Mezlibe ana tì zlibe a à Mbulum i gər ŋa i mbulum a
4
1 I dəba ŋa ya,
i fə̀r aà gəza mbulum ka,
i ŋgataha a biye hərmaga mada a mbulum mahə̀ndə̀kà ŋa iɗəm a tùwaŋŋà.
I tsarakara mifefile wele ata ndeɗiŋa,
a fèfiliŋara,
a ɗe kamala mezleliŋ a asa.
Wele ata a gweɗiŋ ka:
«Tsəlara a gər ŋa a faha ya,
na dite i ɗifek a à dukw ana a ta ge a ba aka miɗ mba ya.»
2 Ama i fata ya tsara ka,
Mezite Mesife Mbulum a dara aka gər gà ya.
I samata ka,
təv mendze Əbay a riŋ i gər ŋa i mbulum,
wura a riŋ mandza ŋa ikəka.
3 Wele ata ka,
a tsahən ndzer.
Yam are ŋgar a dəv ka,
kamala gà ŋgwal gà kur ata tə zal a tar gà *yaspa nda *sardis,
tə də̀vawa twiy twiy twiy a.
Təv mendze Əbay ata ka,
màkə̀làh Mbulum a lawara tits.
A dəv ka,
kamala ŋgwal kur ŋgiɗ ata tə zalar *imiradi ya mbaŋa.
4 Gà təv mendze Əbay ŋgiɗ pampam dzik səla gəra faɗ,
dìndìhtìhhe na ti le a təv mendze ata ya.
I fata ka,
gà bàba gà mburma a riŋ dzik səla gəra faɗ mbaŋa,
tar gà mandzàyà ŋa ikəka.
Gà petek ana ika tar a ka,
tə ndza herrè.
Dite gà felère tar riŋ i gà gər tar məvàɗà ŋa nda gura,
kamala felère Əbay ana a ndze a dər a.
5 Na a dara ika magər təv mendze ata ya ka,
gà mewìtìɗè mbulum nda malaka ŋa ana a ɗewa dèɗìɗìɗè ya.
Ika miɗ təv mendze Əbay ata ka,
gà akwa a riŋ ŋgaŋŋa kamala gà lalampa ya təsəla,
gà məvata ŋa.
Ama gà akwa ata təsəla ya ka,
kamala megweɗe ya,
gà Mezite Mesife Mbulum ana a riŋ təsəla gà mehìtsèyè ŋa ika miɗ Mbulum a.
6 Ika miɗ batsah təv mendze ata ka,
duwa a riŋ kamala duluv a.
A dəv ka,
twiytwiy kamala kwataramà ya,
are a da iɗəm a ndzihndzih lele.
I fata ka,
gà dukuməŋa a riŋ faɗ,
tə lawara təv mendze ata tits aka magər.
Gà dukw ata ka,
tar riŋ nda gà mesife.
Are aà tar ndwatsndwatsutstswa hinne,
nda dəba asa,
ndaka miɗ asa fit dze.
7 Dukw malahalah ŋana ka,
a ndzikiɗ ba azil.
Dite masula ŋana ka,
a ndzikiɗ ba kəla sla ana vugul ŋa ya.
Məmakər ŋana ka,
yam are ŋgar a ndzikiɗ ba kamala mburma ya.
Dite dukw məfaɗ ŋana tekeɗe,
a ndzikiɗ ba ka,
zləra ana a bewa nda gəza mbulum a.
8 Gà dukw ata tserdze ya ka,
gà gwezleviyek aà tar ndilik ndilik asa.
Dite are aà gwezleviyek ata ka,
ndwatsndwatsutstswa,
ku mege nda bəra,
ku mege nda huɗ ŋa tekeɗe ya.
Tar ihər tə làhawa dimis,
ku mege ndaapat,
ku mege ndaavəɗ hiywe pəra.
I huɗ malàhà dimis tar ata tì lèh a ya ka,
ta gwaɗawa:
«Kər Əbay Mbulum ka,
batsah ŋa.
Kər ka,
tsəɗaŋŋa.
Bakal i təv yak tsa.
Gà ɓəzla bakal tekeɗe,
ti ndze a i təv yak tsa asa.
Ndzəɗa yak a riŋ ika gər gà duwa tserdze.
Kər riŋ mandza ŋa aà bəra biybiy,
à gər ana gər ahəɗ a riŋ zukw tsiye.
Kər riŋ kinehe,
dite kər riŋ
ki ta mère a aka gər ahəɗ a mbaŋa asa ya.»
9 Kamala taŋa ya,
gà dukw ata faɗ a,
tə làhawa dimis mazàmbàɗà dər à Mbulum,
wele ana mandza ŋa ika təv mendze Əbay ata,
dite ŋgat wele ana a ndze a ka,
aà biybiy asa ya.
Tì zlibe a dər à ŋgat,
ta ger a kəkaaha.
10 I təv ana tar riŋ ta ge a kamala taŋa ya ka,
gà bàba gà mburma dzik səla gəra faɗ ŋa ata,
tə dza gurmits a bəɗ aka miɗ Mbulum,
wele ana mandza ŋa ika təv mendze Əbay ata ya,
dite ŋgat wele ana a ndze a aà biybiy a asa mbaŋa.
Tì zèmbeɗe a à ŋgat.
Tì dzik a dər gà felère Əbay tar ata i gər a,
tì dze a dər a bəɗ,
aka miɗ ŋgar,
ta gwaɗawar:
11 «Kər ka,
Mbulum,
dite kər Batsah mə̀r ŋa.
Kər na ki ge gà duwa tserdze ya.
A ge ba ka,
aɗaba ana kər kà waya ma ge ba ya.
Aɗaba taŋa na kər ilik ka,
ŋgwal ŋa,
kà sle na mburma tserdze tì zèmbeɗe a à kər,
tì zlibe a à kər nda magəsa aà kər ahəm a.»