Nehemiya 1

NEHEMIYA

Nehemiya a mbəɗ a gər a Yeruzalem aà məma a zlagam a bəra

1 Araha na gà bazlam Nehemiya kəla Hakaliya ana a tsik a. I huɗ mive dzik səla ŋana Artagezerses ŋgat Əbay gà Persa i huɗ kiye ana tə zalar Kislew a ka, iye Nehemiya mandza ŋa i batsah kwite Susa. 2 Hanani, ŋgat ilik ika magər gà damər gà gà Yahuda ya, tar nda gà asiŋ gà mburma, tə dara ika ahəɗ Yahuda ya. I fata ya ka, i wizeye a a tar, gà bazlam aka gər gà asiŋ gà Yahuda ana tə zeha a riŋ nda mesife ya, aà gà na ta gasa ya tar aka gà ahəɗ ŋgiɗ a, dite i wizeye a a tar, gà bazlam aka gər kwite Yeruzalem asa mbaŋa. 3 I fata ya ka, ta gwaɗiŋ aaka: Gà na ti zeha a riŋ nda mesife aà gà na ta gasa tar a ka, gà taŋa ka, tar mandza ŋa a riŋ ika gà ahəɗ Yahuda. Ama tar a riŋ ka, i batsah mesewere are, dite nda hwarwa ŋa asa. Gà ɓəzla mene are tàa tamaya gà biye aà zlagam ana a lawara Yeruzalem a, dite gà dukw mahəndəka gà biye hərmaga zlagam ata ka, tàa wànà ya nda akwa. 4 I təv ana i tsaraka gà bazlam ata ya ka, i ndza a bəɗ, i fata ya ka, i dzəba aà tuwa. I ndza i huɗ tuwa ata ka, mehinne diŋ, dite i gawa ndəra, i dzəba aà mahama a Mbulum ana mandza ŋa i gər ŋa ya. 5 I fata ya ka, i gwa: « Da BATSAH kwa ŋa Mbulum ana mandza ŋa i gər ŋa ya. Mbulum batsah ŋana, biy megèr magəɗa ya. Kər na mala makasla magəsa masla ana kə gəs, nda gà na ta gəs ahəm aà məpala ahəm yak a, dite ki mbiɗe a dəba a gà na ta waya kər a tsa. 6 I hamak, dziŋ zləm aka meheme gà lele. Həndək ikaba are ya, kà tsaraka meheme ɓele yak ana, a hemeke a mbakum ika miɗ yak a, ku mege ndaapat, ku mege ndaavəɗ agəra mə̀r gà Isərayel ana gà ɓele yak a. Mìi sər bakal ana mə̀r gà Isərayel, mì ge aka gər yak a. Iye, nda gà mburma ana i ga i bəra tsir gà ya, maa ge bakal. 7 Maa gək gà dukw ana gà ŋgwal ŋa tsiye ndzer, dite maa gəs ahəm aà gà məpala ahəm yak tsa, dite nda gà a dukw ana kà hitse dər, dite a dukw ana a da ndaka vatwa ŋa, kà vəl a mə̀r nda ahər ɓele yak Musa ya tsa. 8 I gək kamkam, məbara à gà bazlam ana kà tsik nda ahər mala meslire yak Musa, a gər a, nda megweɗe ana kə gwa ka, na kurum gà ɓəzla magəsa ahəm tsəka, i ta gwitse a ikaba a kurum a, ku mege a ŋga aka magər gà mburma ana tə sər Mbulum tsiye. 9 Na a pat ŋgiɗ kàa mbəɗumara a təv gà ya, kàa gəsum ahəm aà məpala ahəm gà, nda gà na ki gwim a dər megemir a ka, ku mege kàa gwitswim ikaba aka gər ahəɗ a tekeɗe ka, i ti yehera kurum i gà təv ata ya, i mere a a kurum a, i yehe a kurum a gər a təv ana i zla, zləm gà a ndze a iɗəm a. 10 BATSAH kwa ŋa, mə̀r ka gà ɓəzla meslire yak, dite mə̀r asa ka, gà mayahaba gər gà mburma yak ana kà beyera à tar nda ndzəɗa yak ana a za gà duwa tserdze ya, dite asa ka, nda ahər yak ana ndzəɗa ŋa ya. 11 I gək kamkam BATSAH kwa ŋa dziŋ zləm aka meheme gà ana i hemeke a ya lele. Dza zləm a meheme gà ɓəzla meslire yak, ti tike maŋgayaba tar ka, aà magəsa a kər ahəm. Dukw ana i dzala ya ka, mege ba, vəl vatwa a Əbay mipetiŋ aà ŋgwal ŋgar, aɗaba iye ka, wele ana a gawa megemir i ga i bəra Əbay ya.