Nehemiya 3

Maɗama gà ɓəzla mazlazla zlagam

1 I fata ya ka, batsah mala makəɗa duwa a Mbulum duwa, zləm ŋgar Eliyasib, tar nda gà asiŋ gà ɓəzla məbatsa duwa a Mbulum ŋgiɗ. Tə zlazl biye hərmaga gà təmaŋ a təv ilik ŋa, tə dzaya aɗəm gà dukw mahəndəka a biye hərmaga, tseke sula ŋana, dite ti ne dər pam biy Mbulum. Tə ləmbaɗa zlagam ata ndisl aà gà ga ana metsile dərməka ya. I fata ya ka, ti ne dər pam biy Mbulum ndisl aà ga Hananayel ana zubul ŋa ya mbaŋa . 2 Gà mburma ana tar mandza ŋa i kwite Yerekuw a, tar a riŋ ti zlezle a, ika miɗ tar, dite gà mburma Zakur, kəla Imri ika miɗ gà mburma ata mbaŋa. 3 Gà mburma ana i Seneya ya, tə zlazl i tar ka, biye hərmaga gà kilif. Tə ndwaŋayar gà dizl, dite ta dza aɗəm gà dukw mahəndəka biye hərmaga tseke sula ŋa ata, nda gà ndzemde ŋa, dite tə dzayar gà ndzemde mahəndəka dər aɗəm ŋa, ara nda ga ya. 4 Araha na gà ɓəzla megemir ana ta ge a megemir i tsaka tar a. Gà Meramut kəla Uriya kəla kəla Hakus, Mesulam kəla Berekiya, kəla kəla Mesazabel, dite Tsaduk kəla Baana. 5 I dəba ŋa ya, gà mburma ana tar mandza ŋa i Tekuwa ya ka, tar a riŋ mbaŋa. Ama ka, gà bàba ŋana ika magər tar a ka, ti niw mege megemir, ana gà ɓəzla makwara megemir ta gwaɗa a tar gwim a. 6 Yehuyada kəla Pasaya nda Mesulam kəla Besudiya tə zlazl dər i tar ka, aà biye hərmaga ana tə zalar Yesana ya. Tə ndwaŋayar gà dizl, dite ta dza aɗəm gà dukw mahəndəka biye hərmaga tseke sula ŋa ata, nda gà ndzemde ŋa, dite tə dzayar gà ndzemde mahəndəka dər aɗəm ŋa, ara nda ga ya. 7 Taraha na gà mburma ana ta ge a megemir i tsaka tar a, Melatiya gà Gabawuniya, Yaduŋ gà Merunukiya dite nda gà asiŋ gà mburma ana tə dara i Gabawuniya nda Mitspa ya, aà magəsa megemir mala makwara ahəɗ ana a mbe aka tseke pat ana a diɗe a aɗəm a i Efəratiya ya. 8 I tsaka tar asa ka, Uzeyel kəla Haraya a riŋ, ŋgat a sər məvəɗa gà dukw ana nda gura ya, dite Hananiya ŋgat mala mede wirdè. Tar tə ndəv aà megemir tar ka, i Yeruzalem, a ndze aka təv ana zlagam ata a wudàɗ a. 9 I tsaka tar asa ka, gà Rafaya kəla Hur ŋgat Əbay ana a kwere a mezehe ahəɗ Yeruzalem a. 10 I tsaka tar, ə̀zàɗ zaakwa aà tar a ka, Yedaya kəla Harumaf, a ge a megemir ka, ndaka tseke lide ŋgiɗ ser aka ga ŋgar, dite i tsaka ŋgar asa ka, Hatus kəla Hasabiniya. 11 Malkiya kəla Harim nda Hasub kəla Pahat-Mu'ab tar a riŋ ti limbeɗe a tseke zlagam ana a mbe nda təv zubul gà ga madula duwa. 12 I tsaka tar kuɗa ka, Salum kəla Haluhes ŋgat Əbay ana a kwere a mezehe lide Yeruzalem ŋgiɗ, tar a riŋ ta ge a megemir nda gà dəm ŋgar. 13 Gà Hanun nda gà na mandza ŋa i kwite Zanuwah ya, ta ləmbaɗa biye hərmaga ana a mbe aka tulwah a, tə zlazl dər dite tə ndwaŋayar gà dizl, dite ta dza aɗəm gà dukw mahəndəka biye hərmaga tseke sula ŋa ata, nda gà ndzemde ŋa, dite tə dzayar gà ndzemde mahəndəka dər aɗəm ŋa, ara nda ga ya. I fata ya, tə zlazl dər asa ka, metir dərməka əzləm, tsikw aka hərmaga mandzə̀ka daraɓa. 14 Malkiya kəla Rekab ŋgat Əbay ana a kwere a ahəɗ Bet-kerem a, a ləmbaɗa i ŋgar ka, biye hərmaga mandzə̀ka daraɓa, a zlazl dər, dite a dzaya aɗəm gà dukw mahəndəka biye hərmaga tseke sula ŋa ata, nda gà ndzemde ŋa, dite tə dzayar gà ndzemde mahəndəka dər aɗəm ŋa, ara nda ga ya. 15 Salum kəla Kul-Huze ŋgat Əbay ana a kwere ahəɗ Mitspa ya, a ge megemir ika biye hərmaga, biye yam, a zlazl dər, a ndər. Dite a ndwaŋayar gà dizl, dite ta dza aɗəm gà dukw mahəndəka biye hərmaga tseke sula ŋa ata, nda gà ndzemde ŋa, dite tə dzayar gà ndzemde mahəndəka dər aɗəm ŋa, ara nda ga ya. A zlazl asa ka, tseke zlagam ana nda biye yam Silew ika magər gà dzidzel Əbay nda təv metsile ana a tarəra i kwite Dawda a. 16 I tsaka Salum ka, Nehemiya kəla Dazbuk, ŋgat Əbay ana a kwere a mezehe ahəɗ mekwere a Bet-tsur a, a ge megemir ŋgar ka, tsikw aka gà dive gà Dawda nda gà mburma ŋgar, ndisl aka duluv ana gà mburma ti le ya, ndisl aà ga gà ɓəzla makasla Əbay. 17 I tsaka ŋgar asa kuɗa ka, gà gwala Lewi na ta ge a megemir a, tar ka, Rehum kəla Bani, Hasabiya Əbay ana a kwere a mezehe ahəɗ gà Keyila ya, ta ge megemir ka, ika mekwere ŋgar. 18 I tsaka tar asa ka, gà damər ŋgar, ta ge megemir. Gà Bavay kəla Henadad ŋgat Əbay ana a kwere a mezehe ahəɗ Keyila ŋgiɗ a. 19 I tsaka ŋgar asa ka, Aser kəla Yesuwa Əbay gà Mitspa, a lembeɗe a təv ana a mbe ser aka diyis ana, a mbeha a ga ana gà dukw ahər iɗəm a. A fata na gà zlagam tə ləma akaba ya. 20 I tsaka Aser asa ka, Baruk kəla Zabay a riŋ, ŋgat a lembeɗe a ka, nda maŋgayaba ŋa, na gà təv ana ika miɗ ŋgar, gà tseke zlagam ana tə ləma akaba ya, tsikw aka biye hərmaga mada a bəra batsah mala məbatsa duwa a Mbulum Eliyasib a. 21 I tsaka ŋgar asa ka, Meremut kəla Uriya nda kəla Hakuts, a lembeɗe a tseke ana ika magər gà biye hərmaga, nda metsimìɗ ga Eliyasib a. 22 I tsaka ŋgar əzaɗ zaakwa asa ka, na a ge a megemir ka, gà ɓəzla məbatsa duwa a Mbulum ana tə dara ika gà tseke varavada ana ta mbeha a dulwa Yurdan a. 23 I tsaka tar ka, gà Bendzamen nda Hasub, ti lembeɗe a tseke ana a mbe aka ga tar a. Gà Azariya kəla Maseya, kəla kəla Ananiya, ta ge a megemir ka, aà guva ga ŋgar. 24 I tsaka tar ka, Binuwa kəla Henadad, a lembeɗe a tseke ana, a mbe aka miɗ ŋgar a, ika magər gà ga Azariya nda təv ana gà zlagam tə ləma akaba ya. 25 Palal kəla Uzay ŋgat a ge megemir ser ndaka təv maləma akaba gà zlagam ata, nda zubə̀l ga ana ika miɗ mazlazlaŋa aba nda ga Əbay ya, bise nda varavada ga daŋgay. I tsaka ŋgar ka, Pedaya kəla Parus na a ge megemir a. 26 I tsaka ŋgar ka, Pedaya kəla Parus tar nda gà ɓəzla meslire ana ta gewa megemir i ga mbulum ana tar mandza ŋa i kəsà Ufel a. Ta ge megemir tsikw aka zubul ga, ana i təv gà zlagam ana a ləma akaba ya, ika kadwa ndaka biye hərmaga yam a. 27 I tsaka ŋgar ka, gà mburma ana mandza ŋa i Tekuwa ya, tə zlazl tseke ana, ika miɗ tar, ika magər gà təv ana a mbe ser ndaka batsah varavada gà zlagam ana a ləma akaba nda zlagam Ufel a. 28 Daga ika tseke biye hərmaga gà piris a, gà ɓəzla məbatsa duwa a Mbulum, ta ge megemir, ku mege weke ika tseke ana a mbe aka biye hərmaga ga ŋgar a. 29 I tsaka tar asa ka, Tsaduk kəla Immer, a ge megemir asa mbaŋa ka, ser aka ga ŋgar, əzaɗ zaakwa ika miɗ ŋgar ka, gà na ta ge a megemir a ka, Semaya kəla Sekaniya mala makasla biye hərmaga ana nda kadwa. 30 I tsaka tar asa ka, Hananiya kəla Selemiya, Hanun ŋgat mendilik kəla Salaf, tar ta limbeɗe a tseke ana ika miɗ tar a. I tar ka masula təv, Mesulam kəla Berekiya a ge megemir ser aka tseke ana ŋgat a ndzawa iɗəm a. 31 I tsaka tar asa ka, Malkiya, mala masəra məvə̀ɗa gà dukw ana nda gura ya, a ge megemir tsikw aà ga gà ɓəzla meslire ana i ga mbulum batsah ŋa ata ya, nda gà təv gà ɓəzla madzawa a duwa, ana a mbe ser aka biye hərmaga Mifkak, dite tsikw aka təv biye hərmaga ga metike are, ana a mbeha a zlagam ana tə ləma akaba ya. 32 Gà asiŋ gà ɓəzla məvə̀ɗa duwa nda gura, nda gà ɓəzla madzawa a duwa, ta ge megemir ika dəba mandəvandəv tseke ana a mbe aka magər gà ga metike are nda biye hərmaga gà təmaŋ a.

Wirwir gà ɓəzla mene are gà Yahuda, a mà tar aà are a tar ŋa

33 I təv ana Sambalat nda gà Tubiya tə tsaraka ka, mə̀r gà Yahuda, mə̀r a riŋ mìi dze a ba aà mazlazla dər həɗ a zlagam ana a lawara Yeruzalem a ka, a dzəba aà mege matsəɓatsəɓ turturtur hinne nda masawla à mə̀r. 34 I fata ya ka a fafəl ika miɗ gà damər ŋgar, dite ika miɗ gà sliwdze gà Samariya, a gwa: « Dukula na naha gà Yahuda aaha gà matawak ŋa, duwa tar a riŋ tsa, tə dzəba aà mege ya? Wànà ki miyakikwe a a tar, tə da dər aka miɗ a. Wànà ta vilewa dukw taf a Mbulum hiywe ya? Wànà ti sle a aà mendìve a dər mbakum a? Tsəna wànà ti sle a aà mimeyere a à gà kur aha i mayaha gər gà ùrtùr aaha mawànà ŋa nda akwa ya, kamala ana ar piŋŋe ya ya?» 35 Tubiya gà Ammuniya a riŋ i təv Sambalat, ŋgat a gwa: « Tə zlazl zlagam tar pəra, i təv ana gà mbayaka, ti ndeba a ndaka gər ŋa ya ka, a mbezle ter a aà zlagam tar ata tə zlazl nda kur a . » 36 I fata ya ka, Nehemiya a dzəba à meheme a gwa: « A kər Mbulum tsir mə̀r, dzar zləm, gà ɓəzla guvəl mə̀r a riŋ aà mewite mə̀r. Sawla tar ata ka, məma a tar a gər a tar ŋa. Gà gər a gwa ta gasa tar, tə da a tar a daŋgay aka ahəɗ gà slele. I fata tə ta ndzək a tar gà limana tar nda ndzəɗa. 37 Kamala taŋa ya, kà pəl a a tar à bakal tar tsa. Kà mbete à bakal tar i təv are yak a tsa. Tə dzəba aà mandavaya mə̀r ka, aɗaba ana mìi me a aà mazlazla zlagam kwite mə̀r a bəra ya. 38 Ama mə̀r a riŋ aà mazlazla zlagam ata, a ndze kalkal ika ba ya ka, gà mayahaba gər gà mburma ta vəl ba aà megemir ŋa nda gəzləŋ ilik.