Kəla Təmaŋ ata a ŋgwàhaka ihər à dukw magəsa wakita
matəsəla ŋana ya kuɗa
8
1 Aləka i dəba ŋa ya ka,
Kəla Təmaŋ ata a zla wakita ata asa,
a ŋgwàhaka ihər dukw magəsa ŋa matəsəla ŋana ya.
I təv ana a ŋgwàhaka dər ihər a ka,
gà dukw ana i gər ŋa i mbulum a tserdze,
tə ndza ɗikɗik,
ta fèfil a asa tsidze,
haa a sle mìnwit dzik makər.
2 I dəba ŋa ya,
i ŋgataha a gà gawla Mbulum ana tar təsəla,
tar gà mandzàyà ŋa ika miɗ Mbulum a.
Tə dzaya a tar gà mezleliŋ təsəla a ahər,
ku weke nda biy ŋgar.
3 Gawla Mbulum a riŋ nda gà tasà malàmbàɗà ŋa nda gura ana tsakala ŋa hinne ya,
i ahər ŋgar.
Tasà ata ka,
ta wanawa aɗəm dukw ana a zewa aà Mbulum hwaŋŋa ya.
Ŋgat ka,
a dara,
a hitse dər aka miɗ a təv ana ta vəlawa aaka duwa a Mbulum a.
Tə dzar aɗəm dukw ana ta wanawa ya hinne,
na dite a wenere a aka təv ata ya.
A wenere a ka,
aka miɗ təv mendze Əbay ŋgar ata.
Ama i təv ana a riŋ ihər a wene a ya ka,
a ge dər akaba nda biy gà mburma ana tserdze ti ne gà biy ŋgar,
ta hamawa a.
4 Hədzək dukw ata a wànà ya,
a dara i ahər gawla Mbulum ata mehìtsè ŋa ika miɗ Mbulum a,
a tsəl aà gəza mbulum,
dite Mbulum a tsaraka meheme gà mburma ŋgar ana ta hemer a ya mbaŋa.
5 Aləka i dəba ŋa ya ka,
gawla Mbulum ata a zla tasà ata a wànà iɗəm duwa a Mbulum a,
a zla akwa ika təv ana ta wanawar aaka duwa ya mbaŋa.
Bùtùkw a nda a tasà ata.
Dite fakw a ya dər akabara aka gər ahəɗ a.
I təv ana a yàra aba ya ka,
malaka mbulum a dza ba aà meɗe hinne,
ŋgùzlàr ŋgùzlàr,
dite mbulum a wìtiɗ wùtəɗ wùtəɗ,
gər ahəɗ a dzadzar hinne mbaŋa asa.
Ta vèt a gà mezleliŋ ndilik
6 I dəba ŋa ya,
gà gawla Mbulum ata təsəla nda gà mezleliŋ aà tar i ahər a,
ta hadzal ba aà mivizleye aɗəm.
7 Tsam ka,
gawla Mbulum malahalah ŋana a vizl a biy ŋgar.
Aləka a vizl aɗəm ka,
gà aləndza nda gà akwa magàwà ŋa aàba nda məmbəz,
tə dzàyawara aka gər ahəɗ a.
I fata ya ka,
gər ahəɗ a tarətsa ba ikaba ya təv pampam makər.
Təv ana dukw ata a dzawa aɗəm a ka,
akwa a wànà iɗəm a fit,
nda gà dizl ɗaf ŋa dze.
Mege kwizir tekeɗe,
aka zeha aɗəm asa tsidze.
8 I dəba ŋa taŋa ya ka,
gawla Mbulum masula ŋana a vizl a mezleliŋ ŋgar.
Aləka a vizl aɗəm kataya ka,
tə zla batsah dukuməŋa a riŋ kamala kwite ya,
akwa a riŋ ihər a wene a ŋgar ŋgar ŋgar.
I fata ya ka,
ti yà dukw ata a batsah duluv.
Tsam ka,
yam ata a tarətsa ba ikaba ya təv pampam makər,
dite təv ana ti yà aɗəm a fata ya tsara ka,
a ne məmbəz.
9 Dite gà dukw ana i huɗ yam biy ŋgiɗ ata ya ka,
ta mataya aɗəm fit.
Gà slə̀làh yam ana ikəka ya tekeɗe,
tə nəsaya mbaŋa.
10 Dite gawla Mbulum məmakər ŋana,
a vizl a mezleliŋ ŋgar.
A vizl aɗəm ka,
batsah mawusawus ana akwa ihər,
a wene a də̀kəɗ də̀kəɗ a,
a dəɗara i mbulum a,
aka gər ahəɗ a.
Gà biye yam nda gà dula tə tarətsa ba ikaba ya,
təv pampam makər.
Təv ana aka dəɗ aɗəm a ka,
a nis a dər fit.
11 Mawusawus ata ka,
zləm ŋgar Ɗìwèkìke.
Yam ana aka dəɗ aɗəm a ka,
a ndze a ɗìwèkìke.
Gà mburma ana tə saya yam ata ya ka,
ta mata hinne,
aɗaba ana a ndza ɗìwèkìke ya.
12 I dəba ŋa ya ka,
gawla Mbulum məfaɗ ŋana a vizl a mezleliŋ ŋgar mbaŋa.
A vizl aɗəm ka,
a lak a gà pat nda kiye,
nda gà mawusawus.
Tar ka,
kamala ana matarətsa ŋa ikaba ya təv makər a.
Dite təv ana tàa lak aɗəm a ka,
a ndze a lìviŋ lìviŋ kamala taŋa ya.
Tar ka,
tə dəv lele asa tsa.
Ku mege ndaapat,
mege ndaavəɗ tekeɗe,
təv dzaydzay matarətsa ŋa ikaba ya təv pampam makər.
Tseke pat ŋgiɗ ilik ka,
a dəv ndaapat asa tsa,
dite tseke kiye ŋgiɗ ilik tekeɗe,
a dəv ndaavəɗ asa tsa mbaŋa.
13 I dəba ŋa ya ka,
i ŋgataha a zləra,
a riŋ ɗevivvè diriŋ a be a nda gəza mbulum.
A fàfəl ŋgəlakəkka.
I huɗ mifefile ŋgar ata ya ka,
a gwa:
«Waya ba kurum a,
waya ba kurum a,
kurum gà mburma ana ika gər ahəɗ a ka,
ki ŋgetwime a mesewere are hinne.
Aɗaba ana gà gawla Mbulum riŋ makər mba,
gà na tàa vizleye a gà mezleliŋ tar zukw tsiye.
Ama na aləka tàa vizleye aɗəm ka,
mesewere are ŋa a dere a ka,
ndeyndey.»