Tə zàmbaɗa à wele ana a ne Kəla Təmaŋ Mbulum a
5
1 I dəba ŋa ya ka,
i ŋgataha a wakita i ahər wele ata mandza ŋa ika təv mendze Əbay a.
Ar ka,
məpàɗà ŋa i ahər mezime ŋgar.
Mewetse duwa a riŋ ika wakita ata tseke sula sula.
Ta gasa nda dukw magəsa wakita təv pampam təsəla,
na dite wura à pìl a dər ikaba ya tsiye.
2 I dəba ŋa ya asa ka,
i ŋgataha a gawla Mbulum duwa ndzəɗa ŋa,
a riŋ à fèfil a nda magala ŋgəlakəkka.
A gwa:
«Weke na ŋgwal ŋa ika miɗ Mbulum,
a sle a aà meŋgeheke ihər dukw magəsa wakita aaha ya,
dite à pìl a dər ikaba ya ya?»
3 Ama a fàfəl aba ya ka,
tə ndza ɗikɗik,
tàa ŋgat a wura tsidze.
Ku mege i mbulum i gər ŋa,
ku mege i huɗ biye,
dite ku mege i ŋga tekeɗe ka,
wura a riŋ tsa,
na a sle aà məpala ikaba wakita ata aà mifìrè aɗəm a.
4 I fata ya ka,
i tuwa hinne,
aɗaba ana wura a riŋ ŋgwal ŋa ika miɗ Mbulum na à pìl a ikaba wakita ata ya,
dite à fir aɗəm a ka,
a riŋ tsiye.
5 Ama i fata ya ka,
wura ilik ika magər gà bàba gà mburma ata dzik səla gər faɗ a,
a gweɗiŋ:
«Ka tə tuwa tsa.
Tsaraka kwaŋ,
aɗaba Əbay ana tə zalar azil a,
a dara ka,
i gwala Yuda ya,
dite i hwife Əbay Dawda a asa.
Ŋgat ka,
a mba aà duwa tserdze.
A sle aà meŋgeheke ihər dukw magəsa wakita ata təv pampam təsəla ya,
dite à pìl a ikaba wakita ata ya.»
6 I dəba ŋa ya ka,
i ŋgataha a Kəla Təmaŋ,
a riŋ ika magər ŋa,
ika miɗ təv mendze Əbay ata.
I fata ya ka,
gà bàba gà mburma ata nda gà dukw ata tar nda gà mesife faɗ a,
tə lawara ŋgat tits.
Ama Kəla Təmaŋ ata ka,
kamala ana tàa kəɗ ilik a.
Gà mbukum aà gər ŋgar təsəla,
dite gà are ŋgar tekeɗe,
təsəla mbaŋa.
Gà are ata ka,
gà Mezite Mesife Mbulum ana gà mehìtsè ŋa ika miɗ Mbulum,
a slərawa tar,
ku mege a ŋga,
aka gər ahəɗ tserdze ya.
7 Kəla Təmaŋ ata a da a təv wele ana ŋgat mandza ŋa ika təv mendze Əbay ata ya,
a daha,
a zla ihər wakita ata i ahər mezime ŋgar a.
8 I təv ana a zla ya ka,
gà bàba gà dukw ata faɗ nda gà mesife ya,
dite nda gà bàba gà mburma dzik səla gər faɗ ŋa ata,
tə daha,
tə dzar gurmits a bəɗ aka miɗ ŋgar.
Gà bàba gà mburma ata tserdze ya ka,
tar nda gà gandzavəl i ahər.
Dite gà ŋgwal gà tasà ana məvəɗa ŋa nda gura ya,
aà tar mbaŋa.
Dukw duwa iɗəm,
na tàa wànà ka,
a ze kamala wirdè ya,
a zewa aà Mbulum hwaŋŋa lele.
Dukw ata a ɗif ka,
à meheme gà mburma Mbulum ana ta hemer a ya.
9 Tə lah dimis awiya ŋana.
I huɗ malàhà dimis tar ata tì lèh a ya ka,
ta gwa:
«Kər na ŋgwal ŋa ika miɗ Mbulum,
ka sle aà mazla wakita ata,
dite ki ŋgeheke a ihər dukw ata magàsà ŋa ya.
Aɗaba kər ka,
tàa kəɗ kər kamala
dukw ana ta kəɗ a Mbulum taf masakəŋa ya.
Məmbəz yak ana kà dza dər a ka,
kà mbùrùɗar dərra mburma a Mbulum a.
Ku mege tə dara ika gà ahəɗ ana pampam
ika gər ahəɗ tserdze ya,
gà na slala tar pam,
nda gà təv gà mendze tar pampam,
kige tsa gà ahəm tar tekeɗe,
pampam a.
Kàa ndzəkara tar a,
kàa dzàɗa a Mbulum.
10 Dite kàa dza tar a təv mekwere
Əbay yak ana ki kwere a ya.
Ka ne à tar gà ɓəzla mandəva kuɗa a Mbulum
aà megèr megemir ika miɗ ŋgar mbaŋa asa.
Ti ta kwere a gà mburma ana ika gər ahəɗ a.»
11 I fata ya tsara ka,
i ŋgataha a gà gawla Mbulum hinne,
ti sle dəbuw diŋ lufùw,
a ɗeme a ba tsa.
Tə lawara təv mendze Əbay ata tits,
nda gà bàba gà dukw ata faɗ nda gà mesife iɗəm a,
dite nda gà bàba gà mburma ata mbaŋa.
I tsarakara dimis tar ana tì lèh a ya.
12 I huɗ malàhà dimis tar ata tì lèh a ya ka,
ta wideye a dər ŋgəlakəkka,
ta gwa:
«Kəla Təmaŋ ata ta kəɗ a ka,
a sle aà duwa tserdze.
Dite duwa tserdze ka,
biy ŋgar asa mbaŋa.
Metsehe ŋgar a riŋ,
a za gà duwa fit.
Aɗaba ndzəɗa tserdze ka,
i ahər ŋgar.
Gà mburma tə̀ zlə̀b à ŋgat,
tə̀ zàmbaɗa dər,
ta gwa,
ŋgat ka,
BATSAH kwa ŋa kaɗəŋ.»
13 I dəba ŋa ya asa ka,
i tsarakara gà dukw ana Mbulum a geye tar tserdze ya:
Gà na i gər ŋa i Mbulum a,
nda gà na ika gər ahəɗ a,
dite nda gà na tar i biye,
nda gà i huɗ yam a.
Tar ata tserdze ya,
tar riŋ tì lèh a dimis.
I huɗ malàhà dimis tar ata tə lah a ka,
ta gwa:
«Zàmbaɗakwa à gà wele ana ŋgat
mandza ŋa ika təv mendze Əbay a,
nda wele ana ŋgat kamala Kəla Təmaŋ a.
Zlə̀bakwa à tar.
Aɗaba ndzəɗa tserdze
a dara ka,
i təv tar a.
Ki gekwe a tar kəkaaha aà biybiy.»
14 Dite gà dukw ata faɗ tar nda gà mesife ya,
ta gwa aaka:
«*Amin.»
I dəba ŋa ya,
gà bàba gà mburma ata tə dza gurmits a bəɗ aka miɗ gà na tar mandza ŋa ika təv mendze Əbay ata ya,
tə zàmbaɗa à tar.