Kəla Təmaŋ a ŋgwàhakaya aà gà dukw magàsà wakita ata ya
6
1 Aləka i dəba ŋa ya,
i fə̀r aà Kəla Təmaŋ ata ka,
a daha,
a dza ba aà maŋgwàhàkà ihər dukw magəsa wakita ata Mbulum a gasa dər təv pampam təsəla ya.
A ŋgwàhaka ihər malahalah ŋa ya ilik.
I fata ya ka,
i tsarakara mifefile i təv gà dukw ata faɗ nda gà mesife ya.
Biy ŋgiɗ ilik i magər tar a,
a gwa:
«Nakaya.»
Mifefile ŋgar ata a ɗe ka,
gurumumma,
kamala malaka Mbulum a.
2 *I fə̀r ikaba ya ka,
i ŋgataha a piris duwa a ndza herrè,
wura aka tsəl aaka,
a riŋ nda gà lìkiɗ i ahər ŋgar,
tàa tiker felère Əbay a gər.
Ŋgat na a mba aà duwa tserdze ya.
Aka da a guvəl ka,
à mbè a aà mburma asa mbaŋa.
3 I dəba ŋa ya ka,
Kəla Təmaŋ ata a ŋgwàhaka ihər dukw magəsa wakita masula ŋana ya.
Dite i tsarakara mifefile masula ŋa ika magər gà dukw ata faɗ nda gà mesife ya.
A gwa:
«Nakaya» asa.
4 I fata ya tsara ka,
piris ŋgiɗ a dara iɗəm a.
A ndza nduzzwa kamala məmbəz a.
Wur ana a tsəl aaka ya ka,
tàa vəlar batsah masalama a ahər,
dite ta vəlar vatwa aà mazlàra guvəl aka gər ahəɗ a,
na gà mburma ta bets a ba ya.
5 Aləka i dəba ŋa ya ka,
Kəla Təmaŋ ata a ŋgwàhaka ihər dukw magəsa wakita məmakər ŋana ya asa.
I fata ya ka,
i tsarakara mifefile məmakər ŋa ika magər gà dukw ata faɗ ŋa nda gà mesife ya.
A gwa:
«Nakaya» asa mbaŋa.
I fə̀r ikaba ya ka,
i ŋgataha a piris lìviŋ lìviŋ ŋana.
Wele ana mandza ŋa ikəka ya ka,
a riŋ nda gà dukw melìvè duwa i ahər ŋgar.
6 I tsarakara mifefile ika magər gà dukw ata faɗ ŋa nda gà mesife ya.
A gwa:
«Siŋgwe ana gà ɓəzla megemir ta ŋget a i huɗ miveke ilik a ka,
a sle a duwa tsa.
Tì sìkim a dər ŋgwal daw ka,
agwada ilik pəra.
Kige tsa na bəla tì sìkim a dər màdàgà ka,
a sle a agwada makər ɗekɗek.
Ama biy gà mal nda meɗwìtsè dukw makwàsà ŋana ka,
tsakala ŋa ma ge hiywe kamala ana a ndzawa ya dukw ŋgar.»
7 I dəba ŋa ya ka,
Kəla Təmaŋ ata a ŋgwàhaka ihər dukw magəsa wakita məfaɗ ŋana ya.
Dite i tsarakara mifefile məfaɗ ŋa ika magər gà dukw ata faɗ nda gà mesife ya.
A gwa:
«Nakaya» asa.
8 Aləka i fə̀r ikaba ya ka,
i ŋgataha a piris duwa a ndza kusuh kusuh.
Wele ana a tsəl aaka ya tekeɗe ka,
zləm ŋgar Məməta.
Təv ana aka da aɗəm a ka,
bazlam məməta na a zezem a ŋgat a.
Gà mburma gər ahəɗ tserdze ka,
tàa tarətsa ba ikaba ya təv pampam faɗ.
Gà gwala ŋgiɗ ilik ka,
tàa vəlar vatwa aà məbatsa iɗəm tar a nda gà duwa ŋgiɗ a pampam.
A bets a tar nda masalama.
Gà biy ŋgiɗ ta mete a à may,
kige tsa,
à dukw məməta,
dite gà asiŋ ŋa aaha asa ka,
gà dukw dala ta betseye a tar.
9 I dəba ŋa ya asa ka,
Kəla Təmaŋ ata a ŋgwàhaka ihər dukw magəsa wakita mazləm ŋana ya.
Dite i ŋgataha a gà mezite gà məməta tar a riŋ aà huɗ təv ana ta batsawa aaka duwa a Mbulum a.
Ta batsaya gà mburma ata ka,
aɗaba ana ta gəs bazlam Mbulum lele,
ti tsikewa a mburma ka,
parakka ya.
10 Gà mburma ata ta wideye nda magala ŋgəlakəkka.
I huɗ Mewideye tar ata ya ka,
ta gwa:
«Batsah mə̀r ŋa,
kər ka,
tsəɗaŋŋa.
Dukw ana ki tsik a ya ka,
nda ndzer kaɗəŋ.
Dite ndeɗime na ki gese a gà mburma ana ta batsawa mə̀r ika gər ahəɗ,
ki ge a ter a seriye ya?»
11 I fata ya ka,
tə dzaya aka tar gà petek herrè ŋa tserdze,
ku mege weke.
Dite ta gwaɗa a tar:
«Vavum zaakwa tə̀ma asa.
Aɗaba say ta batsaya gà asiŋ gà damər kurum ana ta ge a megemir a Mbulum a asa dzekwiŋ,
kamala ana ta batsaya kurum a mbaŋa ya.
Aləka i təv ana aka geba fit kamala ana Mbulum a tsik a,
tàa bats tar ka,
seriye ata a ta ge a ba kuɗa.»
12 I dəba ŋa ya,
i fə̀r aà Kəla Təmaŋ ata asa ka,
a ŋgwàhaka ihər dukw magəsa wakita mendilik ŋana ya asa.
A ŋgwàhaka ihər a tsara ka,
gər ahəɗ a ɓazla wakit wakit hinne.
Pat a mbəɗ ba ŋgiɗ kamala petek ana a ndza lìviŋ lìviŋ a.
Dite kiye tekeɗe,
a mbəɗ ba ŋgiɗ,
a ndza nduzzwa kamala məmbəz a asa.
13 Gà mawusawus tə dzawara aà gəza mbulum a ɓə̀ràmə̀mma kamala mandàɓalak guruv ana himbiɗ a dza dərra a bəɗ a mbaŋa.
14 *Gəza mbulum a dzeye fit kweleŋ,
kamala wakita ana ta paɗa akaba ya.
Gà gər kwite nda gà ahəɗ ana malàwàrà ŋa nda yam a tserdze,
ta hitseye aà mbulum,
tə daya i gà təv mendze tar ana tə ndzawawa iɗəm a.
15 *Kamala taŋa ya,
gà mburma tserdze ta kahaya ba.
Tə təz a biye,
nda gà a sləlak aà kwite.
Gà ɓele nda gà na ti ziwe a gər tar a tserdze,
tə təz,
tə daha,
ta kahaya ba.
Ku mege gà Əbay gər ahəɗ nda gà ɓəzla sik tar,
nda gà bàba gà sliwdze,
ku mege gà na limana tar a riŋ hinne ya,
nda gà na ndzəɗa tar a riŋ a tekeɗe,
ta kahaya ba mbaŋa.
16 *Ta gwaɗa a gà gər kwite nda gà gurum:
«Hurukwayum ba aka mə̀r,
kə̀ kahayum mə̀r,
dite na wele ata mandza ŋa ika təv mendze Əbay a,
a ŋget a mə̀r a asa tsa,
nda gà matsəɓatsəɓ Kəla Təmaŋ ata tekeɗe,
a ŋget a mə̀r tsa asa mbaŋa ya.
17 Aɗaba pat ana ti ta gis a gà mburma a seriye ya ka,
aka à mendze aɗəm.
Ama a pat ata ana,
weke na a be a iɗəm a ya?»