6
1 Aɗaba taŋa,
tàkwa aka miɗ nda təv bazlam ana aka gər Yesuw Kiristi ya,
dite ka,
ka nekwa gà mburma ana tàa sime i huɗ bazlam ŋgar ata ya.
Tsəka,
dìndìleɓ dìndìleɓ ka ta mətsakwa aà bazlam ana kà lah megìsekwa aka gər Yesuw Kiristi ya tsa.
Aɗaba kàa mbər medzèkweha aka ndəv,
ki tèkwe a ka,
aka miɗ aka miɗ nda mazlazla ŋa.
Ki slekwe aà meɗekwaba a à dukw ana kàa mbər metserekekwe ya hiywe asa tsa.
Kamala kà gwaɗakwa:
Mbə̀ɗakwa à madzala gà gər ana ŋgwal ŋa tsiye,
nda mimìyàkà à dukw ana ŋgwal ŋa tsa,
a ne aka kwe a məməta ya,
nda gà magəsa Mbulum nda gəzləŋ ilik a asa tsa.
2 Ki sle aà meɗekwebe a à bazlam metsìlwìɓè à mburma a yam,
meme na metìkè ahər aka gər mburma nda zləm Mbulum a ɓav tsa,
dite meme na Mbulum a mbil a dərra à mburma i məməta ya tsa asa,
dite meme na ta ge a seriye aka gər mburma a pat mandəvandəv gər ahəɗ a ɓav tsa asa mbaŋa.
3 Ama na kàa mbər mesirekwa gà taŋa ka,
tàkwa aka miɗ aka miɗ nda gà biy ŋgiɗ mbaŋa,
na mege Mbulum a waya ya.
4 Ki sle aà meɗekwebe a à bazlam ata hiywe asa tsəka,
aɗaba na bəla gà asiŋ ŋa i liwiŋ kwa,
tàa mà a dəba ika vatwa Mbulum a ka,
ki sle a aà mimèkwe aakara à tar a,
dite ka,
ta mbìɗ a à gəzləŋ a təv Mbulum asa tsa.
Aɗaba gà mburma ata ka,
tàa mbər meŋgete təv dzaydzay ŋana a dara i təv Mbulum a.
Tàa ŋgat mipise ahəm ŋgar.
Tàa ŋgat Mezite Mesife ŋgar a gəzləŋ tar mbaŋa ibam.
5 Dite tàa mbər mesire bazlam Mbulum ka,
ŋgwal ŋa.
Tàa sər aà ndzəɗa gər ahəɗ awiya ŋana Mbulum a ge a ika miɗ mba ya asa mbaŋa.
6 Dite i dəba ŋa ya,
gà na tàa sər ihər a kataya,
ta mbìɗ a dəba a Mbulum a ka,
vatwa a riŋ na aà məma a tarəra à gər a dəba ya,
dite ta mbəɗ à gà gəzləŋ tar a asa tsa.
Aɗaba ar ka,
kalkal kamala ana tə zla Kəla Mbulum,
tə ndwandway ŋgat aà dizl magə̀làwà ŋa masula ŋa ya asa.
Dite tə ndaɗa aaka hwarwa nda mendeveyer pìslìɗìɗe ika miɗ mburma asa.
7 Fə̀rum kwaŋ,
ar ka,
kamala ana yam aka dza aka ahəɗ,
guvah a ge a dukw mezime hinne,
a ge a ŋgulum a mala mifìte ana,
Mbulum tsiye na a pise ahəm a guvah ata ya?
8 Ama na bəla guvah ŋa a slil a mèhìrɓiɓe nda kwizir ana ŋgwala tsiye ana,
a ge a ŋgulum a?
Awaŋ,
Mbulum a viler a mezelme,
a wene a iɗəm a birɗek,
a ndze a hinne tsa.
9 Ama kurum gà masla mə̀r,
ku mege mì tsik kataya tekeɗe ka,
mì sər ndzer,
kurum riŋ ki zezemwim a ŋgwal vatwa ana lele,
dite ka,
Mbulum a ta mbil a dər à kurum a.
10 Mbulum ka,
mala ndzer ŋa.
Mege megemir ana ki gwim a ya ka,
à mìtser a gər tsa.
Kamala taŋa ya,
a sər ka,
kàa zlakum gà asiŋ gà mburma ŋgar,
dite kurum riŋ ki zlèkwim a tar hiywe,
haa kinehe.
Aɗaba taŋa na a sər ba ka,
kà wayum Mbulum a.
11 Ama a sàs a mə̀r ka,
ku weke mə̀ mə̀r aba kataya kəla pat,
haa a pat mandəvandəv gər ahəɗ,
dite kə ŋgatum dukw ana ka dzalum,
Mbulum a gwa ka,
i ta vile a kurum a ya.
12 A sàs a mə̀r ka,
ka yum ba tsa.
Ama zazamum ka,
mede gà mburma ana tàa gəs Mbulum nda gəzləŋ ɓəŋɓəŋ lele ya ivaɗ.
Tar ata na ta ŋget a dukw ana Mbulum a gwa i sida ya ka,
i ta vile a kurum a ya ya.
Dukw ana Mbulum a gwa ka, a ge a ba ndzer a
13 Akahər ata,
Mbulum aka tsik duwa i sida ya,
a Abəraham.
I təv ana a tsiker a ka,
a mbaɗar,
kamala megweɗe ya:
Dukw ana a tsiker a ka,
a ge a ba ndzer.
Wura a riŋ ilik a za Mbulum tsa.
Aɗaba taŋa na a mbàɗa nda zləm ŋgar a.
14 *Dukw ana a tsiker a ka,
a gwaɗar:
«I ta pisak a ahəm ndzer,
gwala yak a ta we a ba ka,
hinne.»
15 Abəraham ibam,
a tsaraka kataya ka,
a gəs nda gəzləŋ ɓəŋɓəŋ lele,
a veve a dukw ana Mbulum a tsiker a.
I dəba ŋa ya ka,
a ŋgat dukw ana Mbulum a gwaɗar,
i ta vilek a ndzer a kuɗa.
16 Ku mege kinehe tekeɗe,
gà mburma ti sir a dər,
bazlam ata a ne ndzer kaɗəŋ a ka,
ta mbeɗe a nda dukw ana a za tar fit a,
dite na bazlam ata à ndìv a ika magər tar a.
17 Aɗaba taŋa na Mbulum a mbaɗa i sida ya mbaŋa,
aà gà mburma ana a gwaɗa a tar,
i ta vile a kurum a duwa i sida ya ka,
tə sər dər nda ndzer,
a sle a aà mimbìɗè à bazlam ŋgar asa tsa.
18 A sasar a tsik aba i sida ya dzekwiŋ,
dite i dəba ŋa ya,
a mbaɗa asa.
A tsik aba ya kataya ka,
aà tə sər dər,
gà dukw ata a tsik sula ya ka,
à me a a dəba tsidze.
Mbulum a sle aà mesèse a pàrsa tsa.
Gà dukw ata ta mèkwehe a à arəv,
a kwa ana kà valakwa a təv ŋgar kamala mendzikwir ana a vel a aà huɗ məmər ŋgar aà məmba ya.
Dite ka,
ki ndzekwe a nda magəsa gəzləŋ ɓəŋɓəŋ lele.
Ki vevekwe a dukw ana Mbulum a tsik a kwa i sida ya,
a gwa,
a ta vile a kwe a ya.
19 *Dukw ata ki vevekwe a nda gəzləŋ ilik a ka,
à gis a kwa lele,
na dite gəzləŋ kwa à gìrìv a ika miɗ ŋgar asa tsiye.
Aɗaba taŋa na ki tèkwe a a təv ŋgwal ŋa ata tsəɗaŋŋa,
Mbulum iɗəm a.
Suɓtùh ki pìtsekwe a nda liwiŋ petek ata a kaha biye hərmaga ata ŋgwal ŋa ya,
aà mendze nda gà ŋgat i fata.
20 *Yesuw aka làhakwa aɗəm a fata.
A lah ka,
aà mendze ika miɗ Mbulum,
agəra kwa.
Aɗaba ŋgat ka,
aka ne *batsah mala mandəva kuɗa a Mbulum,
kamala Melikisedek a,
aà biybiy.