Gà mburma gà Isərayel ana Mbulum a geye aà tar lambà ya
7
1 I dəba ŋa ya ka,
i ŋgataha a gà gawla Mbulum faɗ,
tar gà mehìtsèyè ŋa i gà təv ana himbiɗ a dawara iɗəm a təv pampam faɗ a.
Ta pala ahəm a gà himbiɗ ata faɗ a,
dite ka,
ta ge ika gər ahəɗ,
tə ləm aà gà ahəɗ nda yam,
nda gà dizl ɗaf asa tsiye.
2 I fata ya ka,
i ŋgataha a gawla Mbulum ŋgiɗ asa mbaŋa.
A dara ika tseke pat ana a mbəzawara ya,
a riŋ a tsil a aà mbulum.
Na magəsa ŋa i ahər ŋgar ka,
dukw mege lambà aà gà mburma Mbulum,
wele ana nda gà mesife ya.
A zal a gà asiŋ gà gawla Mbulum ŋgiɗ ata,
a gà na Mbulum a vəl a tar ndzəɗa aà menise à gà ahəɗ nda yam a.
A zal a tarəra nda magala ya ŋgəlakəkka.
3 A gwaɗa a tar:
«Ka nəsum à gà ahəɗ nda yam,
nda gà dizl ɗaf zukw tsa.
Say ki gekwe a lambà aà yemere a gà ɓəzla meslire Mbulum kwa dzekwiŋ.»
4 Ama ti tsikiŋ,
ta gweɗiŋ,
gà mburma ndaw na ta ge a ter a lambà ata ya.
Ama tar fit dze ka,
dəbuw dərməka nda dəbuw dzik faɗ gəra faɗ (l44000).
Gà mburma ata tə dara ka,
i gà gwala Isərayel a tserdze.
5-8 Dəbuw kurwa gəra sula,
tə dara i gwala Yuda ya,
dəbuw kurwa gəra sula i gwala Ruben a,
dite gà biy ŋgiɗ asa,
i gwala gà Gad nda Aser a,
nda gà Naftali nda Manasse,
dite Simeyun,
Levi,
Issakar,
Zabulun,
dite gà Yasufa nda Benyamin.
Gà tar ata tserdze ya ka,
dəbuw kurwa gəra sula sula,
lambà Mbulum aà tar.
Ga mburma ana hinne, tə dayara ika magər gà slàla ŋgiɗ ana
pampam tserdze ya
9 I dəba ŋa ya asa,
i ŋgataha a gà mburma ana hinne,
wura a sle a aà maɗàmà ŋa tsiye.
Gà mburma ata tə dara ka,
ika ahəɗ ana pampam ika gər ahəɗ a,
ku mege gà na slàla tar pampam a tserdze,
nda gà təv gà mendze tar pampam,
kige tsa gà ahəm tar ibam,
pampam a.
Tar gà mandzàyà ŋa ka,
ika miɗ təv mendze Əbay Mbulum,
nda gà ika miɗ Kəla Təmaŋ ata mbaŋa.
Gà petek ana ika tar a ka,
herrè.
Ku weke nda gà slàmbah təɓah i ahər ŋgar,
tì zèmbeɗe a dər à tar.
10 Gà tar ata tserdze ya,
ta fàfəl ka,
nda magala ŋgəlakəkka.
I huɗ mifefile tar ata ya ka,
ta gwa:
«Mbulum ana mandza ŋa ika təv mendze Əbay ŋgar a,
nda Kəla Təmaŋ na ta mbala à mə̀r a.»
11 Gà gawla Mbulum tserdze tə lawara təv mendze Əbay ata nda gà bàba ŋa ana ika miɗ Mbulum a,
dite nda gà bàba gà dukw ata faɗ nda gà mesife ya tits.
Tə dza gurmits a bəɗ aka miɗ Mbulum,
ika miɗ təv mendze Əbay ŋgar ata,
tə zàmbaɗa à ŋgat.
12 I huɗ mezembeɗe tar ata ya ka,
ta gwa:
«*Amin.
Ar ka,
kataya kaɗəŋ,
ndzəɗa tserdze ka,
i ahər Mbulum.
Metsehe ŋgar a riŋ a za duwa tserdze.
Ŋgat ka,
ndzəɗa ŋa.
Gekwar kəkaaha,
kà zlə̀bakwa à ŋgat,
zàmbaɗakwa à ŋgat aà biybiy.
Ku weke a gweɗe a,
ŋgat ka,
Batsah ŋa kaɗəŋ.
Amin.»
13 Gà bàba gà mburma ata dzik səla gəra faɗ a,
i ŋgiɗ ilik ika magər tar a,
a gweɗiŋ:
«Kà sər gà mburma aaha nda gà petek herrè ŋa ika tar a ya?
Tə dara ana,
i ŋga ya?»
14 I gwaɗar:
«Awaŋ,
batsah ga ŋa,
kər ivaɗ na a sər tar a.
Iye ka,
i sər tar tsa.»
I dəba ŋa ya,
a gweɗiŋ asa:
«Gà mburma aaha ka,
gà na tì sèwèr a are hinne aka mandəvandəv gər ahəɗ aaha ya.
Ama ka,
tàa bàs gəzləŋ,
tàa miyak à vatwa Mbulum tsidze.
Ta baraya gà petek tar a nda məmbəz Kəla Təmaŋ ata,
na dite ka,
a ndza herrè ya.
15 Aɗaba taŋa na kinehe tar riŋ mandza ŋa ika miɗ təv mendze Əbay Mbulum hiywe ya.
Ku mege ndaapat,
mege ndaavəɗ tekeɗe,
tar riŋ ta ger a meslire i ga ŋgar a.
Əbay ata ŋgat mandza ŋa ika təv mendze ŋgar a na a riŋ a kesle a tar a.
16 May a ta ge a ter a asa tsa.
Dite yam tekeɗe,
a ta bets a tar asa tsa mbaŋa.
Pat a wene a tar tsa,
ku mege dukw ŋgiɗ a wir aà ter a asa tsidze.
17 Aɗaba Kəla Təmaŋ ata ika magər təv mendze Əbay ata ya,
na a ti ne a mala makəva tar,
a ɗif a ter a à vatwa biye yam ana a vile a mesife a mburma ya ya.
Dite Mbulum tekeɗe,
a bere a tuwa yemere ika gà are tar a tserdze asa mbaŋa.»