1 Piyer 2

Mbulum a pala kurum, dite ka nwim gà mburma ŋgar

1 Aɗaba taŋa, miyakum aba à gà bakal ana i gəzləŋ kurum a tserdze. Kà sasum pàrsa asa tsa. Mimbèhè are ma ge i təv kurum tsa. Ki gwim are aka dukw mburma tsa, dite nda gà mezelme bazlam ana ŋgwal ŋa tsiye tserdze, ma ge i təv kurum tsa asa mbaŋa. 2 Nwim ka, kamala gà ɓəza ndirkiz ana ta wa tar kinkin, ta waya masà awah kəla pat a. Kurum tekeɗe ka, wayum bazlam Mbulum ndzer ŋana kəla pat kataya mbaŋa, dite ka, ki gilwim a dər ba, Mbulum a ta mbil a à kurum fit. 3 Kamala taŋa ya kaɗəŋ, aɗaba kurum ka, kàa mə̀ndzərum dukw ŋgwal ŋa ana ti tsik ahər i wakita dimis ka, ta gwa, Əbay Yesuw Kiristi a ta vile a kwa a ya.

4 Ama kinehe ka, dumara a təv ŋgar a. Aɗaba ŋgat a ne ka, kur ana mesife iɗəm, gà mburma ti niw, ta gwa, dukw falày masakəŋa ya. Ama tsaatsa, ŋgat ka, ŋgwal kur ana Mbulum a zla, a za gà dukw tserdze ya ivaɗ. 5 Kinehe kurum tekeɗe ka, dumara, nwim gà kur ata mesife iɗəm, Mbulum à dzik a, à zlèzle a dər ga ŋgar ana Mezite Mesife ŋgar a ndze a iɗəm a. Vəlum vatwa a Yesuw Kiristi a gəzləŋ kurum, dite ka, mə vəl a kurum ndzəɗa, ma ne à kurum gà ɓəzla mandəva kuɗa a Mbulum ana gà tsəɗaŋŋa lele, ta viler a duwa masakəŋa, dite a tsahən aà ŋgat a. 6 Aɗaba mewetse ŋa a riŋ i wakita Mbulum ka, a gwa:

«Tsarakum, i zla ka,

ŋgwal kur ana ndzəɗa ŋa hinne,

i tike a huɗ kwite ana tə zalar Siyuna ya.

Aka kur ata na i zlèzle aaka a ga gà ya.

Wur ana aka gəs nda gəzləŋ ŋgar a ka,

madzala gà gər i təv ŋgar tsa.»

7 Aɗaba kur ata a ne i təv kurum ana kə̀ gəsum nda gəzləŋ kurum a ka, dukw ŋgwal ŋa, a za dər gà dukw tserdze ya. Ama i təv gà mburma ana ta gəs tsiye ka, kataya tsa. Aɗaba a riŋ mewetse ŋa i wakita Mbulum ka, ta gwa:

«Kur ata gà ɓəzla mazlazla ga tə zla,

ti yà iɗəm a dala ya ka,

tsaatsa ŋgwal kur te ibam.

Na a ne madəŋ kur ivaɗ ka, taŋa.»

8 Ta wetse i wakita Mbulum mbaŋa asa ka, ta gwa:

«Kur ata ka, gà mburma ti ndif ahər a sik gup,

tì dìɗ aakiŋa.»

Mendìfè sik ata ka, aɗaba ana ta gəs bazlam Mbulum tsiye. Akahər ata piŋŋe ka, Mbulum a waya a ge dər kataya ka, a gwa: Gà dukw ata ta ge a ba kataya dukw ŋgar.

9 Ama kurum ka, gà gwala Mbulum ana a pala kurum a. Dite kurum gà ɓəzla mandəva kuɗa ŋgar ana ki gwim a meslire a batsah Əbay a. Kurum ka, gà tsəɗaŋŋa, kurum gà mburma ŋgar ana a ndzəkara kurum i luvuŋ a, a da à kurum a təv dzaydzay ŋgar ana a dəv hinne kamala dukw mene aà mburma ya. Dite a pala kurum ka, aà ka nwim gà mburma ana ki tsikwim a dukw ana a ge ŋgwal ŋa, a za gà dukw tserdze ya, a mburma. 10 Piŋŋe ka, kurum gà mburma Mbulum tsa. Ama kinehe ka, kàa nwim gà mburma ŋgar. Piŋŋe asa ka, kà ndzum are tsehe a Mbulum tsa. Ama kinehe ka, kà ndzumar are tsehe, kàa gəsum kuɗa.

Gəsum ahəm aà Mbulum

11 Gà masla gà ana i waya kurum hinne ya, mə̀ məts a kurum gər tsa. Kurum kà nwim ika gər ahəɗ ka, kamala gà slele ya. Aɗaba taŋa, i ge a kurum a kamkam: Gwim metsehe, ka ta vəlum vatwa a gà dukw bakal ana ba kurum a waya aà mege ya asa tsa. Aɗaba medzibe dukw ata ka, a dzeye a à mesife kurum. 12 Mendze kurum ana ki ndzwim a i liwiŋ gà na tə sər Mbulum tsiye ka, bakal ma ge iɗəm tsa, ndzum lele. Aɗaba ku mege gà na ti tsik aà kurum a dukw ana ŋgwala tsiye tekeɗe ka, ta fə̀r aà mede kurum nda megemir kurum ka, lele asa mbaŋa. Dite bəla Mbulum à hìndìk a ter a dər are, tì zèmbeɗe a dər a pat ana a dere a a təv tar a.

13 Ama kurum gà mburma ana ki zezemwim a Yesuw Kiristi BATSAH kwa ŋa ya ka, hənum à gər kurum a bəɗ a gà Əbay gər ahəɗ. Gəsum ahəm aà batsah Əbay ana a kwere a mburma tserdze ya. 14 Dite gəsum ahəm aà gà na Əbay ata a dza aɗəm tar a mbaŋa asa. A dza aɗəm tar ka, aà meɗìfè à metsehe a gà na ta ge a dukw ana ŋgwala tsiye, dite ka, tə̀ zàmbaɗa aà gà na ta ge a dukw ana ŋgwal ŋa ya mbaŋa asa. 15 Aɗaba a sàs a Mbulum ka, say ki gwim a dukw ana ŋgwal ŋa ya, na dite, bəla gà mburma ana tə̀ sər duwa tsa, ti niw Mbulum a ka, ma handaka a tar aka bazlam. 16 kə̀ ŋgatum mezìwè gər kurum ka, aɗaba Yesuw Kiristi ana a pəl à kurum i bakal a ya. Na kàa ŋgatum mezìwè ger kurum kamala taŋa ya ka, ka ta kàhum bakal a gəzləŋ kurum asa tsa. Ama kə̀ gəsum ahəm aà Mbulum ivaɗ. 17 Zlə̀bum à mburma tserdze, wayum gà asiŋ gà damər kurum ana ti zezem a Yesuw Kiristi ya. Gwim magəɗa a Mbulum kəla pat. Zàmbaɗum à Əbay batsah ŋa ana a kwere a mburma ya mbaŋa.

Zazamum mesewere are Yesuw Kiristi ana ɗa ika gər ahəɗ a

18 A kurum gà ɓele ana ki gwim a megemir i ga i bəra gà ɓəzla ga kurum a, hənum a tar à gər bəɗ lele. Gəsum aà tar ahəm, kà zàmbaɗum à tar, ku mege i təv dukùla ya tekeɗe ya tserdze. Ki hinwime a à gər a bəɗ ka, a gà na ta ge a kurum a ŋgwal na ya ɗekɗek tsa. Ku a gà na ta ge a kurum a ya tekeɗe mbaŋa. 19 Aɗaba taŋa ka, lele na kàa mə̀rum aba a təv Mbulum i huɗ mesewere are ata ti sèwèr a kurum a taf masakəŋa aɗaba ŋgat a. A tsahən aà Mbulum ivaɗ na taŋa ya. 20 Mezlibe kurum ana tì zlibe a à kurum a dze ana, awara, na bəla ta gə̀zl kurum ka, aɗaba bakal kurum a? Ama na bəla ki sèwèrwim a are ka, i təv dukw ana ki gwim ŋgwal ŋa ndzer na məmə̀rà aba ki mirwim a aba a ya ka, a tsahən aà Mbulum ivaɗ. 21 Aɗaba aà medzibe megemir ata na Mbulum a zal a kurum a, na mege kàa gwim dukw ana ŋgwal ŋa ya ya. Aɗaba Yesuw Kiristi nda gər ŋgar tekeɗe ka, aka sèwèr are hinne, agəra kurum mbaŋa. Taŋa ka, a ɗif a kurum a à vatwa mesewere are, dite ka, ki gwim kamala ana ŋgat a ge ya. 22 Ŋgat ka, aka ge bakal duwa ilik tsidze, dite wura aka tsaraka pàrsa duwa i bazlam ŋgar a ilik tsidze asa mbaŋa. 23 Ku mege ti tsik aà ŋgat dukw ana ŋgwal ŋa tsiye tekeɗe ka, aka mà a tar aɗəm à bakal ŋa tsa. Ti sèwèrer are hinne tekeɗe, aka dza aà tar magəɗa nda bazlam ɓav tsa asa. Ama a vəl ba ŋgar a ahər ka, a Mbulum ana ŋgat mala masasa ikaba seriye bakal nda ndzer ŋa ya. 24 Yesuw Kiristi nda gər ŋgar a zla bakal kwa aka ba ŋgar. Tə ndwandway ŋgat aà dizl magə̀làwà ŋa ka, dite ka, bakal ma kwara kwa asa tsa, kamala ana a kwere a gà məməta asa tsiye mbaŋa. Ama i təv mege dukw ana ŋgwal ŋa ya ka, taŋa kwa riŋ ka, nda gà mesife, aɗaba megìzle ana ta gə̀zl ŋgat, ta ger mbəlak a, na a mbəl à kurum a. 25 Piŋŋe ka, kà nwim kamala gà təmaŋ ana tàa dzeye ya. Ama kinehe ka, Mbulum aka màra à kurum a təv mala makəva kurum ana a kesle a gà mesife kurum kəla pat a.