1 Timute 3

Gà bàba ŋa ana ika magər gà mburma Mbulum a

1 Na aka sàs a wura aà mene batsah ŋa ika magər gà mburma ana tar riŋ ti zezem a Yesuw Kiristi ya, aà meɗife a tar à metsehe ya ka, ŋgat ka, aka dzala aka ŋgwal megemir kaɗəŋ. Bazlam aaha i tsik a ka, ndzer. 2 Ama wur ana a ge a megemir Mbulum ata ya ka, mede ŋgar ma ge ŋgwal ŋa lele nda təv gà mburma dze. Daala ma ge ihər ka, ilik. Ma ta kwaya à guzum tsa. Say ma ge ka, dukw ana ndaka vatwa ŋa lele ya. Dite gà mburma tə̀ zlə̀b à ŋgat. Say ma ge ka, mala məvəla ahər. Dite ma sər meɗìfè à metsehe a mburma lele mbaŋa. 3 Ma ti ne ɓele guzum tsa. Ma ti ne mala tèrèŋgìz tsa asa mbaŋa. Say ma ne ivaɗ ka, mala himmè bazlam ana lifeɗiɗe ya. Ma ti ne mala mege bazlam nda gà mburma tsa. Ma ta vəl gəzləŋ ŋgar a siŋgwe tsa asa. 4 Say ma sər magəsa gà mburma ana i ga i ma ŋgar a lele. Ma ɗif à metsehe a gà ɓəza ŋgar, ta gəs ahər ahəm, ta hənar à gər a bəɗ lele asa. 5 I tsik taŋa ka, aɗaba na wura aka sle aà magəsa gà mburma ana i ga i ma ŋgar a lele tsəna, meme na a sle a aà magəsa gà mburma Mbulum ɓav a? 6 Wele ana à gis a gà mburma Mbulum ata ya ka, ma ti ne wur ana a gəs bazlam Mbulum kinkin a tsa, tsəka, biytsa à sìŋgìr a à ba ŋgar hinne ka, seriye Mbulum a ta gis a tar aka miɗ nda Əbay sitene mba. 7 Wele ata à gis a gà mburma Mbulum a ka, mede ŋgar mà tsahən aà gà mburma ana ti zezem a Yesuw Kiristi tsiye mbaŋa, dite ta gis a bazlam ŋgar lele. Bəla na mede ŋgar ata aka ge ŋgwal ŋa tsəka, ta gweɗe a, ŋgat ka, ŋgwal mburma tsa. I fata ya ka, aka dəɗ a ɓele Əbay sitene.

Gà mburma Mbulum ana tì zlèk a gà asiŋ gà mburma ŋgar a

8 Ama mede gà mburma Mbulum ana tar riŋ tì zlèk a gà asiŋ gà mburma ŋgar a ka, ma ge lele mbaŋa. Ti tsikewa ka, dukw ana ndzer ŋa ya, ta màwa aka mifefile sula tsa. Ta beha à masà guzum tsa asa. Ta vəl gəzləŋ a mayaha siŋgwe hinne tsa asa mbaŋa. 9 Say ta gəs bazlam ŋgwal ŋa ana Mbulum a ɗif dər a, nda gəzləŋ ilik kalkal lele kəla pat. 10 Ama i təv ana ki dzwìm aɗəm a tar a ka, fə̀rum aà mede tar lele dzekwiŋ mbaŋa. Mede tar aka da a kurum a gər ndaka vatwa ŋa lele ka, taŋa ka, ti ne gà ɓəzla mazlàkà gà mburma Mbulum ana nda ndzer ŋa ya kuɗa. 11 Mede gà məkəs tar ibam, ma ge ka, ilik mbaŋa asa. Ti ti tsik manəsa bazlam aà mburma tsa. Ama ta gəs gəzləŋ i təv guzum a, tə ta kwaya tsa. Say megemir tar ma da ka, ndaka vatwa ŋa lele nda təv dukw tserdze, ta gawuwa ahəm sula tsa. 12 Məkəs ma ge aà mala mazlàkà gà mburma Mbulum ka, ilik pəra. Say mà gəs gà ɓəza ŋgar, nda gà asiŋ gà mburma ana i ga i ma ŋgar a ka, lele. 13 Na gà ɓəzla mazlàkà gà mburma ata ta ge a mege megemir ndaka vatwa ŋa lele ka, tàa ŋgat gər tar. I dəba ŋa ya, ta ŋget a vatwa, aà metsìkè bazlam Yesuw Kiristi parakka lele kuɗa, aɗaba ana tàa gəs ŋgat ka, nda gəzləŋ ilik a.

Ŋgwal dukw ana Mbulum a ɗif dər a

14 Yàa dzala aà madaha a təv yak bise, Timute. Ama ka, Yàa ndzeha zukw tsa. I wetsekaha wakita aaha pəra. 15 Aɗaba ku mege Yàa ndzeha bise tsa tekeɗe ka, wakita aaha a ɗifek a à dukw ana i tsikik a zləmana ya, dite ka, ki sir a dər ka, meme na gà mburma ti sle a aà mede ika magər gà mburma Mbulum ndaka vatwa ŋa lele ya. Na a ne gà mburma ata ka, gà na tar riŋ i huɗ mayahaba gər gà mburma Mbulum ana ŋgat a vile a ter a mesife ya. Gà mburma ŋgar ata na ndəzlzlà ti ne mendweŋe bazlam ŋgar ana ndzer a. 16 Bazlam ndzer ŋa ata Mbulum a ɗif a kwa dər, dite meme na kinehe ki ndzekwe a ika miɗ ŋgar a ka, batsah bazlam kaɗəŋ ndzer. Wura a sle a aà mimbetse tsa:

Bazlam ata ti tsik ka, aà Yesuw Kiristi ana

a dara aka gər ahəɗ a, dite a ne mburma ya.

Mezite Mesife Mbulum a ɗif dər ka,

ŋgat na ŋgwal ŋa lele ya.

Gà gawla Mbulum tserdze tàa ŋgatar.

Gà mburma ti tsikewa bazlam ŋgar

a gà mburma ana ika gər ahəɗ a tserdze.

Ama gà asiŋ ŋa, ku mege i ŋga tserdze,

tàa gəs ŋgat nda gəzləŋ.

I dəba ŋa ya, tsəɗak Mbulum a zla ŋgat

a təv mezlibe ŋgar ana tì zlibe a à ŋgat a.