Sunwa Yuhana 2

Bazlam ana Yesuw a tsikeha a gà mburma Mbulum ana

i kwite Efesiya ya

1 Wele ata a gweɗiŋ asa:

«Wetseha bazlam aaha a gawla Mbulum ana i kwite Efesiya,

a kesle a gà mburma Mbulum a.

Ki wetse a ka,

bazlam aaha:

Bazlam ŋa na a tsik ka,

wele ana gà mawusawus ata təsəla magəsa ŋa i ahər ŋgar a,

dite ŋgat ka,

wele ana a riŋ à sìweye a ika magər gà dukw ata təsəla,

məvàɗà ŋa nda gura ana tsakala ŋa hinne,

gà akwa ikəka ndwatsndwatsutstswa ya.

2 Gwaɗar ka:

I sər megemir kurum ana ki gwim a ya tserdze.

I sər ka,

kàa mə̀rum aba aà megemir gà ka,

hinne,

dite kàa gəsum gəzləŋ i mesewere are kurum ana kà sèwèrwim a mbaŋa asa.

I sər asa ka,

kàa gəsum aàba gà na ta ge a dukw ana ŋgwala tsiye,

aà mendze ika magər kurum tsidze.

Gà mburma ana ta gwaɗawa,

waytsa mə̀r ka,

gà ɓəzla meslire Mbulum a ka,

kà dzikwim à tar,

ka sərum dər ka,

tar gà ɓəzla pàrsa taf masakəŋa.

3 Kurum riŋ ihər ki mirwim a aba a hinne,

ku mege kurum riŋ ihər ki sèwèrwim a are aɗaba iye tekeɗe ka,

kàa yum ba tsidze.

4 Ama kəla ka,

duwa a riŋ ilik ika magər kurum na i samata ka,

ŋgwala tsiye.

Dukuməŋa ka,

aɗaba ana kà wayum iye kamala ana kà lah mawayum iye akahər ata piŋŋe ya asa tsiye.

5 Dzalum gà gər ka,

aka mede kurum ana akahər ata piŋŋe ya.

Ki dzelwim a ka,

aɗaba la na mì dəɗ ika vatwa ya.

Ama kinehe ka,

mbəɗum à madzala gà gər kurum,

dite kà mùm aka megemir ana ŋgwal ŋa kà lah megwim akahər ata piŋŋe ya asa.

Na ki mbiɗwim a à madzala gà gər kurum tsəka,

i dere a a təv kurum a,

i zle a aà kurum məvəɗa dukw ata akwa ikəka ndwatsndwatsutstswa ya.

6 Ama dukw ana ki gwim a ŋgwal ŋa,

i zlibe a dər à kurum a ka,

aɗaba ana kurum riŋ ihər ki nwim a are a dukw ana gà Nikulas ta ge a ŋgwala tsa,

kamala ana iye tekeɗe ka,

i ner are mbaŋa ya.

7 Na wura a riŋ gər ŋgar aka ge aà metsereke ka,

mà dza zləm a dukw ana Mezite Mesife Mbulum a tsik a a gà mayaha ba gər gà mburma Mbulum a lele.

Gà na tàa mba aà dukw bakal gər ahəɗ a ka,

i ti dzèye a ter a mawà dizl ɗaf ana madzàvà ŋa i guvah Mbulum,

a vile a mesife a mburma ya,

ti zimiŋa.»

Bazlam ana Yesuw a tsikeha a gà mburma Mbulum ana

i kwite Samirna ya

8 Wele ata a gweɗiŋ asa:

«Wetse bazlam aaha a gawla Mbulum ana i kwite Samirna,

a kesle a gà mburma Mbulum a.

Ki wetse a ka,

bazlam aaha:

Bazlam ŋa na a tsik ka,

wele ana malahalah ŋa ika gər gà duwa tserdze ya,

dite ŋgat na à ndìv a à gà dukw ata tserdze ya mbaŋa asa.

Wele ata ka,

aka mət,

ama aka mbəlara i məməta ya asa.

9 I sər mesewere are kurum ana tì sèwèr a kurum a ya.

Taŋa kurum ka,

gà ɓəzla matawak asa.

Ama i təv gà ka,

kurum gà ɓəzla limana ivaɗ.

Dite gà dukw ana ti tsik aà kurum ŋgwala tsiye tekeɗe,

i sər mbaŋa.

Na a tsikewa gà dukw ata kamala taŋa ya ka,

gà na ta gwaɗawa,

làŋa mə̀r ka,

gà Yahuda ya.

Ama tsaatsa,

tar ka,

ti zezem a dukw gà Yahuda nda ndzer ŋa tsa.

Tar ka,

gà ɓəzla mazazama Əbay sitene.

10 Taŋa damər mesewere are kurum aaha ki sèwèrwim a kinehe ya,

à sìkèh a aka gər kurum a ka,

aka à mendze aɗəm.

Ama kəla ka,

ki gwim magəɗa tsa.

Sərum dər ka,

Əbay sitene a ta gese a gà misle ŋgiɗ ika magər kurum a,

a daŋgay bise.

A dzik a à kurum,

ki ŋgetwime a mesewere are i huɗ mehinne kurwa ya.

Bàsumaraha,

na ku mege ta bets a kurum tekeɗe ya.

Na kàa mə̀rum aba kamala taŋa ya ka,

i ti dzèye a kurum a gà dukw mayaba kurum,

kamala megweɗe ya ka,

mesife ana à ndìv a tsa aà biybiy a.

11 Na wura a riŋ gər ŋgar aka ge aà metsereke ka,

mà dza zləm a dukw ana Mezite Mesife Mbulum a tsik a a gà mayahaba gər gà mburma Mbulum a lele.

Gà na tàa mə̀r aba i mesewere are ya,

ku mege ta bats tar tekeɗe ka,

mesife tar a dzeye a tsidze.»

Bazlam ana Yesuw a tsikeha a gà mburma Mbulum ana

i kwite Pergamus a

12 Wele ata a gweɗiŋ asa:

«Wetseha bazlam aaha a gawla Mbulum ana i kwite Pergamus,

a kesle a gà mburma Mbulum a.

Ki wetse a ka,

bazlam aaha:

Bazlam ŋa,

na a tsik ka,

wele ana masalama ŋgar a riŋ matasla ŋa hapəpəpa,

a zəm tseke sula ya.

13 I sər təv ana kurum mandza ŋa iɗəm a.

Təv ata ka,

i mekwere Əbay sitene ana a kwere a ya.

Ama kəla ka,

kàa miyakum à iye tsa,

kàa dum aka miɗ nda megìse kurum ana kə̀ gəsum iye nda gəzləŋ kurum a,

ku mege i təv ana ta kəɗ aà kurum Antipas,

wele ana mburma gà ndzer,

a ɗif à zləm gà tekeɗe ya.

Ta kəɗ ŋgat ka,

ika magər kurum a,

i təv ana Əbay sitene mandza ŋa iɗəm a.

14 ^*Ama kəla ka,

duwa a riŋ ika magər kurum,

na i samata ka,

ŋgwala tsiye.

Aɗaba gà asiŋ gà mburma ŋgiɗ ika magər kurum,

ti zezem a ka,

dukw Balaam ana a dzeŋge a mburma akahər ata ya.

Ŋgat ka,

a ɗif à duwa a Balak,

dite ka,

meme na a bene a gà mburma Isərayel a bakal a.

Dukw ana ta bana ahər tar a ka,

ta papəɗ slu ana tə tàwàl dər fəla ya,

nda mege mezelme nda təv muva mbaŋa asa.

15 Gà misle ŋgiɗ a riŋ ika magər kurum ka,

ta gewa kamala taŋa ya mbaŋa.

Tar ti zezem a ka,

dukw ana gà mburma gà Nikulas ti dzeŋge a ya.

16 Mbəɗum à madzala gà gər kurum,

tsəka,

i dere a a təv kurum a nda gà masalama ata a dere a i bazlam gà ya ya.

I ge a dər guvəl aà gà mburma kurum ata.

17 Na wura a riŋ gər ŋgar aka ge aà metsereke ka,

mà dza zləm a dukw ana Mezite Mesife Mbulum a tsik a a gà mayahaba gər gà mburma Mbulum a lele.

Gà na tàa mba aà dukw bakal a ka,

i ta vile a ter a ɗaf ata makàhà ŋa i mbulum,

tə zalar *mana ya.

I ti dzèye a ter a kur ana herrè ŋa ya mbaŋa.

Ika kur ata ka,

zləm awiya ŋa mewetse ŋa ikəka.

Ama zləm ata ka,

wura a sər tsa,

say wele ana aka ŋgat a.»

Bazlam ana Yesuw a tsikeha a gà mburma Mbulum ana

i kwite Tiyatira ya

18 Wele ata a gweɗiŋ asa:

«Wetseha bazlam aaha a gawla Mbulum ana i kwite Tiyatira,

a kesle a gà mburma Mbulum a.

Ki wetse a ka,

bazlam aaha:

Bazlam ŋa,

na a tsik ka,

Kəla Mbulum,

wele ana are ŋgar a dəv kamala akwa ya,

dite ŋgat ka,

wele ana sik ŋgar ndizze kamala ndzemde ana ti tike a akwa ya asa mbaŋa.

19 I sər dukw ana kurum ihər ki gwim a ya.

I sər ka,

kurum riŋ ihər ki weywim a ba ika magər kurum,

ki dwim a dər aka miɗ aka miɗ nda megìse kurum ana kə̀ gəsum iye nda gəzləŋ a,

dite kurum ihər ki giswim a gəzləŋ i təv gà duwa ya tserdze mbaŋa.

I sər meme na kurum ihər ki zlèkeywim a ba ika magər kurum,

dite meme na ki sìkèhwim a à megemir kurum ana ŋgwal ŋa ya asa mbaŋa.

20 ^*Ama kəla ka,

duwa a riŋ ilik ika magər kurum ana a tsahən aà iye tsiye.

Dukuməŋa ka,

aɗaba ana kà vəlum vatwa a məkəs aka tə zalar Izebel a,

aà mandza ika magər kurum a.

Ŋgat ka,

a gwa,

waytsa iye ka,

mala məmà à bazlam Mbulum,

tsaatsa taŋa ka,

a bene a dər gà mburma gà ana ta giŋ a meslire ya.

Dukw ana a dzeŋgewa a tar a ka,

mege mezelme nda təv muva nda məpapəɗa slu ana tə tàwàlawa dər fəla ya.

21 Ama ka,

Yàa vəlar vatwa zaakwa,

na à mbìɗ a à madzala gà gər ŋgar zləmana ya.

Ama a sasar tsa,

a de a aka miɗ ka,

nda mege mezelme ŋgar ata hiywe pəra.

22 Aɗaba taŋa,

i tike ahər a mesewere are hinne ika təv mehinne ŋgar.

Dite gà na ta gewa akaba muva ata nda gà ŋgat tserdze ya tekeɗe,

ti ti sèwèr a are hinne mbaŋa.

Ti ndziŋ a are tsehe tsidze,

say na bəla tàa mbəɗ à madzala gà gər tar,

tàa miyak à mege dukw bakal tar ata ya dzekwiŋ,

23 tsəka,

i ta bets a gà ɓəza ŋgar mbaŋa,

na dite gà mayahaba gər gà mburma Mbulum tserdze ti sir a dər ka,

iye na i sər dukw ana gà mburma tə dzala i gər tar,

nda gà dukw ana a tsahən aà tar a ya.

Kurum tserdze ka,

i ti dzèye a kurum a gà dukw mayaba kurum,

ku weke kalkal nda megemir ŋgar ana a ge ya.

24 Ama kurum gà asiŋ ana i Tiyatira ya,

kurum ka,

kàa zazamum guma məkəs ata tə tsa.

Kurum ka,

kà sinikwim à dukw ata ta gwa ahər,

makàhà ŋa i huɗ ŋa ka,

biy Əbay sitene ya tsa.

Aɗaba taŋa,

duwa ŋgiɗ a riŋ na aà metsike a kurum,

dite ki gwim a ya ka,

a riŋ asa tsa,

say dukw ata pəra.

25 Gəsum dukw ana ŋgwal ŋa,

kà sinikwim dər ba ya,

nda ndzəɗa ɓəŋɓəŋ lele,

haa a pat ana i ta mère a ya.

26 Gà na ta mbè a aà dukw bakal,

dite ta ge a dukw ana i waya ya,

haa a pat mandəvandəv ŋa ya ka,

i ta vile a ter a ndzəɗa aka gər gà slàla gà mburma tserdze.

27 Ndzəɗa ata i ta vile a ter a ya ka,

kalkal kamala ndzəɗa Tsir gà ana a viliŋ ahər a mbaŋa.

Ti ti kwere a mburma ka,

nda ndzer ŋa nda ndzəɗa.

Ta bets a iɗəm gà mburma ana gà ŋgwala tsiye,

kamala wur ana a bets a magùzlaŋgur gà mesigire ana huluɓ huluɓ a.

28 Ama ndzəɗa tar ata,

ti sir a dər ka,

aà *mawusawus madə̀và mbulum ana i vile a ter a mbaŋa ya.

29 Na wura a riŋ gər ŋgar aka ge aà metsereke ya ka,

mà dza zləm a dukw ana Mezite Mesife Mbulum a riŋ ihər a tsik a a gà mayahaba gər gà mburma Mbulum a lele.»