Yesuw a za Musa
3
1 A kurum gà damər gà,
Mbulum na a zal a kurum a,
dite ka,
kà nwim gà mburma ŋgar mbaŋa ya.
Aɗaba taŋa,
dzalum gà gər a təv Yesuw ana Mbulum a slərra ŋgat a,
dite ka,
ma ne batsah mala mandəva kuɗa ŋgar,
a sir a ba à kwa nda gà ŋgat.
Taŋa na dukw ana kə̀ gə̀sakwa nda gəzləŋ,
ki tsikikwe a a mburma parakka lele ya.
2 *Mbulum na a zla ŋgat aà megemir ata ya.
Ŋgat tekeɗe,
aka ge ka,
kalkal ndaka vatwa ŋa lele kamala Musa ana a ger megemir ndaka vatwa ŋa akahər ata ika magər gà mburma ana i ma ŋgar tserdze ya.
3 Wele ana a ge ga matsahəna ŋa lele ya ka,
tì zlibe a ka,
à ŋgat,
tsəka,
à ga ata tsa.
Kamala taŋa ya,
i magər gà Yesuw nda Musa tekeɗe,
kataya mbaŋa.
Ndzəɗa ana tì zlibe a à Yesuw a ka,
a za biy Musa.
4 Kaɗəŋ,
gà ga fit ka,
na a zlazl ka,
mburma.
Ama mala mege dukw tserdze ka,
Mbulum.
5 Musa i ŋgar ka,
aka ger megemir ndaka vatwa ŋa lele,
na ika magər gà mburma Mbulum a.
Ama ŋgat ka,
a ne mala megemir pəra.
A me a à dukw ana Mbulum a ta pèt a dər aka miɗ mba ya.
6 Ama *Kiristi ka,
kəla mala ga,
kamala megweɗe ya ka,
Kəla Mbulum.
Dukw ana i ma ŋgar tserdze ya ka,
i ahər ŋgar.
A gewer megemir ndaka vatwa ŋa lele.
Kwa tekeɗe,
gà mburma ana i ma ŋgar a mbaŋa.
Ama kə̀la ka,
na ki tèkwe a dər aka miɗ aka miɗ tsikw a təv mendìsle,
nda magəsa gəzləŋ,
nda maŋgayaba nda təv dukw ana kà tikekwa aaka madzala gà gər a dzekwiŋ.
Təv mesifikaba ana zayya, Mbulum a vile a
a gà mburma ŋgar a
7 Aɗaba taŋa,
Mbulum ihər a gweɗe a nda ahər Mezite Mesife ŋgar ka:
«Na kàa tsarakum mifefile gà mbakum ka,
8-9 dzumar zləm lele,
segeme ma ge i gər kurum
kamala gà tsir kurum ana akahər ata
ti niw bazlam gà ya tsa.
Aɗaba tar tə ndzawa ka,
i kusak.
Tàa ndza riŋ mive dzik faɗ.
Tə slalawa à iye i yam a.
Tàa dzik aba aà menisiŋ à gəzləŋ,
ti dzik à iye i təv megemir ana i ge ya mbaŋa,
ku mege tàa ŋgat a gà dukw ana tserdze
i ge i huɗ mive ata ya tekeɗe ya.
10 Aɗaba taŋa,
Yàa ge arəv hinne aka gà mburma ata.
I gwa ka,
tàa dzeye
i təv madzala gà gər tar ana ti dzele a ya.
Ama a mà a tar dər daɗəkɗəkka,
tàa kəzlaha ika vatwa gà ya.
11 *Aɗaba taŋa,
Yàa mbaɗa i təv matsəɓatsəɓ ga ata ya.
I gwa ka,
ti sle a aà medera a təv mendze gà ana
zayya,
tì sifik a iɗəm ba ya tsidze.»
12 Gà damər gà,
gwim metsehe,
aɗaba gəzləŋ wura ika magər kurum ma ta ge makula ŋa kamala taŋa ya tsa,
dite ka,
a niw a magəsa Mbulum,
à mbìɗer a dəba,
a ŋgat ana mala məvəla mesife ya tsa.
13 Màyum baha à arəv ilik ilik ika magər kurum tserdze kəla pat seyiŋ ivaɗ,
na dite duwa ilik a beze a kurum a za asa tsiye,
dite ka,
ki gwim a bakal,
ka tsalum ba à segeme a gər tsa asa ya.
Zazamum bazlam ata kəla pat i təv ana Mbulum riŋ à fèfilekwe a tə̀ma seyiŋ mbakum a.
14 Kwa kinehe ka,
gà mburma ana kə̀ ŋgatakwa akaba duwa nda gà *Kiristi ya.
Ama kə̀la ka,
na ki tèkwe a dər aka miɗ aka miɗ,
ki ndzekwe a ɓəŋɓəŋ lele nda təv dukw ana kà lah megìsekwa malahalah ŋa ya,
tsikw a təv mendìsle.
15 *Araha Mbulum a gwa i wakita ŋgar a ka:
«Na kàa tsarakum mifefile gà mbakum ka,
dzùmar zləm lele,
segeme ma ge i gər kurum
kamala gà tsir kurum ana akahər ata
ti niw bazlam gà ya tsa.»
16 Gà weke na tə tsaraka bazlam Mbulum ka,
dite ti niw mifefile ŋgar a?
Na a niw ana,
gà na tserdze Musa a ndzəkara tar ika ahəɗ Ezipt ya tsiye?
17 Mbulum a ge arəv dze ana,
aka gà weke,
na mive dzik faɗ a?
A ge arəv ana,
aka gər gà mburma ana ta ge bakal ka,
dite ta mata fit i kusak a tsiye?
18 I təv ana Mbulum a mbaɗa,
a gwa:
«Ti sle a aà medera a təv mendze gà ana zayya,
tì sifik a ba ya tsidze» ana,
a tsik ana,
aà gà weke?
A tsik ana,
aà gà mburma ana,
ti niw ahər mifefile ya tsiye?
19 *Kamala taŋa ya kaɗəŋ ka,
tàa sle aà mada a təv mendze ŋgar ata zayya,
tì sifik a ba ya tsəka,
aɗaba ana tàa gəs ŋgat nda gəzləŋ tsiye.