Asta 8

Asta a geye ika gà Yahuda ya

1 A pat ŋa ata ka, əbay Ahaswerus a dza gà limana Haman ana mala mene are gà Yahuda ya, a Asta mandərkwasla məkəs əbay fit. I dəba ŋa ya, Asta a ɗif à Mardukway a əbay tar ka, nda gà gwala. Dite əbay a zala a Mardukway. 2 Əbay a zlara matsərəɗ ŋgar ana i hər a mədər aà Haman a, a vəl a Mardukway, dite asa ka, Asta a dza limana Haman a Mardukway, mege dər megemir.

3 I dəba ŋa ya ka, Asta a gwaɗa a əbay asa, a kal aba a bəɗ aà sik ŋgar, a tuwa, a hamar, aà mazla mesewere are ana Haman gà gwala Agag, a dzala aà medzeye a dər aà gà Yahuda ya, i bəɗ a. 4 Əbay a zikwe zəva gura ŋgar a Asta, tsam ka, a hitse dzeŋ aka miɗ əbay. 5 Asta a gwaɗar: « Əbay gà, na yàa ŋgat medze are tsehe yak a, na kàa waya lele, na mewize gà a dak a gər, na kà waya iye ka, mbete à wakita ana Haman kəla Hammedata ana i gwala Agag a, wetse aà məbatsa gà Yahuda ana mandzaŋa, ika gà bàba gà ahəɗ ana tserdze i huɗ mekwere yak a zləmana ya, nda mewetse wakita ŋgiɗ. 6 Meme na i sle a aà mibeserehaye, na iye riŋ ihər i ŋgete a a batsah mesewere are aaha a diɗe a aka gà gwala gà ya? Meme na i sle a aà mibeserehaye, na iye riŋ ihər i ŋgete a gà gwala gà ana ti dzeye a ya? »

7 Əbay Ahaswerus a gwaɗa a gà Asta mandərkwasla məkəs əbay nda Mardukway gà Yahuda ata: « Araha yàa hiriwe Haman aà dizl, aɗaba ana a waya məvəla mesewere are a gà Yahuda ya, dite yàa dza gà limana ŋgar a Asta. 8 Ama wakita ana tàa wetse nda zləm əbay, tàa tike aka lambà matsərəɗ ŋgar a ka, ti sle a aà mimbiɗere a aà ahər asa tsa. Ama kurum ŋa, nda gər kurum, wetseywim aha gà wakita a gà Yahuda, kamala ana a tsahən a kurum lele ya, nda zləm gà əbay, dite ka tikwim aaka lambà matsərəɗ gà asa. »

9 Ti yaha gər a gà ɓəzla mewetse dukw əbay, nda mehinne dzik səla gəra makər (23) i huɗ kiye məmakər ŋana tə zalar Sivan a. Ta wetseye aaha gà wakita a gà Yahuda, a gà bàba ŋana ta kwereye a gà bàba gà ahəɗ a, a gà bàba ŋana ta kwereye a gà ɓəza gà ahəɗ a, nda gà bàba ŋana ta kwere gà bàba gà ahəɗ gà kwite dərməka nda dzik səla gəra təsəla ŋa ata ya (127) ika mekwere Ahaswerus a, gəs ika ahəɗ End a, tsikw aka ahəɗ Etiyupi, kamala ana Mardukway a tsik a tar a. Ta wetseye gà wakita ata ka, nda medzibe mewetse dukw gà mburma ana i huɗ gà kwite ata ya, ku mege gà mayahaba gər gà mburma wara ka, ndaka ahəm tar. Ku mege gà Yahuda tekeɗe ka, nda medzibe mewetse dukw tar, ndaka ahəm tar. 10 Ta wetseye gà wakita ata ka, nda zləm əbay Ahaswerus, dite ti tike aakahər nda lambà matsərəɗ ŋgar. I dəba ŋa ya, gà ɓəzla sik əbay tə daya à gà wakita ata ka, nda gà piris, ana ta pala ka, aà meger dər megemir a əbay ɗekɗek a.

11 Araha na dukw ana ta wetse a huɗ gà wakita ata ya: « Əbay aka vəl vatwa a gà Yahuda ana tar i gà bàba gà huɗ kwite ana tserdze ika mekwere ŋgar a, ti yahaba gər, aà megeye a ika mandza a bəra tar a, nda mibetse, nda medzeye dər, dite nda mandəva iɗəm aà gà mayahaba gər gà mburma ana, tar ku mege ika ahəɗ batsah kwite wara, ana ika mekwere ŋgar fit, ta ge a à tar a guvəl nda dukw ahər a fit tserdze a. Gà Yahuda ta bats gà məkəs tar, nda gà ɓəza tar, dite nda madzaka gà limana tar asa mbaŋa ya. 12 Vatwa ata a vəl a tar ba ka, biy pat ilik, nda kiye makurwa gər ŋgar sula (12) ŋana tə zalar Adar a, nda mehinne kurwa gəra makər ŋa (13), ku mege i ŋga, ika mekwere əbay Ahaswerus a fit tserdze. »

13 Tə dzaya gà wakita ata ta wetseye ya, kə̀la aà gà ahəɗ ana ika mekwere ata ya, kamala məpala ahəm a, ti ɗifeye a dər a gà mburma tserdze, aà gà Yahuda ta hadzal ba aà məpəla ba tar aà gà ɓəzla guvəl tar a. 14 Gà ɓəzla meslire əbay tə tsala aka gà piris ana ta pala aà mege dər megemir əbay ya, tə daya dər tsəmma tsəmma, ti ɗifeye dər a gà mburma fit tserdze kamala ana əbay a vəl a ahər vatwa biy balaari ya. Ti ɗifeye à məpala ahəm ata i Susa, i təv ata malawara ŋa nda zlagam tits a mbaŋa.

15 Mardukway a dara i bəra əbay ya ka, a dza akabara petek leŋ gà əbay ana a ndza nduzzwa mewetse ŋa nda herre ya. A tike aakara baramusa ana herre mewetse ŋa nda nduzzwa ya, nda gà batsah mendiwiɗe gər gura i gər, batsah huɗ kwite Susa ata a rah nda batsah mewideye maŋgayaba nda malakaya aà ahər. 16 I təv gà Yahuda ka, pat ŋa ata ka, batsah pat maŋgayaba ana ndzəɗakka ya, tar i meŋgesle, tar i mege gara. 17 Kə̀la aà gà bàba gà ahəɗ, kə̀la aà gà huɗ kwite, ku mege i ŋga i gà təv ana məpala ahəm əbay ata aka ndze aɗəm a ka, gà Yahuda tar mandzaŋa ka, i meŋgesle nda maŋgayaba. Ti deye gà bàba gà ɗaf, ta gərəv. Bagwal ŋa ika magər gà mburma ana tar gà Yahuda tsiye ka, tàa neye aba gà Yahuda, aɗaba magəɗa gà Yahuda a ge tar hinne.