Sunwa Yuhana 3

Bazlam ana Yesuw a tsikeha a gà mburma Mbulum ana

i kwite *Sardis a

1 Wele ata a gweɗiŋ asa:

«Wetseha bazlam aaha a gawla Mbulum ana i kwite Sardis,

a kesle a gà mburma Mbulum a.

Ki wetse a ka,

bazlam aaha:

Na a tsik bazlam ŋa ka,

wele ana gà Mezite Mesife Mbulum təsəla mandza ŋa i təv ŋgar,

dite gà màwùsàwùs təsəla i ahər ŋgar asa mbaŋa ya.

I sər megemir kurum ana kurum ihər ki gwim a ya.

Ta gweɗe a kurum a ka,

waytsa kurum riŋ nda gà mesife kaɗəŋ,

ama tsaatsa pàrsa.

Kurum ka,

gà məməta ŋa ivaɗ.

2 Pìɗekwim,

ka vəlum aba ndzəɗa,

dite na ki ta metwim a kweleŋ tsiye.

Aɗaba Yàa dzik à kurum,

i samata,

mede kurum ika miɗ Mbulum ka,

a de a zukw tsa.

3 ^*Dzalum gà gər ka,

aka bazlam ŋgwal ŋa ana kà tsarakum akahər ata ya.

Megìse kurum ata kə̀ gəsum ɓəŋɓəŋ lele ya ka,

mə̀ məts a kurum gər tsa.

Ama kinehe ka,

mbəɗum à madzala gà gər kurum,

dite kə̀ gəsum lele nda gəzləŋ ilik asa.

Aɗaba taŋa,

na kàa pìɗekwim tsəka,

sərum dər,

i ti dere a a təv kurum a ka,

sèrèh kamala mala akəl a.

Ki sirwim a pat ana i ti dere a a təv kurum a tsa.

4 Ama gà misle ŋgiɗ a riŋ ika magər kurum i Sardis ka,

tàa ge aruwaŋ aà gà petek tar tsidze.

Tar ka,

ti diŋ a gər lele.

Ti ti dzèye akaba a ka,

gà petek ana herrè ŋa ya.

Dite mə̀r nda gà iye ka,

mìi ti sìweye akaba a i təv ilik ŋa.

5 ^*Kamala taŋa ya,

na i ti dzèye a gà petek herrè ŋa aka gà na ta mbè a aà dukw bakal a.

Tar ka,

i mbete a à gà zləm tar ika wakita gà na tàa ŋgat mesife ya tsidze.

I təv ana iye riŋ ika miɗ gà Tsir gà nda gà gawla ŋgar a ka,

i gweɗe a parakka,

gà mburma aaha ka,

gà biy gà.

6 Na wura a riŋ gər ŋgar aka ge aà metsereke ka,

mà dza zləm a dukw ana Mezite Mesife Mbulum a riŋ a tsik a gà mayahaba gər gà mburma Mbulum a lele.»

Bazlam ana Yesuw a tsikeha a gà mburma Mbulum ana

i kwite Filadelfiya ya

7 ^*Wele ata a gweɗiŋ asa:

«Wetseha bazlam aaha a gawla Mbulum ana i Filadelfiya,

a kesle a gà mburma Mbulum a.

Ki wetse a ka,

bazlam aaha:

Na a tsik bazlam ŋa ka,

wele ana tsəɗaŋŋa,

bakal ihər tsa,

dite ŋgat ka,

mala ndzer ŋa asa ya.

Lèkilè Əbay Dawda ka,

i ahər ŋgar.

Na bəla aka hə̀ndə̀k i duwa ya ka,

wura ilik a sle aà mehìndìkè aɗəm a tsidze,

kige tsa,

na bəla aka hə̀ndə̀k aɗəm ka,

wura ilik a sle a aà mehìndìkè iɗəm a tsa asa mbaŋa.

8 I sər megemir kurum ana kurum ihər ki gwim a ya.

Dite i sər asa ka,

ndzəɗa kurum ka,

hinne tsa,

kwizikw pəra.

Ama ku mege kataya tekeɗe,

kàa giswim aà iye ahəm agəra dukw ana i tsik a kurum a.

Kàa miyakum à iye tsidze.

Araha,

iye ka,

Yàa hə̀ndə̀k a kurum i biye hərmaga ya.

Wura ilik a sle a aà mahə̀ndə̀kà ŋa aɗəm asa tsa.

9 Dzwìmiŋ zləm lele.

Araha na dukw ana i ta ge a nda gà mburma ata ti zezem a Əbay sitene ya,

tar ta gwaɗawa,

làŋa mə̀r ka,

gà Yahuda ya,

tsaatsa tar ka,

ti zezem a dukw gà Yahuda ŋa nda ndzer ɓav tsa,

tar ka,

gà ɓəzla pàrsa masakəŋa taf:

Ama i slirehe a tar a təv kurum.

Ti dehe a,

tì zlibe a à kurum nda mandza gurmits a bəɗ aka miɗ kurum,

dite na ti sir a dər ka,

iye riŋ i waya kurum a.

10 Kurum ka,

kàa gəsum aà iye ahəm,

kàa mə̀rum aba i təv gà mesewere are ya,

kamala ana i tsik a kurum a.

Aɗaba taŋa,

i kesle a kurum a pat gà mesewere are ana ti ti dere a ika miɗ mba ya.

Ama ti dere a ka,

aka gər gà mburma ana ika gər ahəɗ a tserdze,

aà medzìkè à tar.

11 Yàa à mimèra ka,

bise.

Gà dukw kurum ana ŋgwal ŋa,

kà sinikwim dər ba ya ka,

gəsum nda ndzəɗa ɓəŋɓəŋ lele,

tsəka,

gà misle ŋgiɗ ti ndzeke a aà kurum gà dukw mayaba kurum a.

12 ^*Gà na tàa mba aà dukw bakal a ka,

i ti ndweŋ a tar kamala mendweŋe ya,

i batsah ga Mbulum gà,

dite ti ndze a i fata ka,

hiywe.

I ta wetse aà ter a zləm Tsir gà Mbulum,

nda zləm kwite ŋgar ŋa mbaŋa asa.

Ama kwite ata ka,

Yeruzalem awiya ŋa ana a slirre a i gər ŋa i təv ŋgar ŋa ya.

Dite i wetse aà ter a zləm gà awiya ŋana mbaŋa.

13 Na wura a riŋ gər ŋgar aka ge aà metsereke ka,

mà dza zləm a dukw ana Mezite Mesife Mbulum a tsik a a gà mayahaba gər gà mburma Mbulum a lele.»

Bazlam ana Yesuw a tsikeha a gà mburma Mbulum ana

i kwite Lawdikiya ya

14 Wele ata a gweɗiŋ asa mbaŋa:

«Wetseha bazlam aaha a gawla Mbulum ana i Lawdikiya,

a kesle a gà mburma Mbulum a.

Ki wetse a ka,

bazlam aaha:

Na a tsik bazlam ŋa ka,

wele ana tə zalar *Amin a,

ŋgat ka,

mala sida Mbulum ana ndzer,

à ses a pàrsa tsidze ya.

Dukw ana Mbulum a ge tserdze ya,

a dara ka,

i təv ŋgar a mbaŋa.

15 I sər dukw ana kurum ihər ki gwim a ya.

Aɗaba i sər,

ki zezemwim a iye ka,

nda gəzləŋ ilik ŋa tsa,

dite kwets kà niwum iye ɓav tsa.

Ana ka,

ŋgulum ki zezemwim a iye nda gəzləŋ ilik,

kige tsa,

ki niwum a iye.

16 Ama kurum ka,

daɗəkɗəkka ika magər ŋa masakəŋa.

Kamala taŋa ya ka,

a sèsiŋ tsa.

Aɗaba taŋa na i tifere a kurum i bazlam gà ya kamala tìzle ya ya.

17 Kurum ki gweɗwim a i gər kurum ka,

waytsa mə̀r ka,

gà Əbay ŋa,

maa ŋgat duwa tserdze,

kuɗa duwa a ge a mə̀r a asa tsa.

Ama kurum ŋa kà sərum aàba tsa.

Kurum ka,

gà ɓəzla mesewere are ivaɗ.

Ti zleŋe a kurum,

kurum ka,

gà matawak hinne,

sagurɗumɗum petek ika kurum tsa,

dite kurum ka,

gà guluf asa mbaŋa.

18 Aɗaba taŋa kinehe ka,

iye ihər i tsik a kurum a dukw ana ki gwim a ya:

Ama ka,

dumara,

ka sakamum gura ana tàa làmbaɗa nda akwa tsəzlzla lele i təv ga ya,

dite ka,

ki nwim a gà Əbay nda ndzer ŋa kuɗa ya.

Dumara,

sakamum gà petek ana herrè ya mbaŋa,

kà dzàyum akaba,

na dite ka,

ki ndzwim a kataya sagurɗumɗum,

hwarwa a ge a kurum a asa tsiye.

Sakamum yàwuf are,

dite ka geywim a gà are kurum asa mbaŋa,

na dite ki ŋgetwime a a vatwa lele asa ya.

19 Iye ka,

gà mburma ana i waya tar a ka,

i kwere akaba a tar,

i ɗif a ter a à metsehe.

Aɗaba taŋa,

mbəɗum à madzala gà gər kurum,

ka zazamum iye nda gəzləŋ kurum ilik.

20 Tsarakum,

iye riŋ mehìtsè ŋa aà guva biye hərmaga,

i lek a a dukw mahə̀ndə̀kà a ga.

Wur ana aka tsaraka mifefile gà,

dite aka hìndìkiŋ i ga ya ka,

i de a a ga a ma ŋgar.

Mìi zim akaba a ɗaf sula məma nda ŋgat tsùrùzl a təv ilik ŋa.

21 Gà na tàa mba aà dukw bakal a ka,

i vile a ter a vatwa,

tə dara,

mìi ti ndze a nda gà iye,

ika təv mendze mekwere gà.

Ar ka,

kamala iye ana i mba aà gà dukw bakal a mbaŋa.

Kinehe ka,

mə̀r riŋ mandza ŋa i təv ilik ŋa nda Tsir gà ika təv mendze mekwere ŋgar ata mbaŋa.

22 Na wura a riŋ gər ŋgar aka ge aà metsereke ka,

mà dza zləm a dukw ana Mezite Mesife Mbulum a tsik a a gà mayahaba gər gà mburma Mbulum a lele.»