5
1 Ama gà bàba gà ɓəzla mandəva kuɗa a Mbulum ana tserdze i liwiŋ kwa ya kinehe tekeɗe,
Mbulum na a pala tar a mbaŋa.
Ta pala tar ka,
dite ta ge megemir Mbulum agəra gà mburma ata,
aà ta vəlar dukw taf nda məbatsa gà duwa agəra bakal tar ana ta ge ya.
2 Gà bàba gà ɓəzla mandəva kuɗa a Mbulum ata ka,
tə sər mege ŋgwal a gà mburma ana tə sər duwa tsa,
tar gà ɓəzla bakal a.
Aɗaba tar tekeɗe ka,
ti sle a medìɗè a bakal nda təv gà dukw ŋgiɗ pampam hinne asa mbaŋa.
3 *Aɗaba taŋa na say ta batsawa duwa a Mbulum ka,
agəra bakal tar ata mbaŋa ya,
tsəka,
agəra bakal gà misle ŋgiɗ ɗekɗek tsiye.
4 *Wura a sle a aà mene à ba ŋgar batsah mala mandəva kuɗa a Mbulum nda ahər ŋgar tsa.
Say na Mbulum aka ne à ŋgat kamala ana a ne à Haruna akahər ata ya tsiye.
5 *I təv Yesuw Kiristi tekeɗe ka,
kataya mbaŋa.
Aka ne à ba ŋgar batsah mala mandəva kuɗa a Mbulum nda ahər ŋgar tsa.
Mbulum na a zla ŋgat a,
a gwaɗar:
«Kər kà ne ka,
Kəla gà,
Yàa ne Tsir yak mbakum.»
6 *A gwa i təv ŋgiɗ a asa ka:
«Ki ne a batsah mala mandəva kuɗa a Mbulum
aà biybiy,
kamala Melikisedek ana akahər ata ya.»
7 *Aka na Yesuw ɗa ika gər ahəɗ mba ya ka,
a sər,
Mbulum a sle aà mimbilere a à ŋgat i məməta ya.
Aɗaba taŋa na a hama a Mbulum nda magala ŋgəlakəkka hinne,
haa a tuwa a dar dərra i are ya.
Mbulum tekeɗe,
aka tsaraka meheme ŋgar ata,
dite i dəba ŋa ya,
a mbəlara à ŋgat i məməta ya,
agəra ana a hənar à gər a bəɗ a.
8 *Ku mege ŋgat Kəla Mbulum tekeɗe ka,
aka sər magəsa ahəm aà Mbulum i təv mesewere are ana a sèwèr a.
9 Mbulum a ndəv à dukw ana a dzala,
a waya aà mege nda ŋgat a ka,
a ne mala məmbə̀là à gà mburma ana tserdze ta gəs ahər ahəm a,
dite ka,
ta ŋget a mesife ana à ndìv a tsa aà biybiy a.
10 Aɗaba a ne à ŋgat batsah mala mandəva kuɗa ŋgar kamala Melikisedek a mbaŋa.
Ka miyakum à megìse kurum tsa
11 Gà dukw a riŋ hinne asa na aà metsike a kurum aka gər megemir Melikisedek ata ya.
Ama ka,
mawùràba ŋana aà metsike a kurum fit a təv ilik ŋa,
dite na ki tserekwim a ya.
Aɗaba ndə̀kə̀zlə̀zlə̀mma ki slwim aà metsereke bise tsa.
12 Ana ka,
ki slwim aà mene a gà ɓəzla medzeŋge guma Mbulum a mburma,
na mege daga piŋŋe ka,
kà dzum ba aà mesìnìkè ba à duwa ya.
Ama haa kinehe kàa sərum lele zukw tsa.
Say ta me a kurum a aka medzeŋge guma ana kà lah metserekwim a nda təv bazlam Mbulum a lele asa dzekwiŋ.
Kurum ka,
kà slwim mazəma ɗaf zukw tsa.
Kurum ka,
kamala gà ɓəza ana ti se a awah aà məmər tar a mba ya.
13 Aɗaba taŋa,
wur ana a se a awah mba ya ka,
kəla ndirkiz hiywe.
Slàla gà mburma ata ka,
tə sər ikaba à gà dukw ana ŋgwal ŋa ya,
ndəna ŋgwal ŋa tsiye zukw tsa.
14 Ama dukw mezime ana ndzəɗa ŋa kamala ɗaf a ka,
say biy gà mburma ana tàa sime ya.
Tar ka,
tə sər metsehe lele.
Tàa sinikebe à masəra ikaba à gà dukw ana ŋgwal ŋa ya,
ndəna ŋgwal ŋa tsiye ya.