4
1 Akahər ata ka,
Mbulum aka tsik duwa i sida ya.
A gwa ka,
a ta vile a kwa a vatwa aà mede a təv mendze ŋgar ata zayya,
ki sìfìkikwe a iɗəm ba ya.
Dukw ata ka,
aka mbər metsike a kwa i sida ya ka,
a riŋ hiywe,
a dzeye a tsa.
Aɗaba taŋa,
gekwa metsehe lele,
dite ka,
wura ilik ika magər kurum a,
ma ta məts a dəba ze mede aɗəm tsa.
2 Aɗaba kwa tekeɗe ka,
kàa tsarakukwa bazlam ŋgwal ŋana kamala ana akahər ata gà tsir kwa ata i kusak tə tsaraka ya mbaŋa.
Ama bazlam ata ka,
aka ge a tar ŋgulum ɓav tsa,
agəra ana ku mege tàa tsaraka tekeɗe ka,
tàa gəs a gəzləŋ tar tsiye.
3 *Kwa na kinehe kə̀ gə̀sakwa bazlam ŋa lele ya ivaɗ,
na ki tèkwe a a təv mendze ŋgar ata zayya,
ki sìfìkikwe a ba ya.
Ar ka,
kamala ana Mbulum a tsik i wakita ŋgar a,
aka gər gà na ta gəs tsiye,
a gwa ka:
«I tike matsəɓatsəɓ aka gər tar.
Yàa mbaɗa,
i gwa ka:
“Ti sle a aà medera a təv mendze gà ana
zayya ŋa,
tì sifik a ba ya tsidze.”»
Ama kà dzalum dze ana,
mesifikaba ata ana,
a riŋ tsiye?
A riŋ dukw ŋgar,
aɗaba Mbulum aka mbər mendìve à mege megemir ŋgar daga aà gər ana a ge gər ahəɗ a.
4 *Araha,
a riŋ mewetse ŋa i wakita mbulum aka gər mehinne təsəla ana i huɗ kwaskwa à gər ana a ge gər ahəɗ a ka,
ta gwa:
«Mbulum a ndəv à megemir ŋgar tserdze ka,
mehinne ndilik,
dite ma təsəla ŋana ka,
a sifik ba.»
5 *A riŋ mewetse ŋa i təv ŋgiɗ i wakita ŋgar asa mbaŋa ka,
ta gwa:
«Ti sle a aà medera a təv mendze gà zayya ŋa ata,
tì sifik a iɗəm ba ya tsidze.»
6 Gà mburma ana,
tə tsaraka bazlam ŋgwal ŋana malahalah ŋa ya ka,
tàa sle aà mede a təv mendze ŋgar ata zayya ŋa,
tì sifik a iɗəm ba ya tsəka,
aɗaba ana tàa gəs ŋgat nda gəzləŋ tsiye.
Ama kà sərakwa ndzer,
gà asiŋ gà misle ŋgiɗ ka,
ti diŋa.
7 *Aɗaba taŋa na Mbulum a zla pat ŋa asa,
a zalar «mbakum» a,
kərga megweɗe ya ka,
kinehe.
A tsik ahər i dəba mive ana a da a dəba hinne ya,
nda bazlam Dawda,
a gwa kamala ana i lah metsike a kurum ndeɗiŋa ya:
«Na kàa tsarakum mifefile Mbulum mbakum ka,
dzùmar zləm lele,
segeme ma ge i gər kurum tsa.»
8 *Na mege i təv ana akahər ata Yesuwa a da à gà tsir kwa ata aka ahəɗ Kanan ka,
aka ndze à tar a təv mendze Mbulum ana zayya ŋa,
tì sifik a iɗəm ba nda ndzer a ka,
a sle a aà meɗìvè zləm a pat mesifikaba ŋgiɗ pam i dəba ŋa ya asa tsa.
9 Kamala taŋa ya,
gà mburma Mbulum ka,
ti sle a aà mede a təv mesifikaba ata kamala ŋgat ana a sifik a ba a pat matəsəla ŋa ya hiywe mbaŋa.
10 Mbulum a ndəv à megemir ŋgar,
na dite a sifik ba ya.
I təv kwa kinehe tekeɗe,
kataya mbaŋa.
Wur ana a de a a təv mendze ŋgar ata zayya ŋa,
à sifik a ba iɗəm a ka,
a ge a megemir asa tsa,
megemir aka ndəv kuɗa.
11 Aɗaba taŋa,
mə̀rakwa aaka aba,
dite ka,
kə ŋgatakwa vatwa aà mede a təv mendze ŋgar ata zayya ŋa,
ki sìfìkikwe a iɗəm ba ya.
Gekwa metsehe,
wura ilik ika magər kwa ya ma ta mà a dəba kamala gà tsir kwa ata ta gəs ahəm aà Mbulum tsiye tsa.
12 Kà sərakwa bazlam Mbulum ka,
ŋgat na a vile a mesife a mburma ya.
Ar ka,
ndzəɗa ŋa hinne mbaŋa.
Ndzəɗa ŋgar ka,
a za dər masalama ana matasla ŋa hapəpəpa a zəm tseke sula ya.
A pìts a madzala gà gər mburma ka,
kamala masalama ana à ses a ikaba təv mezìve ya,
nda gà tsa,
a dehe a,
ərrats à ses a atasl ana azuz iɗəm a.
Bazlam ŋgar ata ka,
kwàndàlàz à pètere a iɗəm à gà dukw ana gà mburma ti dzele a i gəzləŋ tar,
a sàs a tar aà mege ya.
13 Duwa a riŋ ilik na makàhà ŋa aà are Mbulum a tsa.
Gà dukw ana a ge tserdze ya ka,
a ŋgatar tseɗey tseɗey lele.
Ki ti ɗemekwe a gà dukw ana ki gekwe a ya fit dze aka miɗ ŋgar.
Yesuw *batsah mala mandəva kuɗa a Mbulum kwa
14 Aɗaba taŋa ki ndzekwe a nda gà megìse ana kə̀ gə̀sakwa ya,
a gəzləŋ ɓəŋɓəŋ lele,
dite ki ɗifekwe a dər a mburma ŋgarra lele mbaŋa asa.
Aɗaba batsah mala mandəva kuɗa a Mbulum ata ka,
Yesuw Kəla Mbulum ana a tsəl a təv ŋgar a gər ŋa ya.
15 Ŋgat na kà ndzekwar are tsehe,
a geye ika kwa ya nda təv gà dukw ana mawùràba ŋa i təv kwa ya.
Aɗaba ŋgat ka,
aka sər aà mesewere are ya pampam mbaŋa,
tàa dzik à ŋgat,
ta waya madə̀ɗà à ŋgat a bakal kamala kwa ya.
Ama ka,
aka ge bakal ata tsidze.
16 Aɗaba taŋa,
sìrìkikwa a təv mendze mekwere Əbay Mbulum ana a kwere a ya,
dite ka,
a ge a ŋgwal ŋa a mburma mbaŋa ya.
Hìriɓ hìriɓ ki gekwa magəɗa tsa.
Aɗaba ka sərakwa,
kà ndzekwar are tsehe,
dite na a gekwe a ŋgwal ŋa i təv dukw ana a sle a aà kwa ya.