Nehemiya 2

Mede Nehemiya ana a da a Yeruzalem a

1 Akahər ana Artahsasta a ge ika Əbay mive dzik səla ya, a pat duwa nda kiye Nisan ŋa ka, Əbay a riŋ mandza ŋa aà tabəl, i zla guzum i mbəɗar a tsile masa guzum Əbay, iye ka, nda gà matsəɓatsəɓ, tsaatsa ka, dukw ata aka giŋ ba gər ilik tsa na ika miɗ ŋgar a. 2 I fata ya ka, Əbay a wiz aà iye, aàla na kà hərdə̀s yemere ka, tsaatsa kər a riŋ zay ya? kwets kər ka, nda gà dukw məməta tsa ibam ana, Dukula na a gək ba gər a? I fata ya ka, magəɗa a dzəba aà megiŋ hinne. 3 I fata ya ka, magəɗa a giŋ hinne asa. I dəba ŋa ya, i gwaɗa a Əbay, mandza a bəra yak mege ka, aà biybiy. Agəra la dziye na i ndze a nda mahərdə̀sa yemere ŋa ya tsiye. Aɗaba kwite ana ti leye aɗəm gà bàba gà tsir gà ya ka, aka mbazla. Dite gà dukw mahəndəka gà biye hərmaga ŋa tekeɗe ibam ka, tàa wànà ya nda akwa. 4 I fata ya ka, Əbay a gwaɗìŋ, ki wiz a ana Dukula na i təv gà ya ya? Tsara tsam ka, i hama a Mbulum ana i gər ŋa ya. 5 Dite i gwaɗa Əbay gà, na kàa waya lele, dite kər a riŋ maŋgayaba ŋa nda iye ka, viliŋ vatwa i de a aka ahəɗ Yahuda, a huɗ kwite ana ti leye aɗəm gà bàba gà tsir gà ya, i ta me a dər aà mbulum. 6 I fata ya ka, Əbay a gweɗiŋ asa, ika miɗ məkəs Əbay ana, tar mandza ŋa i tsaka ŋgar a. A ndze a ana hile na mede yak ata ki de a ya? Dite ki ta mere a ana ndeɗime? Əbay aka gəs akaba na i de a ya. I fata ya ka, i ɗifer a pàt ana i ta mere a ya. 7 I gwaɗar asa, i hamak dziŋ dər gà wakita a ahər, aɗaba gà ɓəzla makwara gà ahəɗ ana ndaka tseke are pat ana a dəɗawa aɗəm, aà guva duluv Efrat ya, ta viliŋ vatwa aà mede tsikw aka ahəɗ gà Yahuda. 8 I waya asa ka, viliŋ dər wakita a a ahər, i vile a Asaf ana ŋgat mala makwara gà dizl ɗaf Əbay ya. I fata ya ka, a ta dziŋ a gà ŋgwal gà dizl biy mege dukw mahəndəka a ga, nda gà biy mendweŋe ana bise nda ga mbulum a. I waya asa mbaŋa ka, biy mazlazla zlagam ana a lawara batsah kwite ya, dite nda biy gà ga ana, i ti ndze a iɗəm a. Əbay a ndziŋ gà wakita ata ka, aɗaba ŋgwal Mbulum ana a riŋ a kèsle a iye ya. 9 I fata ya ka, i da aà maləma akaba nda gà bàba ŋana, ta kwere a gà ahəɗ ana a mbe, aka tseke are pat ana a dəɗawa aɗəm, ndaka tseke duluv Efrat ya, aà mandza tar gà wakita ata a dziŋ a. Tsaatsa ka, Əbay aka mbər meslìriŋ dərra gà bàba ŋana ika miɗ gà sliwdze nda gà piris a, aà malakà iye. 10 I təv ana Sambalat gà Hurunitiya nda Tubiya mala megemir ŋgar, ana ŋgat gà Ammuniya ya, tə tsaraka kataya ka, tàa ŋgayaba tsa, na wura a dere a a wise ba à gà gər, nda dukw ana a vile a maŋgayaba gà Isərayel a. 11 I təv ana i ndze a Yeruzalem a ka, i ndza a riŋ i fata mehinne makər ɓeleffe. 12 I fata ya ka, Yàa tsik dukw ana Mbulum a ɗifiŋ dər aà mazlaka kwite Yeruzalem a, a wura tsa. I fata ya asa ka, i hitse a Mbulum ndaavəɗ, mə̀r nda gà mburma ana mə̀r dze ya, gà asiŋ gà dukw gənaw aà iye tsa, say hezweŋe ata i ndza aaka ya ilik. 13 I dəba ŋa ya ka, i dara a bəra i huɗ kwite ya, ndaavəɗ ŋa ata, ndaka biye hərmaga ana a mbe ndaka tseke tulwah ser aka biye yam gà kəra dala, ndaka tseke biye hərmaga daraɓa ya. I samata gà zlagam ana a lawara Yeruzalem ta mbazlaya ya, əba əba lele. I fər ikaba ya ka, gà biye ihər hinne, dite gà dukw mahəndəka ya gà ga ka, akwa aka wànà kweleŋ. 14 I ndiɗik gər aà madara ndaka biye yam, dite ndaka tseke duluv Əbay ya. Ama hezweŋe ana iye mandza ŋa ikəka ya ka, vatwa a riŋ aà mada nda taŋa tsa. 15 I fata ya ka, i tsəl ndaavəɗ ŋa ata nda sik, ndaka təv mandzə̀ndzurə̀v yam ana a se iɗəm a. I ndiɗik gər aà masamata zlagam, dite i mbəɗ gər a dəba ndaka tseke biye hərmaga, ana a mbe a tulwah a asa. 16 Tsaatsa gà Əbay ana i huɗ batsah kwite ata ya ka, tə sər təv ana i da aɗəm a tsa, ku mege dukw ana i ge a ya, haa kinehe, Yàa ɗif à dukw ana i waya mege ya, a gà Yahuda tsa. Ku mege a gà ɓəzla məvəla dukw taf a Mbulum tekeɗe, ku mege a gà bàba ŋana, ku mege a gà Əbay, dite ku mege a gà asiŋ gà mburma ana ta vəl ba tar aà mege megemir a, tekeɗe. 17 Kinehe ka, i gwaɗa a tar: « Samatum, kwa mandza ŋa ka, i mesewere are, kwite Yeruzalem aka mbazla, gà biye hərmaga ŋa tekeɗe tàa wànà ya. Takwa tə zlazlakwa dər ahəɗ aà gà zlagam ata a lawara Yeruzalem a. Dite ka, kà ndzàkwa nda hwarwa ŋa asa tsa. 18 I fata ya ka, i ɗama a tar meme na Mbulum a giŋ ŋgwal, a kaslawa iye nda gà dukw ana Əbay a tsikiŋ a. I dəba ŋa ya, ta gwa: « Dzawa ba à megemir, takwa tə makwa à mazlazla zlagam a bəra, Ta vəl a aba ndzəɗa aà mege ŋgwal megemir ata lele. 19 I təv ana Sambalat gà Hurunitiya nda Tubiya mala megemir ŋgar, ana ŋgat gà Ammuniya, nda Gesem gà Arabiya, tə tsaraka kataya ka, tə dzəba aà masawla a mə̀r, nda mewìte mə̀r ta gwa: Dukula na naha ki gwim a ya? Kà wayum matsalaba a sègèmè a gər nda təv Əbay kəla ya?» 20 I fata ya ka, i gwaɗa tar aaka ka, Mbulum ana i gər ŋa ya, a vile a a mə̀r a mege gara, a mə̀r gà ɓele ŋgar, mìi ti dze a ba aà megemir ŋa, dite mìi ta me a à mazlazla a zlagam kwite mə̀r a bəra. Ama kurum ka, wura a vile a kurum a vatwa a maŋgata duwa kwizikw i Yeruzalem a tsa. Dite asa ka, ki slwim a aà megwim a duwa tsidze na i huɗ kwite ata ya. Wura a ti dzele a aka kurum a gà gər tsidze.