ŋgar a ika miɗ mburma tserdze kəla pat.
Tsik a tar bazlam ata,
dite ka ɗif a tar aaka à bazlam ŋa lele,
haa a pat ana i leha aà kər a ya.
14 Ka ta fə̀r aà ndzəɗa ana Mbulum a vəlak a,
kamala dukw masakəŋa ya tsa.
A vəlak ndzəɗa ata ka,
daga piŋŋe,
akahər ana gà ɓəzla məma à guma Mbulum ti ɗif à madzala gà gər Mbulum ana a dzala aɗaba kər a.
A vəlak ka,
ndakahər gà bàba ŋana ika magər gà mburma Mbulum,
ta hamar,
tə dzaya aka kər ahər a.
15 Taŋa ka,
tike gər aka dukw ata ki ge a ya lele.
Ki ge nda gəzləŋ yak ilik.
Aɗaba gà mburma ta fə̀r aà kər ka,
meme na kər ihər ki sìkèh à mede yak ika miɗ Mbulum a.
16 Ge metsehe a mede yak ana ki de a ika vatwa Mbulum a.
Dite ki ge metsehe agəra dukw ana ki ɗif a dər a mburma ya asa mbaŋa.
Ka zazam gà dukw ata kəla pat.
Na kàa tiker gər kamala taŋa ya ka,
ki ta mbil a à ba yak,
dite ki mbil a à gà mburma ana ta gəs bazlam yak a asa mbaŋa.