Mege megemir gà ɓəzla mandəva kuɗa a Mbulum ana
ɗa ika gər ahəɗ a, nda biy Yesuw
9
1 *I təv malahalah masəra ba ana gà Mbulum tə sər ba nda gà mburma ya ka,
aka ɗif a tar à məpala ahəm ŋgar,
na dite ti sir a dər ka,
meme na tì dzer a gurmits a bəɗ a.
Ama təv duwa a riŋ mbaŋa,
tə zalar ka,
tsəɗaŋŋa,
mburma a làmbaɗa.
I fata ka,
tə zàmbaɗawa iɗəm à ŋgat,
nda məbatsar aɗəm gà duwa.
2 *Təv ata ka,
ga petek ana gà mburma ta kiriw a,
dzə̀ɓər iɗəm sula.
Dzə̀ɓər malahalah ŋana ka,
tə zalar təv ana tsəɗaŋŋa ya.
I huɗ ŋa ka,
məvəɗa duwa a riŋ iɗəm,
akwa ikəka məvata ŋa ndwatsndwatsutstswa təsəla,
nda gà tabəl ana tə dzawa aaka ɗaf biy Mbulum a.
3 *Ika biye hərmaga mada a dzə̀ɓər masula ŋana ka,
petek a riŋ madànà ŋa aà mbulum,
tsikw a ndzera a bəɗ a mbaŋa.
Dzə̀ɓər ga ata ka,
təv ana tə zalar tsəɗaŋŋa biy Mbulum a,
a za dər biy ŋgiɗ aaha.
4 *I huɗ dzə̀ɓər ata ka,
təv məvəla duwa a Mbulum a riŋ iɗəm,
ta və̀ɗ nda gura ana tsakala ŋa hinne,
à sìkim a ba tsiye.
Təv ata ka,
ta wanawa aaka mal dukuməŋa a riŋ a zewa aà Mbulum hwaŋŋa lele.
Dite sahər duwa a riŋ i fata mbaŋa,
ta ŋgəz aaka gura,
ti ndìrkisl dər lele.
Ama sahər ata a ɗif ka,
à masəra ba gà Mbulum ana tə sər ba nda mburma ya.
I sahər ata ka,
dzègèɗèk duwa a riŋ iɗəm məvəɗa ŋa nda gura mbaŋa.
Mezehe ɗaf ata tə zalar *mana,
Mbulum a vəl a tarəra i gər ŋa ya,
mandza ŋa iɗəm i fata.
Dite zəva Haruna ana a bize ya,
metìkè ŋa i sahər ata mbaŋa,
nda gà beliŋ ana Mbulum a wetse aaka məpala ahəm ŋgar akahər ata ya,
sula iɗəm i fata asa mbaŋa.
5 *Ika sahər ata ka,
ta ge aaka gà mendzikiɗe ba gà gawla Mbulum sula.
Taŋa ka,
kamala megweɗe ya:
Mbulum mandza ŋa i fata à gər ŋgar.
Gwezleviyek gà mendzikiɗe ba gà gawla Mbulum ata ka,
tits tə dzawa mezite aka sahər ata.
Aɗaba sahər ata ka,
tə dzawa aaka à məmbəz duwa a Mbulum,
dite mə̀ pəl a tar à bakal tar.
Ama kinehe ka,
a sèsiŋ na i ɗif a kurum a à gà dukw ata ilik ilik tserdze ya asa tsa.
6 *Kamala taŋa ya,
ga petek ata ka,
dzə̀ɓər a riŋ iɗəm sula.
I ŋgiɗ ka,
i huɗ ŋa.
Naha ka,
a mbera a bəra ya.
I təv ana ta ge aba gà dukw ata kamala taŋa ya ka,
gà ɓəzla mandəva kuɗa a Mbulum tə dawa a dzə̀ɓər malahalah ŋana a mbera a bəra ya,
ndidwe ndidwe,
ta gewa iɗəm megemir mandəva kuɗa a Mbulum kəla pat.
7 *Ama dzə̀ɓər ana i huɗ ŋa ya ka,
say mala mandəva kuɗa a Mbulum ana batsah ŋa ya na a dawa aɗəm a.
Ama a dawa aɗəm i huɗ mive ya ka,
sik ilik pəra.
I təv ana a de aɗəm a ya ka,
a tə̀fawa dər məmbəz dukw ana ta kə̀ɗawa a Mbulum a,
aà ahər a fata,
dite ka,
Mbulum mə̀ pəl à bakal ŋgar,
dite nda gà bakal gà mburma ana ta gewa ka,
tə sərawa aàba tsiye ya mbaŋa.
8 Kamala taŋa ya,
Mezite Mesife Mbulum ihər a ɗifewa dər ka,
na dzə̀ɓər ga ata a mbera ya,
a riŋ hiywe mba ka,
vatwa ana gà mburma ti de a dər a huɗ ga ata tsəɗaŋŋa,
Mbulum mandza ŋa iɗəm a ka,
titstsè,
mahə̀ndə̀kà ŋa iɗəm a zukw tsa.
9 Aɗaba ga malahalah ŋa ata ka,
mendzikiɗe ba dukw ana a ge ba kinehe ya pəra.
A riŋ ihər a ɗifekwe a dər ka,
gà dukw ana ta vile a iɗəm a Mbulum,
nda gà dukw gənaw ana ta batsawar a ka,
taŋa tsa na a sle a aà məbara gəzləŋ gà mburma ata tə zàmbaɗawa dər à ŋgat a ya.
10 Aɗaba mege gà dukw ata ka,
məpala ahəm aka gər gà dukw mezime nda gà dukw mese,
kige tsa aka matsakasla gà duwa ɗekɗek pəra.
Ama taŋa ka,
dukw gà mburma ta ge a ika gər ahəɗ a ɗekɗek,
tsəka,
aka ndza hinne tsa.
A ndza ka,
haa a pat ana Mbulum a mbəɗ à gà dukw ata tserdze ya ɗekɗek pəra.
11 Ama kinehe ka,
*Kiristi aka dara kaɗəŋ.
Ŋgat ka,
*batsah mala mandəva kuɗa a Mbulum.
Gà ŋgwal gà dukw ana kə̀ ŋgatakwa kinehe ya ka,
a dara ka,
i təv ŋgar a.
Ŋgat a ge a megemir ka,
i təv ana a za mekiriwe ga petek ana akahər ata ya.
Təv ata ka,
ŋgwal ŋa lele,
dite ar ka,
ŋgulum asa.
Ama ka,
gà mburma tsa na ta ge təv ata ya.
Kamala megweɗe ya:
Ta ge təv ata ika gər ahəɗ ɓav tsa asa mbaŋa.
12 *Akahər ana Kiristi a da a təv ata tsəɗaŋŋa ŋana,
Mbulum mandza ŋa iɗəm a ka,
a da aɗəm sik ilik pəra,
tsam ka,
aka ndəv.
I təv ana a de aɗəm a ya ka,
aka tə̀f dər məmbəz gà vugul nda biy gà mbuluv sla tsa.
Ama a vəl ka,
məmbəz ba ŋgar ŋa ivaɗ na avukw ŋa ya.
Kamala taŋa ya,
nda məmbəz ŋgar ata ka,
a mburuɗ dərra kwa i bakal a aà biybiy.
13 Akahər ata ka,
ta batsawa gà vugul,
nda gà mbuluv sla gà sla,
tə tə̀fawa məmbəz ŋa,
ta gwetseke a aà gà mburma ana gà manəsa ŋa ika miɗ Mbulum a.
Ama ka,
ta kə̀ɗawa dəm sla,
ta weniŋa,
dite tì ndè a bitekwe ŋana aà gà mburma ata gà manəsa ŋa ya mbaŋa asa.
Ta geye gà dukw ata tserdze ya ka,
dite gà mburma ata ti ne gà məbara ŋa nda təv məpala ahəm tar.
14 Ama na məmbəz gà dukw ata aka sle aà məbara tar kamala taŋa ya ka,
məmbəz Kiristi à zè a taŋa fit kweleŋ nda ndzəɗa.
Ŋgat ana aka ge bakal duwa ilik tsidze ya,
a vəl ba ŋgar a Mbulum nda ndzəɗa Mezite Mesife Mbulum ana a ndze a aà biybiy a.
Məmbəz ŋgar ata ka,
a bere a bakal i gəzləŋ kwa ya lele,
na dite ki gekwe a dukw ana a dzeye a à kwa asa tsiye.
Ama ki gekwe a ka,
megemir Mbulum ana ŋgat mala məvəla mesife a mburma ya ivaɗ.
*Kiristi a ɗif à masəra ba gà Mbulum ana nda mburma
ta gəs ba awiya ŋa ya
15 Aɗaba taŋa,
Kiristi ka,
wele ana mandza ŋa ika magər gà Mbulum nda gà mburma,
a sər ba à tar,
a ɗif a tar à masəra ba awiya ŋana ta gis a ba ika magər tar a.
Kamala taŋa ya,
gà mburma ana Mbulum a pala tar,
ti ne gà biy ŋgar a ka,
ta ŋget a dukw ŋgwal ŋa ata a tsik a tar i sida ya,
a gwa,
i ta vile a ter a aà biybiy a ya.
Dukw ata a ge a ba kataya ka,
aɗaba Yesuw Kiristi ana a mət a.
Məməta ŋgar ata a mət a ka,
a mburuɗ dərra mburma i bakal tar ana ta gewa akahər ata piŋŋe,
i təv ana tar riŋ i masəra ba tar ana miviye ŋa ata,
Mbulum a gəs ba nda gà tar a.
16 Masəra ba gà Mbulum ana tə sər ba nda mburma ya ka,
a ndzikiɗ ba bazlam wele ana à mite a ka,
a tsik a aba dukw ana tì dzeyekwe a ya.
Kinehe kà sərakwa ndzer,
na wura aka wetse aba wakita ya,
aka gwa ka:
«Na Yàa mət ka,
ki ti dzèywim be a gà dukw gà aaha» ka,
say ŋgat ŋa à mite a dzekwiŋ kaɗəŋ,
na dite a ge a ba kamala ana ŋgat a tsik a ya.
17 Aɗaba wele ata a riŋ nda are mba ka,
dukw ana a tsik a ka,
a ge a ŋgulum tsa.
Say i təv ana aka mət a dzekwiŋ kaɗəŋ,
na dite ti dzeyekwe a gà dukw ŋgar ata kuɗa ya.
18 Gà masəra ba ana gà Mbulum ta gəs ba nda mburma ya tekeɗe ka,
kamala taŋa ya mbaŋa.
Ku mege malahalah masəra ba ata gà Mbulum nda mburma tə lah magəsa ba ya tekeɗe,
a ge ba ka,
say nda məbatsa duwa,
məmbəz à dzère a iɗəm a dzekwiŋ mbaŋa.
19 *Akahər ata ka,
Musa a lah meɗife à məpala ahəm Mbulum ana a tsik a tserdze,
ika miɗ gà mburma.
Dite i dəba ŋa ya,
a daha,
a tə̀f məmbəz gà kəla sla nda biy vugul ana ta bats a,
a gaw akaba nda yam,
a ndzək gà slàmbah dukw duwa tə zalar *izup,
magàwà ŋa nda gasgas təmaŋ ana a ndza nduzzwa ya.
A tsilwiɓ dər aɗəm,
dite a daha,
a gwatsaka aka wakita məpala ahəm tar,
nda gà aà gà mburma ata tserdze ya mbaŋa.
20 *I təv ana à gwetseke aà ter a ya ka,
a gwaɗa a tar:
«Məmbəz aaha ka,
a ne kamala lambà ana ki sirwim a dər ka,
masəra ba ana Mbulum aka gəs ba nda gà kurum,
a sasar ki tikwimer a gər lele ya.»
21 *Kamala taŋa ya,
Musa a gwatsakaya à məmbəz ata aà ga ata ta kiriw nda petek a,
dite aka gà dukw ana tserdze,
ta gewa dər megemir,
tə zàmbaɗawa dər à Mbulum a mbaŋa.
22 *Akahər ana gà mburma ti tikewa gər a gà məpala ahəm ata ya ka,
gà dukw ŋgiɗ a riŋ bagwal ŋa ta barawa ka,
nda məmbəz kaɗəŋ.
Aɗaba na məmbəz aka dza a bəɗ tsəka,
vatwa a riŋ tsa na i təv Mbulum,
dite à pìl a à bakal a mburma ya.
Yesuw Kiristi a vəl ba ŋgar ka, aà mibeye dər à kwa
i bakal kwa ya
23 Kà sərakwa,
gà dukw ata tə zàmbaɗawa dər à Mbulum akahər ata ya,
a ne ka,
mendzikiɗe ba dukw ana ndzer ŋa i mbulum a ɗekɗek pəra.
Ta barawa gà dukw ata tserdze ya ka,
nda məmbəz gà dukw ata ta batsawa a Mbulum a.
Ama gà dukw ana ndzer ŋa i mbulum a ka,
məbatsa gà dukw ata ta batsawa ya,
a ge a ŋgulum tsa.
Say ta viler a ka,
dukw ana à zè a taŋa ya,
kamala megweɗe ya:
Yesuw Kiristi ana a vəlar ba ŋgar a.
24 Aɗaba Yesuw Kiristi ka,
aka da a ga ata ta kiriw nda petek a tsa.
Aɗaba ta ge təv ata ka,
mendzikiɗe ba təv ata Mbulum mandza ŋa iɗəm a pəra.
Aɗaba taŋa na kinehe ka,
ŋgat a riŋ mandza ŋa ika miɗ Mbulum,
dite a riŋ a hemer a aɗaba kwa ya.
25 *Batsah mala mandəva kuɗa a Mbulum gà Yahuda a dawa a dzə̀ɓər ga ata tsəɗaŋŋa biy Mbulum a ka,
kəla viye.
A dawa ka,
nda gà məmbəz gənaw i ahər,
tsəka,
nda məmbəz ba ŋgar tsa.
Ama Yesuw Kiristi a vəl ba ŋgar a Mbulum ka,
sik ilik,
tsam ka,
tsuway tsara,
tsəka,
sik diŋ tsa.
26 Na mege kataya tsəka,
ana ka,
a ŋgetewe a mesewere are hinne daga aà gər ana Mbulum a ge gər ahəɗ a.
Ama ka,
kataya tsa,
aɗaba a dara kinehe ka,
sik ilik pəra,
aka mandəvandəv gər ahəɗ aaha kinehe ya.
A vəl ba ŋgar ka,
na dite sifek à pìl a dər à bakal gà mburma ana ta gewa ya,
aà biybiy.
27 *Kamala ana ku mege weke à mite a ka,
sik ilik pəra ya.
Aka mət ka,
dite i dəba ŋa ya,
a de a aka miɗ seriye Mbulum kuɗa ya.
28 *Kamala taŋa ya,
Yesuw Kiristi tekeɗe,
à mət ka,
sik ilik pəra mbaŋa.
A vəl ba ŋgar a Mbulum ka,
na dite a beye a dər à gà mburma hinne i bakal tar a ya.
I dəba ŋa ya ka,
à mère a masula ŋa asa.
A mère a ka,
aà məpəla à tar i bakal tar a asa tsa.
Ama ka,
aà məmbə̀là à gà mburma ŋgar ana tar ihər ta bebe a ŋgat a.