Melikisedek, mala mandəva kuɗa a Mbulum
7
1 Melikisedek ata akahər ata ya ka,
batsah Əbay gà Salima,
dite ŋgat asa ka,
mala mandəva kuɗa a Mbulum ana ŋgat ika gər gà dukw tserdze ya mbaŋa.
Akahər ata Abəraham à mère a i guvəl a,
i təv ana ta bats gà bàba gà Əbay ŋgiɗ hinne ya ka,
Melikisedek a ŋgəzlaraha gər aà vatwa,
aà melime akaba nda ŋgat.
I fata ya ka,
a piser ahəm.
2 *Abəraham ibam,
a dzaya ikaba kàzlàŋa gà mburma aaha tə duŋ ikəka tar a,
a geye dər akaba təv pampam kurwa,
a zla iɗəm a ilik,
a vəlar.
Melikisedek ka,
kamala megweɗe ya «Əbay ana a ge a seriye ndaka vatwa ŋa ndzer a.
» Dite ŋgat asa ka,
Əbay gà Salima.
Salima mbaŋa ka,
kamala megweɗe ya «Əbay ana a vile a zayzay a mburma ya. »
3 Wura a sər gà gwala ŋgar tsa.
Wura a sər gà dede ŋgar nda mama ŋgar tsa asa.
Dite wura a sər pat mawà ŋgat tsa asa mbaŋa.
Pat ana a mət a tekeɗe,
wura a sər ɓav tsa asa mbaŋa.
Ŋgat ka,
kamala Yesuw Kəla Mbulum a.
Aɗaba ŋgat a ne ka,
mala mandəva kuɗa a Mbulum.
Mege megemir ŋgar ka,
a ndze a aà biybiy.
4 Dzalum kwaŋ,
meme na ki sirekwe a dər ka,
Melikisedek batsah ŋa ya.
Ki sirekwe a dər ka,
aɗaba Abəraham batsah tsir kwa ata akahər ata a dzaya ikaba kàzlàŋa gà mburma ata tə duŋ ikəka tar a,
təv pampam kurwa ka,
dite a vəlar təv ilik a.
5 *Ama gà gwala Live kinehe ka,
tar gà ɓəzla mandəva kuɗa a Mbulum kamala ana məpala ahəm Musa a tsik a ka,
tar tekeɗe,
ti sle aà meŋgete a dukw ilik i huɗ gà dukw gà Isərayel ana tàa ɗama kurwa ya,
dite ka,
ti zle a iɗəm a ilik,
ta vile a ter a ya.
Kamala megweɗe ya:
Gà dukw ata ta ŋget a ka,
i təv gà damər tar,
ku mege tar i gwala Abəraham ilik mbaŋa tekeɗe ya.
6 Ama Melikisedek ka,
i gwala Live tsa na Abəraham a zla dukw ata,
a geye dər akaba təv kurwa ka,
a zla iɗəm a ilik,
a vəlar a.
Dite i dəba ŋa ya,
Melikisedek na a pise ahəm a Abəraham ana Mbulum a tsiker duwa i sida ya ya.
7 Kà sərakwa,
wur ana a pise ahəm a mburma ka,
ŋgat na batsah ŋa ya.
8 Gà ɓəzla mandəva kuɗa a Mbulum ana i gwala Live ya,
tə̀ ndzəkawa dukw ata ta geye dər akaba təv pampam kurwa ya ka,
ta matawa,
agəra ana tar ka,
gà mburma masakəŋa ya.
I dəba ŋa ya,
tə dza aɗəm gà misle ŋgiɗ.
Ama Melikisedek aaha a gəs dukw ata Abəraham a zla ikəka ya ilik,
a vəlar a ka,
à mite a tsidze.
Ŋgat ka,
a ndze a aà biybiy,
kamala ana wakita Mbulum a tsik a.
9 Akahər ata,
i təv ana Abəraham a zla ikəka dukw ata ya,
a vəl a Melikisedek a ka,
kamala ana Live na a vəlar a mbaŋa,
ku mege gà ɓəza ŋgar ti ti dzik a dukw ata i ahər gà damər tar a,
haa kinehe tekeɗe ya.
10 Aɗaba akahər ata ka,
tàa wa Live,
kəla Abəraham zukw tsa,
na i təv ana Melikisedek a daha,
aà melime akaba nda ŋgat a.
11 *Akahər ata,
Mbulum a ɗe à məpala ahəm ŋgar ka,
a gà Isərayel.
A ɗif a tar dər ka,
a gà gwala Live,
na dite a waya ti ne gà ɓəzla mandəva kuɗa ŋgar a.
Na mege mandəva kuɗa Mbulum ata tì ndìver a i gwala Live ya,
a sle a aà are a Mbulum kamala ana a sasar a ka,
ana ka,
mala mandəva kuɗa a Mbulum ŋgiɗ ana kamala Melikisedek a,
a dere a asa tsa.
Ana ka,
gà ɓəzla mandəva kuɗa a Mbulum gà gwala Live kamala Haruna ya,
ti sliŋa.
12 Kà sərakwa ka,
na Mbulum aka dza iɗəm à gà ɓəzla mandəva kuɗa ŋgar ana i gwala Live ya,
aka dza aɗəm gà misle ŋgiɗ ka,
taŋa məpala ahəm ŋgar tekeɗe,
à mbìɗ a à ba mbaŋa.
13 Ama kinehe ka,
aka mbəɗ à gà ɓəzla mandəva kuɗa ŋgar ata kaɗəŋ.
Kamala megweɗe ya:
Mifefile ata ka,
aka gər Yesuw Kiristi BATSAH kwa ŋa.
Aɗaba ŋgat a dara ka,
i gwala ŋgiɗ a pam,
tsəka,
i gwala Live ya tsa.
Dite wura a riŋ ilik i gwala ŋgar,
aka ne mala mandəva kuɗa a Mbulum,
a babawa aà dukw masakəŋana ta vəlawa aɗaba Mbulum a ka,
a riŋ tsa asa.
14 *Ku mege weke tserdze a sər,
ta wa Yesuw BATSAH kwa ŋa ka,
i gwala Yuda.
Ama i təv ana akahər ata Musa a fàfəlawa aka gər gà ɓəzla mandəva kuɗa a Mbulum a ka,
aka ɗə̀v zləm a gwala Yuda ata ilik tsidze.
*Batsah mala mandəva kuɗa a Mbulum ana
kamala Melikisedek a
15 Ama gà ɓəzla mandəva kuɗa a Mbulum ana i gwala Live ya ka,
ti sle aà mede a à mburma a təv Mbulum tsa.
Dukw ata a sər ba ndeyndey ka,
aɗaba batsah mala mandəva kuɗa a Mbulum ŋgiɗ aka dara kuɗa.
Ŋgat ka,
i gwala Live tə tsa.
Ar ka,
kamala Melikisedek a.
16 A ne mala mandəva kuɗa a Mbulum ka,
ndaka vatwa məpala ahəm gà mburma ana tə zazaɗawa dər a asa tsa.
Mbulum a ne à ŋgat mala mandəva kuɗa ŋgar ka,
aɗaba ana ndzəɗa ŋgar a riŋ,
ŋgat ka,
a ndze a aà bəra aà biybiy a.
17 *Ar ka,
kamala ana ti tsik ahər i wakita,
ta mà à bazlam Mbulum a ka,
Mbulum gwaɗar:
«Ki ti ne a batsah mala mandəva kuɗa gà aà biybiy,
kamala Melikisedek a ya.»
18 Kamala taŋa ya,
wetsèkèlek Mbulum a mbəɗ à məpala ahəm miviye ŋana ka,
agəra ana ndzəɗa ŋa tsa,
dite a ge a ŋgulum a mburma tsa asa ya.
19 Aɗaba məpala ahəm Musa ka,
ndzəɗa ihər tsa,
a sle a aà duwa ilik tsa,
na dite mburma ti ne a dər à ba tar ŋgwal ŋa ika miɗ Mbulum a.
Ama kinehe ka,
duwa ŋgiɗ pam a gekwe a ŋgulum na Mbulum a mbəɗara avukw ŋa ya.
Dukw ata ka,
kà tikekwa aaka madzala gà gər kwa,
na a vile a kwe a dər vatwa,
aà mesirikaha a təv ŋgar bise ya.
20 Kà sərakwa dukw ata nda ndzer ka,
aɗaba i təv ana Mbulum a ne à Yesuw kamala mala mandəva kuɗa ŋgar a ka,
a mbàɗa i sida ya.
Ama akahər ana a ne à gà gwala Live gà ɓəzla mandəva kuɗa ŋgar a ka,
aka mbaɗa kamala taŋa ya tsidze.
21 *I dəba ŋa ya,
Yesuw a ne mala mandəva kuɗa ŋgar ka,
a mbaɗa i sida ya,
a gwaɗar:
«Iye Mbulum batsah ŋana,
i mbìɗ a ahər a bazlam gà tsa.
Yàa mbaɗa kamala taŋa ya ka,
kər ki ti ne a mala mandəva kuɗa gà aà biybiy.»
22 Aɗaba taŋa,
kà sərakwa,
magəsa ba kwa ana kinehe kə̀ gə̀sakwa ba nda gà Mbulum a ka,
ŋgwal ŋa lele,
a za dər biy na akahər ata a tsik i sida ya,
a gwa,
ki ti sirekwe a ba ya.
Kà sərakwa dukw ata a ge ba nda ndzer ka,
aɗaba Yesuw Kiristi.
23 Dukw ŋgiɗ asa mbaŋa ka,
aɗaba gà ɓəzla mandəva kuɗa a Mbulum ana akahər ata i gà gwala Live ya,
tar ka,
diŋ hinne,
aɗaba ana ta matawa iɗəm a.
Ta matawa tekeɗe ka,
tə dzawa aɗəm gà misle ŋgiɗ pampam asa.
24 Ama Yesuw ka,
pam aà tar a.
Ŋgat a ndze a ka,
aà biybiy.
Wura a riŋ ka,
à mbìɗ aɗəm a ba avukw ŋgat tsidze.
25 Aɗaba taŋa na ŋgat a riŋ nda gà ndzəɗa,
a sle a aà məmbala à gà mburma ana kinehe ti dere a a təv Mbulum,
nda ahər ŋgar a ya.
Aɗaba ŋgat a ndze a ka,
aà biybiy,
dite ŋgat a riŋ a heme a a Mbulum agəra gà mburma ata kəla pat mbaŋa asa.
26 Kamala taŋa ya,
Yesuw ka,
batsah mala mandəva kuɗa a Mbulum kwa.
Ŋgat ka,
wele ana a sle a aà mege dukw ana a sle aà kwa ndaka miɗ ŋgar a.
Aɗaba ŋgat ka,
tsəɗaŋŋa,
bakal i təv ŋgar tsa,
dite swalwa i ba ŋgar kwizikw ɓav tsa asa mbaŋa.
Mendze ŋgar ka,
tsakàlàk aà gà ɓəzla bakal a.
Mbulum a tike ŋgat a təv ŋgar i gər ŋa.
27 Aɗaba gà asiŋ gà bàba gà ɓəzla mandəva kuɗa a Mbulum ŋgiɗ ata ka,
ta batsawa duwa a Mbulum kəla pat.
Malahalah ŋa ka,
ta batsawa aɗaba bakal tar dzekwiŋ,
dite i dəba ŋa ya,
ta bets a aɗaba gà misle ŋgiɗ kuɗa.
Ama biy Yesuw ka,
kataya tsa.
Ŋgat ka,
a vəl ba ŋgar a Mbulum taf masakəŋa,
sik ilik pəra,
i təv ana ta kəɗ ŋgat a,
tsam ka,
tsuway tsara.
Sik ilik ŋa ata ka,
a sle aà biybiy.
28 *Gà bàba gà ɓəzla mandəva kuɗa a Mbulum ata məpala ahəm Musa a pala tar a ka,
gà məfara ŋa ɗekɗek pəra,
ndzəɗa tar a riŋ tsa.
Ama dukw ana Mbulum a mbaɗa,
a mburuɗ aɗəm avukw məpala ahəm ata ya ka,
a zla Kəla ŋgar,
a ne dər batsah mala mandəva kuɗa ŋgar ana bakal ŋgar a riŋ tsiye,
aà biybiy.