Yesuw a ne *batsah mala mandəva kuɗa a Mbulum kwa
8
1 Wur bazlam ana mìi tsik a kurum a ya ka,
araha:
Ama kinehe ka,
kàa ŋgatakwa medzibe batsah mala mandəva kuɗa a Mbulum ata.
Ŋgat a riŋ mandza ŋa ika tseke ahər mezime Mbulum ana a kwere a gà dukw tserdze ya.
2 Ŋgat a ge a megemir ŋgar ata ka,
i təv ana tsəɗaŋŋa,
Mbulum mandza ŋa iɗəm a.
Akahər ata gà ɓəzla mandəva kuɗa a Mbulum ta gewa megemir ka,
i mekiriwe ga petek ana ta kiriw a.
Ama ga ana Yesuw a gewa iɗəm megemir a ka,
ar ka,
i mbulum i gər ŋa,
i təv ŋgwal ŋana ndzer,
Mbulum a làmbaɗa ya.
3 *Mbulum a dza aɗəm gà bàba gà ɓəzla mandəva kuɗa ŋgar tserdze ka,
dite ta vəlawar dukw masakəŋana,
ta batsawar gà duwa asa mbaŋa.
Kamala taŋa ya,
batsah mala mandəva kuɗa a Mbulum kwa ata tekeɗe,
say a zle a duwa,
a vile a a Mbulum mbaŋa.
4 Na mege Yesuw ɗa ika gər ahəɗ ka,
ŋgat a ne a mala mandəva kuɗa a Mbulum tsidze.
Aɗaba gà ɓəzla mandəva a Mbulum ŋgiɗ a riŋ ika gər ahəɗ,
ta viler a duwa kamala ana məpala ahəm Musa a tsik a tar a.
5 *Mege megemir ana ta gewa ya ka,
mendzikiɗe ba ŋa ɗekɗek pəra.
Ta gewa ka,
mendzikiɗe ba megemir ana Yesuw,
batsah mala mandəva kuɗa a Mbulum kwa a ge a riŋ i mbulum i gər ŋa ya.
Mekiriwe ga tar ata tekeɗe,
mendzikiɗe ba təv ata Mbulum mandza ŋa iɗəm a mbaŋa.
Ta kiriw ga ata ka,
kamala ana Mbulum a tsik a Musa,
a gwaɗar ka:
«Ge metsehe lele,
na dite ki ge a duwa tserdze kamala ana i ɗifek dər i gər kwite ya ya.»
6 *Ama kà samatakwa kinehe Yesuw a ge a megemir ka,
a za dər megemir gà ɓəzla mandəva kuɗa a Mbulum ata ta gewa ya hinne.
Kamala taŋa ya tekeɗe,
masəra ba ana Yesuw a sər dər ba à gà Mbulum nda mburma,
ta gəs ba ya ka,
ŋgwal ŋa hinne,
a za dər masəra ba ana tə sər ba akahər ata ya mbaŋa.
Aɗaba dukw ana Mbulum a tsik a kwa i sida ya,
a gwa,
i ta vile a kurum a ya ka,
a za dər dukw ana a tsik piŋŋe,
kə̀ ŋgatakwa ya.
7 Na mege malahalah masəra ba ata ta gəs ba ya,
ma sle aà gà mburma nda ndzer ka,
ana ka,
Mbulum a yehe a vatwa aà masəra ba,
à gis a tar masula ŋa asa tsa.
8 Ama kà sərakwa,
malahalah masəra ba ata ta gəs ba ya ka,
a sle tsa,
aɗaba gà mburma Mbulum tàa miyak à bakal tar tsa.
I dəba ŋa ya,
Mbulum a pala ahəm,
a gwa:
«Araha,
pat ŋa a riŋ a dere a ka,
dite mìi sir a ba nda magəsa ba nda gà gwala Yuda,
dite nda gà asiŋ gà Isərayel ŋgiɗ tserdze.
9 *Akahər ata i təv ana i gəsara ahər
a gà bàba gà tsir tar ika ahəɗ Ezipt ya ka,
maa gəs ba nda gà tar i fata,
mì sər ba lele.
Ama awiya magəsa ba ana mìi sir a ba
nda gà tar a ka,
ar ka,
kamala taŋa ya asa tsa,
pam kuɗa.
Aɗaba tàa nəs à masəra ba ata miviya ŋa ya.
Aɗaba taŋa na i miyak à tar a.
Iye Mbulum Batsah tar ŋa na i tsik kataya ya.
10 I gwa ka:
Araha,
na magəsa ba gà ana mìi ti sir a ba
nda gà Isərayel aka miɗ mba ya.
A pat ata na i ti tike a
məpala ahəm gà a gəzləŋ tar a,
dite ka,
ta gəs,
tə dzala aaka gà gər.
I ge a dər kataya ka,
dite i dəba ŋa ya,
ta gis a ahəm gà kuɗa.
I ti ne a Mbulum tar,
dite tar tekeɗe,
ti ne a gà mburma gà mbaŋa.
11 Wura a riŋ na a ti ɗif a à guma gà
a gà asiŋ ŋgar,
kige tsa,
a gà damər ŋgar a asa tsa.
Nda gà bəla wura a gweɗe a a misle ŋgiɗ:
“Waytsa sər BATSAH kwa ŋa” ka,
a riŋ a gweɗe a asa tsa mbaŋa.
Aɗaba tar ŋa ti sir a iye,
ku mege gà bàba ŋa,
nda gà ɓəza tserdze tekeɗe ya.
12 *Aɗaba ku mege ta gewa bakal là tekeɗe ka,
i pìl a ter a dər.
Dukw ana ta ge a tserdze ya ka,
a ta mìŋere a a gər a asa tsa,
gwiɗits à mìtsiŋ a gər fit kweleŋ.»
13 *Kamala taŋa ya na Mbulum a fàfəl aka gər masəra ba ana à gis a ba awiya ŋa ya.
A tsik kataya ka,
kamala megweɗe ya:
Malahalah masəra ba ata ta gəs ba ya ka,
ndzəɗa ihər asa tsa,
aka ne dər miviye ŋa.
Ama kà sərakwa,
dukw ana miviye ŋa ya ka,
a ge a ŋgulum asa tsa,
kwiɗèy aka à mendìve.