Ibəranikwa 10

1 Məpala ahəm gà Yahuda ka, mendzikiɗe ba ŋgwal dukw ana Mbulum a vile a kwe a, kə̀ ŋgatakwa ihər a kinehe ya ɗekɗek pəra. Məpala ahəm tar ata ka, a sle a aà məvəla a kwa gà dukw ana ndzer ŋa ya tsa. Gà ɓəzla mandəva kuɗa a Mbulum ta batsawar duwa kəla mive kataya. Gà mburma ata tə zazamawa gà məpala ahəm ata ka, ta waya mesirike a təv Mbulum. Ama dukw ata ta vəlawar a ka, a sle a aà mene à tar gà ŋgwal ŋa ika miɗ ŋgar tsa, aɗaba ta màwa aka məvə̀lar dukw ata kəla mive. 2 Na mege ti ne a gà ŋgwal ŋa tsəɗaŋŋa ika miɗ ŋgar sik ilik pəra ka, ana ka, bakal tar a wurawa aà tar i gəzləŋ, dite ta betsewer a duwa asa tsa. 3 Ama tsaatsa, gà dukw ata ta batsawar a ka, na dite bakal tar ana ta gewa ya, mə̀ mà a tarəra a gər a kəla mive ya ivaɗ. 4 Ti ne dər akaba ŋgwal ŋa tsəɗaŋŋa tsəka, aɗaba kà sərakwa, gà məmbəz mbuluv sla nda biy vugul ka, a sle a aà məpəla à tar à bakal tsiye. 5 Aɗaba taŋa, i təv ana Yesuw Kiristi a dere a aka gər ahəɗ a ka, a gwaɗa a Mbulum:

«A sàsak na ta betsek a gà duwa ya, kige tsa

ta vilek a gà dukw ŋgiɗ taf masakəŋa ya asa tsa.

Ama ka, a sàsak ki ne à iye a kamala mburma ya,

na dite ka, i vilek a ba gà ya.

6 Gà dukw ata ta batsawa, dite ta wene a,

ta vilek a ya ka, a tsahən aà kər tsa.

Dite gà dukw ata ta vəlawak

agəra məpala ahəm aà bakal a ka,

a dak a gər tsa asa.

Aɗaba kər kà waya ka,

na ta gis aà kər a ahəm a ivaɗ.

7 Agəra taŋa na i gwaɗak ka: “Iye naha,

Mbulum Tsir gà, i gik a dukw ana a sàsak a.

I ge a ka, kamala ana mewetse ŋa i wakita Mbulum,

ti tsik aà iye ya.”»

8 Kamala taŋa ya, Kiristi a lah megweɗe a Mbulum ka: «A sàsak dukw ana ta betsek a ya, kige tsa ta vilek a duwa ŋgiɗ taf masakəŋa ya tsa. Dite gà dukw ana ta betsek a, ta weniŋa, i dəba ŋa ya ka, ta vilekiŋa, kige tsa gà dukw ana ta vəlawak agəra məpala à bakal tar a ka, a tsahən aà kər ɓav tsa asa mbaŋa.» A tsik kataya ka, ku mege gà mburma ta gewa gà dukw ata tserdze ya kalkal, kamala ana məpala ahəm Musa a tsik a ter a tekeɗe ya. 9 I dəba ŋa ya ka, Kiristi a gwa asa: «Araha, iye naha, Mbulum Tsir gà, i gik a dukw ana a sàsak a.» Kamala taŋa ya, Mbulum a mbete iɗəm à gà dukw ana akahər ata ta batsawar a, dite a mbəɗ aɗəm awiya ŋa avukw ŋa. 10 Aɗaba Yesuw Kiristi ka, aka ge gà dukw ana a sàs a Mbulum a, agəra ana a vəlar ba ŋgar kamala dukw taf ana masakəŋa ya. A vəlar ka, sik ilik pəra, i təv ana a mət a tsara ka, aà biybiy. Kamala taŋa ya na kinehe kà nekwa gà tsəɗaŋŋa ika miɗ Mbulum, kà nekwa gà mburma ŋgar a.

11 Gà ɓəzla mandəva kuɗa a Mbulum gà Yahuda ka, ta gewa meslire tar kəla pat, ta batsawa gà dukw tar ata a Mbulum ndidwe ndidwe kataya. Ama gà dukw ata ka, ti sle aà mibeyera à tar i bakal tar a tsidze. 12 Ama Yesuw Kiristi ka, a vəlar ba ŋgar ka, sik ilik pəra, na a pəl dər à bakal gà mburma aà biybiy a. Dite i dəba ŋa ya ka, a da a ta mendze ba aka tseke ahər mezime Mbulum. 13 I fata kinehe ka, a riŋ tùŋŋa mandza ŋa i bəɗ, a bebe a pat ana Mbulum a ti dze a gà ɓəzla mene are ŋgar tserdze aà huɗ sik ŋgar a. 14 Kamala taŋa ya, Yesuw a vəl ba ŋgar a Mbulum sik ilik pəra. A vəl ka, na dite gà mburma ŋgar ti ne gà tsəɗaŋŋa ika miɗ Mbulum a. Mipele ata a pala tar a ka, a waya na ti sime ika miɗ Mbulum ɓərɓər lele, aà biybiy a asa.

15 Mezite Mesife Mbulum tekeɗe, a riŋ a ɗif a kwe a dər parakka, gà dukw ata ka, ndzer kaɗəŋ. Malahalah ŋa a mà ka, à bazlam Əbay Mbulum, a gwa:

16 «Ŋgat a gwa ka, masəra ba gà ana

mìi ta gis a ba nda gà tar

aka miɗ mba ya ka, araha:

A pat ata na i ti tike a məpala ahəm gà

a gəzləŋ tar a, dite ka,

ta gəs, tə dzala aaka gà gər.

I ge a dər kataya ka, dite i dəba ŋa ya,

ta gis a ahəm gà kuɗa.»

17 I dəba ŋa ya, a mà aaka asa, a gwa:

«Gà bakal tar ata ka,

gwiɗits ti ta mìŋere a a gər a asa tsa, ku mege

gà dukw ana ta gewa ŋgwala tsa tekeɗe ya.»

18 Aɗaba taŋa, na Mbulum aka pəl à bakal a gà mburma kamala taŋa ya ka, gà dukw ŋgiɗ ana ta betser a tserdze ya, ta ge a ŋgulum asa tsa.

Sìrìkikwa ndiɓ a təv Mbulum

19 A kurum gà damər gà, agəra Yesuw ana a mət, a dza à məmbəz ŋgar a ka, kàa ŋgatakwa vatwa aà mede a təv ata tsəɗaŋŋa, Mbulum mandza ŋa iɗəm a. Ar ka, tùwaŋŋà mahə̀ndə̀kà ŋa iɗəm a, wura à hìndìk a kwe aɗəm a asa tsa. 20 Aɗaba Yesuw ka, aka taya iba petek ata ika miɗ kwa ya, aka hə̀ndə̀k a kwa i vatwa ana ki tèkwe a dər a ga ata ya. Taŋa ka, vatwa awiya ŋa ana ki ŋgetekewe a dər mesife ya. Ama petek ata a taya ikaba ya ka, kamala megweɗe ya: Ba ŋgar ana ta kəɗ aà dizl magə̀làwà ŋa ya. 21 *Batsah mala mandəva kuɗa a Mbulum kwa a riŋ, a kesle a gà mburma ana i ga i bəra Mbulum a lele. 22 Aɗaba taŋa, gə̀sakwa Yesuw Kiristi nda gəzləŋ ilik lele. Madzala gà gər kwa ka, ma ge wakit wakit tsa. Dite sìrìkikwa a təv Mbulum ka, ndiɓ nda gəzləŋ ilik mbaŋa. Aɗaba Yesuw aka bara gəzləŋ kwa nda məmbəz ŋgar, dite aka bara kwa nda yam ŋgar ana tsəɗaŋŋa ya asa mbaŋa. 23 Mərakwa aba aà magəsa dukw ana Mbulum a tsik a kwa, kwa ihər ki ɗifekwe a dər a mburma ya, nda gəzləŋ. Madzala gà gər kwa tekeɗe, ma ta ge wakit wakit tsa. Aɗaba dukw ana Mbulum a tsik i sida ya, a gwa, a vile a kwe a ya ka, a vile a ndzer kaɗəŋ, dukw ŋgar, à ses a pàrsa tsidze.

24 Say ki weyekwe a ba lele, ki yehekwe a vatwa ka, aà məmayabaha à arəv ika magər kwa ilik ilik tserdze, na dite mawàyà ba kwa ata ki weyekwe a ba ya ka, mà səkah aka miɗ aka miɗ nda megemir ana ŋgwal ŋa ya mbaŋa. 25 Aɗaba gà asiŋ gà misle ŋgiɗ ka, ŋgwìɗik tàa miyak à mayahaba gər kwa ana kà yahawakwa ba gər a, tə dawara asa tsa. Ama ka, ka ta gwim kamala tar a tsa. Ŋgwal ŋa ka, mayakwabaha à arəv ivaɗ. Dite sakwàn kinehe, kà sərakwa pat ana Yesuw Kiristi BATSAH kwa ŋa à mère a ya ka, aka à mendzera bise.

26 Kinehe ka, kàa sərakwa vatwa ana ndzer a. Aɗaba taŋa, na bəla wura a riŋ ika magər kwa a gewa bakal, dite i huɗ bakal ŋgar ata a ge a ya ka, a sər, a ge a taŋa ka, dukw ana ŋgwala tsiye ka, duwa ŋgiɗ a riŋ na a vile a a Mbulum masakəŋa taf, dite à piler a à bakal ŋgar a ka, a riŋ asa tsa. 27 Wur ana a ge a kamala taŋa ya ka, say ma ge magəɗa kwàrkwàr hinne, aɗaba batsah seriye Mbulum ana a ta ge a ya ka, à gis a ŋgat. Dite batsah akwa ana ŋgarŋgar a ta wene a gà ɓəzla mene are Mbulum a ka, a wene aɗəm a ŋgat mbaŋa asa. 28 Aɗaba kurum kà sərum, na wura a nis a à məpala ahəm Musa, bəla gà mburma sula, kige tsa makər tàa ŋgatar aaka ɗegìrgìr ndzer ka, say ta kiɗ a wele ata a biye daw fit, a ndze a ter a are tsehe tsidze. 29 Na tàa ge à gà mburma nda təv məpala ahəm Musa kataya seyiŋ ana, sakwàn nda wur ana a niw a bazlam Kəla Mbulum a ya? Na wura a niw bazlam ŋgar ata, nda gà bəla a niw a məmbəz ŋgar ana a ɗif dər à masəra ba gà Mbulum nda mburma, a ne tsəɗaŋŋa ivaɗ a, dite ka, bəsənnà à fir ahər a kamala za ya, nda gà bəla a ndeveye a a Mezite Mesife Mbulum ana a ger ŋgwal ŋa ya ka, a ŋget a seriye Mbulum ana mawùràba ŋa ya ndzer kaɗəŋ. 30 Aɗaba kà sərakwa, Mbulum a gwa ka: «Iye na a ta me aɗəm a à bakal a gà mburma ana ta hitse a à gər tar nda təv ga ya. Dite iye asa na i ta pìl aɗəm a à gà na ta ge a dukw ana ŋgwala tsiye ya.» Ama kà sərakwa dukw ana a tsik a ka, a ta ge a ndzer kaɗəŋ. A gwa asa ka: «Iye Mbulum Batsah ŋa ana i ti ses a ikaba seriye gà mburma gà ya ya.» 31 Aɗaba Mbulum ka, mala ndzəɗa, ŋgat ana a riŋ nda gà mesife ya. Na seriye ŋgar aka gəs wura ika miɗ ŋgar ka, waya ba ŋgar a.

32 Ama kinehe ka, dzalum, kà sərum dər à mendze kurum ana piŋŋe, aka ana kà lah mendzwim i təv dzaydzay Mbulum ana ndərzayya, a da a gəzləŋ kurum a ka, mə̀ məts a kurum gər tsa. Akahər ata ka, gà mburma tàa sèwèr a kurum are hinne. Ama ku mege kataya tekeɗe, kàa dum aka miɗ aka miɗ nda ndzəɗa ɓəŋɓəŋ lele. 33 Aka təv ŋgiɗ ka, tàa burwa à kurum ika miɗ gà mburma tserdze, dite tàa ge a kurum matawak hinne asa. Ama a pat ŋgiɗ asa ka, kàa ndzum i təv ilik ŋa nda gà na ti sèwèr a are kamala taŋa ya mbaŋa. 34 Kàa sèwèrwim akaba are nda gà na ta gasa tar a daŋgay, aɗaba Yesuw Kiristi ya hinne. I təv ana gà mburma tə ndzaka aà kurum gà dukw kurum a tifeɗ tifeɗ tekeɗe ka, kàa gəsum gəzləŋ, kàa ŋgayum ba nda gà tar ivaɗ, aɗaba ana kà sərum ka, kàa ŋgatum gà ŋgwal gà dukw ana i təv Mbulum, à zè a gà dukw ata tserdze, wura a sle a aà mekìzele aà kurum a asa tsiye ya. 35 Aɗaba taŋa, arəv ma da aà kurum a tsa, sərum dər ka, na kàa mə̀rum aba kamala taŋa ya ka, Mbulum a ta vile a kurum a dukw maya ba kurum batsah ŋa hinne. 36 Ama kə̀la ka, mə̀rum aba lele, na dite ki gwim a dukw ana a sàs a Mbulum a ya. Na kàa gwim dər kataya ka, ki ta ŋgetwime a dukw ana a tsik i sida ya, a gwa, i ta vile a kurum a ya. 37 Aɗaba taŋa, mewetse ŋa a riŋ i wakita Mbulum ka, a gwa:

«A zehe hinne asa tsa,

na dite wele ana Mbulum a gwa,

a ti dere a ka, aka à mendzera.

A ge a mèhìnèkw tsa, a dere a ka, bise.

38 Ama wele ana a gəs iye nda gəzləŋ,

a ndze a tsəɗaŋŋa ika miɗ gà ya ka,

a ŋget a mesife ana à ndìv a tsa,

a ndze a aà biybiy a.

Na bəla wura ilik aka mà a dəba ka,

i ŋgeye a ba agəra ŋgat asa tsa.»

39 Ama kwa kinehe ka, ka ti nekwa gà mburma ana ta me a a dəba ka, dite ti dzeye a ya tə tsa. Aɗaba kwa ka, gà mburma ana Mbulum a ta mbele à ter a ivaɗ, agəra ana kə̀ gə̀sakwa ŋgat nda gəzləŋ kwa ya.