Məməta Haman
7
1 Gà əbay nda Haman tə da a bəra Asta mandərkwasla məkəs əbay a mazəma ŋgwal ɗaf. 2 A pat masula ŋa ata, akahər na gà əbay tar riŋ aà mazəma dukw mezime nda masa guzum a ka, a gwaɗa a Asta mandərkwasla məkəs əbay asa: « Kà waya na əla Asta mandərkwasla məkəs əbay? Yàa hadzal ba aà məvəlak dukw ana ka waya ya. Ki wize a na əla? Ku mege mezehe mekwere gà tekeɗe ka, i vilekiŋa. » 3 Asta mandərkwasla məkəs əbay a gwaɗar aaka: « Əbay gà, na aka dak a gər, na kà pər ahər lele ka, araha na dukw ana i waya ya: Miyak à iye nda mesife, dite dukw ana i wize a ya ka, miyak à gà gwala gà nda mesife asa mbaŋa. » 4 Aɗaba mə̀r nda gà gwala gà ka, tàa dzawa à mə̀r aà mibetse, nda medzeye dər dite nda mandəva iɗəm à mə̀r a. Tsəka na mege tə dzawa à mə̀r aà ɓele ka, ana ka, i fefilek a tsa, aɗaba na dukw ata pəra ka, i zle a mewiseke a dər à gər tsa əbay.5 Əbay Ahaswerus a wiz aà Asta mandərkwasla məkəs əbay: « Mburma ŋa ana weke na a waya mege dukw ata dze ya? Dite ŋgat dzena i ŋga? » 6 Asta a gwaɗar aaka: « Wele ana ŋgat mala guvəl mə̀r, mala mene are mə̀r a ka, Haman ka. Ar ka, ŋgwal mburma tsa! » Tsam ka, Haman a dzəba aà mege magəɗa, nda medzedzere slaɓslaɓslaɓ hinne ika miɗ gà əbay nda mandərkwasla məkəs əbay. 7 Əbay a ge matsəɓatsəɓ, a hitse aà masa guzum a, a dara a dzidzel a. Haman a ndza riŋ i fata aà mege kamkam a Asta mandərkwasla məkəs əbay, aà məməsak aà mesife ŋgar te. Aɗaba Haman a pər ka, əbay aka dzala aà medzeye à ŋgat.
8 Haman a ye ba aà mbulum a, aà sik məpa ana Asta mandərkwasla məkəs əbay riŋ mandza ŋa ikəka ya. Akahər ŋa ata ka, əbay riŋ a mbiɗehe a gər i dzidzel a, a ga masa guzum. Əbay a gwa: « Dukula? kà waya makəzala məkəs gà, i təv are gà, i huɗ ga gà asa ya? » Ələk ŋana əbay a tsik aba bazlam ata ya ka, gà ɓəzla megemir əbay tə daha ta kumbuhar are a Haman. 9 Harvuna, ilik ŋa i liwiŋ gà mburma gà madadaɗa ŋa ata ya, a gwaɗa a əbay: « Haman aka ka, aka ndwaŋ zubul dizl aà mehirwe ahər Mardukway, wele ana a be à mesife yak a. Dizl ata ka, zubul ŋa metir dzik səla gəra əzləm (25) i bəra Haman ŋa. » Əbay a gwaɗar aaka: « Dumaha kà hiriwim ahər Haman ŋa aà dizl ata! » 10 Ta hiriwe Haman aà dizl ata a ndwaŋ aà mehiriwe ahər Mardukway zləmana ya. I dəba ŋa ya, matsəɓatsəɓ əbay a nikiɗ.