SUNWA
ana a da
aka YUHANA ya
Malahalah mifefile ana aka gər wakita aaha ya
1
1 Wakita aaha a fàfəl ka,
aka gər dukw ana Yesuw Kiristi a ɗif dər a gà na ta ge a megemir a Mbulum a.
Aɗaba Mbulum na a gwaɗar,
ɗif a tar dər a,
dite ka,
tə sər aà dukw ana a ta ge a ba bise ya.
Aɗaba taŋa na Yesuw Kiristi a slərra gawla ŋgar a təv Yuhana ana mala meslire ŋgar a,
dite na a ɗifer à gà dukw ata ya.
2 Ama Yuhana ata a mà ka,
à dukw ana a ŋgatar nda are ŋgar a tserdze,
kamala megweɗe ya,
a mà ka,
à bazlam Mbulum nda gà dukw ana Yesuw Kiristi a ɗifer dər à ndzer ŋa ya tserdze.
3 Maŋgayaba ika gər wele ana a sle a aà medzeŋge bazlam aaha a dara i təv Mbulum a.
Dite gà na tə tsaraka bazlam sunwa ata tì dzer a zləm a tekeɗe,
maŋgayaba ika gər tar mbaŋa.
Aɗaba sərum dər,
gà dukw ata tserdze ya ka,
aka à mendze aɗəm.
Yuhana a geha wusa a gà mburma Mbulum ana
i gà kwite ŋgiɗ pampam təsəla ya
4 Iye Yuhana,
i wetseha wakita aaha a gà mayahaba gər gà mburma Mbulum ana i təv pampam təsəla ika ahəɗ Asiya ya.
Dukw ana i wetse ya ka,
araha:
Mbulum mi pise a kurum ahəm,
mə vəl a kurum matasla yam a gəzləŋ zayya lele.
Ŋgat ka,
wele ana mandza ŋa aà bəra aà biybiy,
à gər ana gər ahəɗ a riŋ zukw tsiye.
Ŋgat a riŋ kinehe,
dite ŋgat a riŋ a ta mère a aka gər ahəɗ a mbaŋa asa ya.
Dite gà Mezite Mesife ŋgar ana təsəla gà mehìtsè ŋa ika təv mendze Əbay ŋgar a tekeɗe,
ta pise a kurum ahəm,
ta vəl a kurum matasla yam a gəzləŋ zayya mbaŋa.
5 Dite Yesuw Kiristi ana ŋgat mala sida nda ndzer ŋa ya tekeɗe ibam,
mi pise a kurum ahəm,
mə vəl a kurum matasla yam ata a gəzləŋ mbaŋa asa.
Ŋgat ka,
wele ana a lah məmbə̀lara i məməta ya.
Ŋgat ka,
Əbay ana ika gər gà Əbay gər ahəɗ tserdze ya.
Ŋgat ka,
a waya kwa,
a dzeye à mesife ŋgar aɗaba kwa.
Agəra ana a dza à məmbəz ŋgar ata ya ka,
a beye dər à kwa i ahər bakal kwa ya.
6 *A dza kwa a təv mekwere Əbay ŋgar ana a kwere a ya.
Dite a ne à kwa gà ɓəzla mandəva kuɗa a Mbulum aà mege meslire a Mbulum Tsir ŋgar ata mbaŋa asa.
Gà mburma tserdze tì zlibe a à ŋgat,
ta gweɗe a,
ndzəɗa tserdze a ne ka,
biy ŋgar aà biybiy.
*Amin.
7 **Gwim metsehe,
a dere a ka,
nda hulɓukw a.
Ku weke a ŋgeteriŋa,
ku mege gà na ta geyer suwal a tekeɗe ya.
Gà slàla pampam ika gər ahəɗ tserdze,
ti tiweye aàba a aɗaba ŋgat.
A ta ge a ba ka,
kamala taŋa ya kaɗəŋ ndzer.
Amin.
8 Mbulum BATSAH kwa ŋana ŋgat Əbay ika gər gà duwa tserdze ya,
a gwa ka:
«Iye na malahalah ŋa ika gər gà duwa tserdze ya,
dite iye asa na i ti ndìv a à gà duwa tserdze ya mbaŋa asa.»
Ŋgat ka,
wele ana mandza ŋa ɗa aà bəra aà biybiy,
à gər ana gər ahəɗ a riŋ zukw tsiye.
Ŋgat a riŋ kinehe,
dite ŋgat a ta mère a aka gər ahəɗ a asa mbaŋa.
Yesuw Kiristi a pàt à ba a Yuhana
9 Iye Yuhana,
damər kurum na a wetse a kurumaha wakita aaha ya.
Iye nda gà kurum ka,
kwa mandza ŋa i təv ilik ŋa nda gà Yesuw Kiristi.
Aɗaba taŋa,
iye kinehe ka,
i sèwèr a are kamala kurum a mbaŋa.
Iye riŋ ihər i bès a gəzləŋ mesewere are ata nda gà kurum,
na dite ki ndzekwe a i *mekwere Mbulum ana a kwere a ya,
nda gà kurum tserdze asa mbaŋa ya.
Iye ka,
ta gəs iye,
tə da à iye aka ahəɗ ana malàwàrà ŋa nda yam,
tə zalar Patmus a.
Megìse ana ta gəs iye ya ka,
agəra ana i tsikewa bazlam Mbulum parakka,
i gwaɗawa ka:
«Yesuw na a ɗif a kwa à vatwa ndzer ŋana ya.»
10 A pat duwa ka,
Mezite Mesife Mbulum a dara aka gər gà ya.
A pat ata ka,
pat mazlə̀bà à BATSAH kwa ŋa.
I fata ya ka,
i tsarakara mifefile ŋa a ɗera i dəba gà ya.
A ɗe ka,
ŋgarra lele,
kamala məvata mezleliŋ ana ta vèt a ya,
nda ndzəɗa hinne.
11 A gweɗiŋ:
«Dukw ana ki ŋgeter a ya ka,
wetse aka wakita.
Kàa wetse aba ya ka,
ka sləraha a gà mayahaba gər gà mburma Mbulum ana i gà kwite ŋgiɗ pampam təsəla ya,
a gà Efesiya ya,
ndəna i Samirna ya,
nda gà na i Pergamus a,
dite nda gà na i Tiyatira ya,
nda gà i *Sardis a,
nda gà i Filadelfiya ya,
dite nda gà na i Lawdikiya ya tserdze mbaŋa.»
12 I tsaraka kataya tsara ka,
i mbəɗ à ba ndàra a dəba.
I gwa ka,
i fìrehe a aà wele ana a fèfiliŋera ya.
Mimbìɗe ata i mbəɗ à ba ya ka,
i ŋgataha a gà dukw duwa a riŋ təsəla,
məvàɗà ŋa nda gura ana tsakala ŋa hinne,
à sìkim a ba tsa,
gà akwa ikəka pampam ndwatsndwatsutstswa ya.
13 *I magər gà dukw ata ka,
i ŋgataha a duwa a riŋ iɗəm mehìtsè ŋa dzèŋŋe kalkal kamala mburma ya.
Petek ikəka zubul ŋa tàs a bəɗ aka dəba sik.
Dite madànà ba ŋa ə̀ŋgəts i gəzləŋ a nda slarapa duwa məvàɗà ŋa nda gura ana tsakala ŋa à sìkim a ba tsiye mbaŋa.
14 Ambəz gər ŋgar ka,
a ndza herrè kamala slewize ya.
Are ŋgar tekeɗe ka,
a dəv kamala akwa ya.
15 *Sik ŋgar ka,
a dəv ndizze kamala ndzemde ana ti tike a akwa ya.
Mifefile ŋgar ka,
a ɗe hinne kamala meɗe mazaw ana à dze a a bəɗ dzuruvva ika madzundzuruv a.
16 Gà mawusawus təsəla magàsà ŋa i ahər mezime ŋgar.
Dite masalama ana a zəm hapəpəpa,
matasla ŋa tseke sula ya,
a dere a ka,
i bazlam ŋgar a.
Yam are ŋgar ka,
a dəv twiytwiy kamala pat ana à div a nda magər pat a.
17 Aləka i ŋgatar kataya ka,
tazl i dəɗ aà mbulum a,
aka miɗ ŋgar a fata,
kamala ana iye məməta ŋa ya.
I dəba ŋa ya ka,
a daha,
a tike aka iye ahər mezime ŋgar,
dite a gweɗiŋ:
«Magəɗa ma gik tsa.
Iye na malahalah ŋa ika gər gà duwa tserdze ya.
Dite iye asa na i ti ndìv a à gà duwa tserdze ya asa mbaŋa.
18 Iye ka,
wur ana a ndze a aà bəra nda gà mesife ya.
Ama ka,
Yàa mət,
i dəba ŋa ya ka,
Yàa mbəlara i məməta ya asa.
I ndze a aà bəra nda mesife ka,
aà biybiy.
Iye ka,
ndzəɗa ŋa ika gər məməta,
nda gà ika gər təv mendze gà məməta ana tar mandza ŋa iɗəm a asa mbaŋa.
19 Aɗaba taŋa,
dukw ana ki ŋgeter a kinehe ya ka,
wetse aba ya.
Malahalah ŋa ka,
dukw ana a ge ba kinehe ya,
dite i dəba ŋa ya,
dukw ana a ta ge a ba aka miɗ mba ya.
20 Ama gà mawusawus a təsəla ŋa aaha kə̀ ŋgatar i ahər mezime gà ya,
dite gà lalampa ana təsəla,
akwa iɗəm məvàɗà ŋa nda gura ana tsakala ŋa hinne ya ka,
i ɗifek a à ndzer ŋana aka gər gà dukw ata.
Aɗaba gà mawusawus ata təsəla ya,
kamala megweɗe ya ka,
gà gawla Mbulum ana a dza tar aka gà mayahaba gər gà mburma Mbulum ata təsəla ya.
Dite gà məvàɗà gà lalampa ata təsəla ya tekeɗe,
kamala megweɗe ya ka,
gà mayahaba gər gà mburma Mbulum ata təsəla ya mbaŋa asa.»