1 Piyer 3

Mendze gà asləka nda məkəs

1 A kurum gà məkəs, hənum à gər a bəɗ a zal kurum. Aɗaba na kàa gwim kataya ka, gà zal kurum ana tàa gəs bazlam Mbulum tsiye ka, bəla ta mbìɗ a à gəzləŋ tar. Ta gis a Mbulum nda gəzləŋ tar mbaŋa, ku mege kàa fàfəlum a tar agəra bazlam Mbulum tsa tekeɗe ya. 2 Aɗaba gà zal kurum tì sèmete a ka, mendze kurum ana ki ndzwim a nda gà tar lele, tsəɗaŋŋa, bakal i təv kurum tsa, ki gwim a magəɗa a Mbulum nda ndzer ŋa ya. 3 Ka ta mətsum ka, aà hala daala ɗekɗek tsa, kamala malamaya gər ŋger ŋgèr ŋger ŋger a, kige tsa malàmbàɗà ba nda zele, nda gà dasa tsìrèslìslsle, kige tsa asa madùwàyà ba nda madzaya akaba gà petek ŋgulàɗə̀ɗɗa ya. 4 Ama ka, ŋgulum gà matsahəna ba kurum mə̀ pàtara ka, i gəzləŋ a ivaɗ. Hənum à gər kurum a bəɗ tiɓìzl, aɗaba medzibe metsehine ata a ne ŋgwal ŋa ika miɗ Mbulum, à nis a tsidze ya. 5 Kamala taŋa ya, gà məkəs gà mburma Mbulum ana akahər ata ya, tar tə làmbaɗa ba tar ka, nda madzala gà gər tar ana i təv Mbulum a. Tar ka, ta hənawa à gər a bəɗ a gà zal tar. 6 Kamala Sara ana a gəs ahəm aà zal ŋgar Abəraham, a zalawar mala ga gà ya. Ama na ki gwim a dukw ana ŋgwal ŋa ya, kàa gwim magəɗa a duwa ilik tsidze ka, ki nwim a kamala gà ɓəza ŋgar a, ku mege kinehe mbaŋa.

7 Kurum gà asləka tekeɗe, ndzum nda gà mə̀kə̀s kurum lele. Kurum kà sərum, ndzəɗa gà məkəs ka, a sle kamala biy kurum a tsa. Zàmbaɗum a tar, aɗaba tar tekeɗe ka, Mbulum a vile a ter a mesife taf masakəŋana, kamala ana a vile a kurum a ya mbaŋa. Gwim kataya, aɗaba duwa ilik ma tə sàs ikaba mahàmà a Mbulum kurum ana ki hemwimer a ya tsa.

Gəsum gəzləŋ i təv mesewere are ya

8 Taŋa, i ndìv a à bazlam aaha nda magwàɗà a kurum tserdze: Ndzum ka, madzala gà gər kurum ma ge ka, ilik tserdze na ika magər kurum a. Ndzayum ba are tsehe, dite ka, wayum ba kurum lele, aɗaba kà nwim ka, nda gà damər na kurum ika vatwa Mbulum a. Zlakum ba ika magər kurum ilik ilik tserdze. Hənum ba à gər a bəɗ lele. 9 Na wura aka ge a kurum dukw ana ŋgwala tsiye ka, ka ta mumar aɗəm à bakal ŋa tsa. Kige tsa bəla wura aka tsik aà kurum dukw ana ŋgwala tsiye ka, ka tə ndavayumar aɗəm ɓav tsa asa mbaŋa. Ŋgulum ki gweɗwimer a ka: Mbulum mi pisak ahəm ivaɗ. Aɗaba akahər ana Mbulum a zal a kurum a ka, aka mbər metsike i sida ya, a gwa: «I ta pise a kurum a ahəm.» 10 Aɗaba ta wetse i wakita Mbulum ka, ta gwa:

«Na wura aka sasar mendze ana ŋgwal ŋa ya,

nda gà bəla a waya maŋgayaba ka,

say a miyek a à metsìkè dukw ana ŋgwal ŋa tsiye,

mà sàs pàrsa aà mburma tsa asa.

11 Mə məsak à dukw bakal fit.

Ma ge ka, dukw ana ŋgwal ŋa ya ivaɗ.

Ma yaha vatwa ana gəzləŋ ŋgar

a ndze a zayya ika miɗ Mbulum a.

12 Aɗaba Mbulum à fir a ka, aà gà na

ta gewa dukw ana ŋgwal ŋa ya.

A riŋ à dze a zləm aà meheme tar ana

ta hemer a ya ka, kəla pat.

Ama gà na ta gewa dukw ana ŋgwal ŋa tsiye ka,

a waya magəsa ahəm tar tsidze.»

13 Na ki mirwim aàba a ka, aà mege dukw ana ŋgwal ŋa ya dze ana, weke na a sle a aà minè a kurum a bakal a? 14 Ku mege tì sèwèr a kurum a are, aɗaba ndzer ana ki gwim a ika miɗ Mbulum a ka, ŋgayum ba hinne ika magər kurum ivaɗ asa. Aɗaba taŋa, ka ta gwim magəɗa a gà mburma ata tì sèwèr a kurum a are ya tsa. Metsehe kurum tekeɗe, mə̀ mbəɗ tsa asa. 15 Ama zàmbaɗum à Yesuw Kiristi i gəzləŋ kurum. Ŋgat ma ne Batsah kurum ŋa. Hadzalum ba kurum kəla pat, na dite ki slwim aà mifefile a ter aaka a, a gà na ta wiz aà kurum a gà bazlam pampam tserdze, ta gweɗe a kurum a: «Aàmala na kà tikwim madzala gà gər ka, a təv Yesuw Kiristi ya?» 16 Ama ki tsikwim a ter a gà bazlam ata ka, nda mandza akaba ahəm lifeɗiɗe lele, tsəka, nda maàga tsa. Gwim dukw ana kà sərum i gəzləŋ kurum ŋgwal ŋa ya kəla pat mbaŋa, dite ku mege ti ndeveye a kurum ŋa, nda gà bəla ti tsik aà kurum a dukw ana ŋgwala tsiye, agəra mendze kurum ana ŋgwal ŋa lele, kə̀ gəsum Yesuw Kiristi nda gəzləŋ kurum a tekeɗe ka, hwarwa a ge a teriŋa. 17 Na a sàs a Mbulum kataya ka, ŋgulum sèwèrwim are, agəra dukw ana ki gwim a ŋgwal ŋa ya, ndəna ki sèwèrwim a are aɗaba dukw ana ki gwim a ŋgwala tsiye ya.

18 Yesuw Kiristi nda gər ŋgar a mət ka, aɗaba bakal kwa. A pəl dər à kwa i bakal a sik ilik pəra, gər melik tsara. Ŋgat ka, mala ndzer ŋa, bakal ŋgar a riŋ tsa. Ama a mət agəra gà mburma ana ta gewa bakal a, dite na à dzik a kwa a təv Mbulum a. Gà mburma ta kəɗ ŋgat. Ama Mezite Mesife Mbulum a mbəl à ŋgat a mesife asa. 19 I dəba ŋa ya, nda ndzəɗa Mezite Mesife Mbulum ata ka, a daha, a tsik bazlam Mbulum a gà mezite mesife ana madzàwàyà ŋa tsambaɗukwɗukw i daŋgay a. 20 Gà mezite ata ka, biy gà na akahər ata tàa gəs Mbulum tsiye. Mbulum aka bàba tar, a gəs gəzləŋ hinne, akahər ana Nuhu a làmbaɗa slə̀làh yam ata ya. Gà mburma ana tə da aɗəm ka, tar ndaw tsa. Tar ka, tsamakər pəra, na Mbulum a mbala à tar i yam ata ya ya. 21 Yam ata a ɗif ka, à mendzikiɗe ba metsìlwìɓè à mburma ana ti tsilwiɓ dər a yam a. Metsìlwìɓè à mburma ata na a mbele a à kurum a i bakal a ya. Ti tsilwiɓ aɗəm à kurum ka, kamala ana ki berwim a dər aba aruwaŋ a tsa. Ama ki wizekwe a aà Mbulum ka, mə bara dərra à kwa bakal i gəzləŋ kwa ya te. Metsìlwìɓè à kwa ata ti tsilwiɓ à kwa a yam, a mbil à kwa a ka, aɗaba ana Yesuw Kiristi a mbəlara i məməta ya ya. 22 Yesuw Kiristi ka, ŋgat aka tsəl a təv Mbulum. A riŋ mandza ŋa ika tseke ahər mezime ŋgar. Ŋgat ka, a kwere a gà gawla Mbulum, nda gà Əbay tar ŋa dze, dite nda gà asiŋ gà dukw ana tserdze ndzəɗa tar a riŋ hinne i mbulum i gər ŋa ya.