Ibəranikwa 2

Ka ta fə̀rakwa aà ŋgwal vatwa ana Mbulum a mbil a dər

kwa ya, kamala dukw taf masakəŋa ya tsa

1 Aɗaba taŋa, say gekwa metsehe a bazlam ata kà tsarakukwa ya lele, na dite ka, ka dzeyekwa ika vatwa ŋgwal ŋana ya tsiye. 2 Ka sərakwa, bazlam ana gà gawla Mbulum tə da dərra, ti tsik akahər ata ya ka, ndzer kaɗəŋ, pàrsa iɗəm tsa. Akahər ata ka, ku weke, gà na tə dza aà zləm tsiye ka, ta ŋgat mesewere are kalkal biy bakal tar ana ta ge ya mbaŋa. 3 Na Mbulum aka sèwèr a tar are kataya dze ana, kà dzalakwa ana, kwa ana pam a, na ki fìrekwe a aà ŋgwal vatwa ana a mbil a dər à kwa ya ka, kamala dukw taf masakəŋa ya? Yesuw Kiristi BATSAH kwa ŋa nda gər ŋgar aka lah metsìkè a kwa, meme na Mbulum a ta mbil a kwa ya. Gà na tə tsaraka bazlam ŋgar ata ya, dite ka, ta mà a kwa dər, ta gwa ka, bazlam ŋgar ata ka, ndzer kaɗəŋ, pàrsa iɗəm tsa. 4 Mbulum ibam, aka pàt à bazlam ata ndzer, pàrsa iɗəm tsiye, nda təv gà dukw mene aà mburma ŋgiɗ pampam hinne mbaŋa. Aka dzaya ndzəɗa a gà mburma nda ahər Mezite Mesife ŋgar, aà mege dukw pampam kərga biy na a sasar a.

Yesuw a ɗif a kwa à ŋgwal vatwa ana a mbil a dər kwa ya

5 Mbulum à dze a ka, gà gawla ŋgar tsa na aà makwàrà gər ahəɗ awiya ŋana a dere a ika miɗ mba, mì tsik ahər a ya, say gà misle ŋgiɗ. 6 Seyiŋ ivaɗ tsa, ar ka, kamala ana a da ndaka vatwa medzeŋge ana i wakita Mbulum a ka, a gwa:

«Mbulum BATSAH kwa ŋa, mburma ŋa ŋgat weke,

na dite ki dzele aaka a gà gər a,

mburma məfaraŋa dze ana, dukùla

na dite ki dere a, ki zlèk a ŋgat a?

7 I huɗ mendze zaakwa ya ka, kàa ne à ŋgat kəla ŋa

ika miɗ gà gawla yak.

I dəba ŋa ya, kàa vəlar gà mezlibe

nda mendze ŋgwal ŋa,

kamala ana tì zlibe a à batsah Əbay a.

8 Kàa dzar gà dukw tserdze a ahər ŋgar, ma kwara.»

Kamala taŋa ya, ta gwa, «Mbulum aka dzar gà dukw tserdze,» kərga megweɗe ya ka, ku mege dukùla, dukw tserdze na a vəlar a. Naha a riŋ tsəka, a riŋ tsa. Ama aka bəra aaha kinehe ya, kà sərakwa, dukw tserdze mburma a kwere a zukw tsa. 9 Ama ka, kwa a riŋ kà sərakwa, Yesuw na a riŋ a kwere a gà dukw ata tserdze kinehe ya. Akahər ata i huɗ mendze zaakwa ya ka, Mbulum a ne à ŋgat kəla ŋa ika miɗ gà gawla ŋgar a, dite ka, a mət aɗaba gà mburma tserdze, agəra ana a waya mege a tar ŋgwal ŋa ya. Agəra mesewere are ana a sèwèr a, nda məməta ŋgar ana a mət a, na dite Mbulum a vəlar mendze ŋgwal ŋa ata tì zlibe a dər à ŋgat nda medzedzere hinne ya. 10 Mbulum na a ge dukw tserdze ya. A ge ka, a kesle a mbaŋa. Kərga taŋa ya, lele na i təv ŋgar a, a sasar Yesuw a sèwèr a are, na dite a sime a nda təv gà dukw tserdze ya. A ge kataya ka, dite gà mburma hinne ti ne gà ɓəza ŋgar, ta ŋget a ndzəɗa ŋgar ana tì zlibe a dər a mbaŋa, aɗaba Yesuw na a ndze a ter a aka miɗ, a mbil a à tar a.

11 Yesuw na a ne à mburma ŋgwal ŋa ika miɗ Mbulum a, dite gà mburma ata ti ne gà ŋgwal ŋa tsəɗaŋŋa aɗaba ŋgat a ka, Tsir tar ka, Mbulum ilik. Aɗaba taŋa na Yesuw a zal a tar gà damər gà, a ge a ter a hwarwa tsiye. 12 Kamala ana a gwaɗa a Mbulum ka:

«A sèsiŋ i ɗif a à zləm yak a gà damər gà.

I zlibe a à kər ika miɗ gà mburma yak ana

mayahaba gər ŋa ya.»

13 A gwa asa ka:

«I tike a madzala gà gər ka, a təv Mbulum.»

Dite a gwa asa mbaŋa ka:

«Araha, iye i təv gà ɓəza ana

Mbulum a dziŋ tar a ahər a.»

14 Gà ɓəza ŋgar ata a tsik ahər a ka, gà mburma. Tar riŋ nda gà slu ba lele, məmbəz iɗəm. Aɗaba taŋa, Yesuw tekeɗe, aka ne à ba ŋgar kamala tar a mbaŋa, dite na a waya məməta, a mət, a dzeye dər à Əbay sitene ana ŋgat mala ndzəɗa aà medzeye à mesife mburma ya. 15 Akahər ata ka, gà mburma tserdze ta ge a magəɗa a məməta i təv mendze tar ana ti ndze a ya, kamala ɓele ana a ge a magəɗa a mala ga ŋgar a. Ama Yesuw a mət aɗaba tar ata ka, a bera à tar i magəɗa məməta ata ya. 16 Kamala taŋa ya kaɗəŋ ndzer, pàrsa iɗəm tsa, Yesuw a dara ka, aà mazlàkà gà gawla Mbulum a tsa. A dara ka, aà mazlàkà gà mburma ana i gwala Abəraham a, kamala ana wakita Mbulum a tsik a. 17 Aɗaba taŋa, ku mege i təv dukùla ya tserdze ka, say a ne à ba ŋgar kalkal ba gà damər ŋgar a dzekwiŋ, na dite ti ndzer are tsehe ya, a ne *batsah mala mandəva kuɗa a Mbulum aà mege megemir ndaka vatwa ŋa ika miɗ ŋgar mbaŋa. A ge dər kataya ka, aà məbara dər bakal aà mburma ya tserdze, dite ka, tə sər akaba ahəm nda gà Mbulum. 18 Kinehe ka, a sle a aà mezleke gà na ti dzik à ter a ya, aɗaba ana ŋgat nda gər ŋgar tekeɗe ka, aka sèwèr are hinne mbaŋa, tàa dzik à ŋgat a.