Mbulum ma kwara kurum
4
1 Kurum kà sərum,
akahər ata Yesuw Kiristi aka sèwèreba are ka,
hinne.
Aɗaba taŋa,
kurum tekeɗe,
gəsum gəzləŋ i təv mesewere are ya,
kamala ŋgat ana a gəs gəzləŋ,
a sèwèr are ya mbaŋa.
Aɗaba wur ana à sèwèrebe a are a ba ŋgar kataya ya ka,
a ta me a aka bakal asa tsa.
2 Daga aà kinehe ya,
na kurum mandza ŋa ɗa ika gər ahəɗ tə̀ma ka,
ndzum ka,
kamala ana a sàs a Mbulum a,
tsəka,
meeweke ana i ba kurum a,
ma ta kwara kurum asa tsa.
3 Mendze kurum ana ki ndzwim a ya ka,
ka ta mətsum aà mege dukw ana gà na tə sər Mbulum tsa,
ta gewa ya asa tsa,
ide na taŋa ya.
Aɗaba piŋŋe ka,
kurum i bakal məburnun,
nda meeweke,
nda gà masà guzum ndzìrèffe ndzìrèffe,
nda gà məmətsa aà megirive kəla pat,
nda mazàmbàɗà à gà fəla kurum ana a tsahən aà Mbulum tsidze ya.
4 Ama kinehe ka,
mendze kurum a da akaba nda gà na tə sər Mbulum tsiye asa tsa,
aɗaba ana ki ndzwim a a təv ilik ŋa nda gà tar aà mege dukw ata ta geye a ŋgwala tsa pampam asa tsiye.
Ta fir aà kurum a kataya ka,
a ge aà ter a kamala dukw mene aà mburma ya.
Aɗaba taŋa na tì dze a ba aà mendeveye a kurum a.
5 Ama a pat ŋgiɗ ka,
Mbulum a zel a a gà mburma ata,
ti dere a,
ta hitse a aka miɗ ŋgar,
a ge a ter a seriye kuɗa.
Aɗaba aka hadzal ba aà mege seriye a gà mburma ana tar riŋ nda are ya,
nda gà na tàa mata ya mbaŋa.
6 Aɗaba taŋa na Yesuw Kiristi tekeɗe,
aka tsik bazlam ŋgwal ŋana a gà na tàa mbər mimete piŋŋe ya mbaŋa.
Agəra dukw ana ŋgwal ŋa tsa,
ta ge akahər ana tar aà bəra mba ya ka,
Mbulum a ge a tar seriye məməta,
kamala ana a ge a a gà mburma tserdze kinehe ya.
Ama ka,
a waya məvəla a tar mesife nda mandza zayzay kamala ŋgat ana a riŋ nda gà mesife hiywe ya mbaŋa te.
Ndzəɗa ana Mbulum a vəl a kwa aà mazlàkà dər gà asiŋ
gà misle ŋgiɗ a
7 Ama kinehe ka,
pat mandəvandəv gər ahəɗ aka à mendzera.
Gwim metsehe,
kaslum ba kurum lele,
dite na ki slwim a aà mahàmà a Mbulum a.
8 Kə̀la ka,
duwa a riŋ ilik na a za gà dukw tserdze ya:
Wayum ba kurum nda gəzləŋ ilik kəla pat aka miɗ aka miɗ.
Aɗaba na kàa wayum mburma lele ka,
matsəɓatsəɓ dukw bakal a ge a ika magər kurum asa tsa,
à kèhe a ba fit kweleŋ.
9 Vəlum ahər a gà mburma ana tə dawara a təv kurum a,
nda maŋgayaba lele,
ki geywim aà ba màgwa tsa.
10 Mbulum a pise a kurum a ahəm nda təv gà dukw ŋgiɗ pampam.
A vile a ndzəɗa a mburma aà mege gà dukw ŋgiɗ pampam ilik ilik tserdze,
aà mazlàkà dər gà asiŋ gà mburma ŋgiɗ.
Ku weke ma ge ndaka vatwa ŋa lele.
11 Na wura aka ŋgat ndzəɗa aà metsìkè bazlam ka,
ma tsik kamala na Mbulum a tsiker a ika arah a,
tsəka,
ma zle ahər biy ŋgar pam tsa.
Wele ana à zlèk a mburma ya ibam,
à zlèk a ka,
nda ndzəɗa ana Mbulum a vəlar a mbaŋa.
I huɗ gà dukw ana ki gwim a tserdze ya ka,
mezembeɗe ma ge ka,
biy Mbulum,
aɗaba ana kə̀ gəsum Yesuw Kiristi ya.
Ŋgat ka,
aka ŋgat ndzəɗa ika gər gà duwa ya tserdze aà biybiy,
nda gà vatwa mezlibe ana gà mburma tì zlibe à ŋgat a.
*Amin.
Mesewere are agəra mazazama Yesuw Kiristi
12 A kurum gà damər gà ana i waya kurum hinne ya.
Na bəla Mbulum a dzik a à kurum nda mesewere are ana mawùràba ŋa ya ka,
arəv ma da aà kurum a,
ma ge aà kurum kamala dukw mene aà mburma ya tsa.
A ge a ba kataya dukw ŋgar.
13 Ama ŋgulum ka,
ŋgeywim ba,
aɗaba kàa mbər megìswim mesewere are ana Yesuw Kiristi a sèwèr a.
Dite a pat ana gà mburma tì zlibe a à ŋgat parakka aà are mburma tserdze,
i fata ya ka,
ki ta ŋgeywim a ba hinne.
14 Na bəla gà na ti tsik aà kurum a dukw ana ŋgwala tsiye,
aɗaba ana kurum ihər ki zezemwim a Yesuw Kiristi ya ka,
maŋgayaba ika gər kurum ivaɗ na taŋa ya.
Aɗaba na kàa sèwèrwim are kamala taŋa ya ka,
ndzəɗa Mezite Mesife Mbulum ana tì zlibe a dər a,
a ndze a ika gər kurum.
15 Ama na bəla wura ika magər kurum,
a ge a dukw ana ŋgwala tsiye,
à kiɗ a mburma nda mege akəl,
kige tsa à dze akaba a mburma hèɗèk hèɗèk,
dite i dəba ŋa ya,
à sèwèr a are hinne agəra gà dukw ata ka,
ŋgwala tsa na taŋa ya.
Medzìbe gà dukw ata ka,
ma ge i təv kurum tsa.
16 Ama na wura à sèwèr a are agəra mazazama Yesuw Kiristi ka,
ma ta ge hwarwa tsa.
Ma ge kəkaaha a Mbulum ivaɗ,
aɗaba ana tə zalawar nda zləm Yesuw Kiristi ya.
17 Pat ana Mbulum a ge a seriye a gà mburma ya ka,
aka à mendzera.
A lah mege a ka,
a gà mburma ŋgar dzekwiŋ.
Ama na Mbulum à lèh mege a seriye ka,
biy gà mburma ŋgar dzekwiŋ ana,
dite meme na a ta ge a biy gà mburma ana ti niw bazlam ŋgwal ŋa aaha seyiŋ a?
18 *Ta wetse i wakita Mbulum ka,
ta gwa:
«Na Mbulum a mbele a à gà mburma ŋgar ana
gà ŋgwal ŋa ya ka,
nda mawùràba ŋana,
dite dukùla na a ta ge a ba
nda gà ɓəzla bakal ana
ta gəs ahəm ŋgar tsiye seyiŋ a?»
19 Aɗaba taŋa,
na wura à sèwèr a are aɗaba vatwa ana Mbulum a waya ya ka,
ma ta miyak aba aà mege dukw ana ŋgwal ŋa ya tsa.
Ama ka,
mə vəl gəzləŋ ŋgar a ahər a Mbulum ana a ge kwa ya.
Aɗaba ŋgat ka,
mala slagama ŋgar,
a miyek a à ŋgat tsidze.