Nehemiya 4

1 Ama gà Sambalat, nda Tubiya nda gà Arabiya, nda gà Ammuniya dite nda gà mburma ana tə dara i Asdudiya ya, tə tsaraka mazlazla zlagam a riŋ a de a aka miɗ aka miɗ. Gà biye ana aà zlagam a, aka raraɗa ya aɗəm ba. Tsam ka, gà mburma ata tserdze ya, ta ge matsəɓatsəɓ hinne. 2 I dəba ŋa ya, tə dza akaba ahəm, a təv ilik ŋa, a mede a mege guvəl aà Yeruzalem, dite tə dzəba aà mege tar dukw ana ŋgwal ŋa tsiye. 3 I fata ya ka, mìi dzəba aà mahama a Mbulum mə̀r, dite mìi dzəba aà madzaya gà ɓəzla makasla kwite, ndaapat, ndaavəɗ, aà makasla mə̀r i təv gà ɓəzla mene are mə̀r a. 4 Ama gà mburma gà Yahuda ta gwa: « Ndzəɗa aà gà ɓəzla megemir kwa asa tsa. Aɗaba gà mayaha gər gà kur ka, aka behe hinne. Ki slekwe a aà mezlezle a zlagam aaha asa tsa. » 5 I fata ya ka, gà ɓəzla mene are mə̀r ta gwa: « Gà Yahuda ka, ti sər a aba tsa, na ki tekwe a aka taraha aà mege a tar guvəl a. Ti sle a aà meŋgete a a duwa tsa, na ələk ŋana ki ti ndzekweha aka magər tar a. Dite i dəba ŋa ya. ki betsekwe a tar, dite asa ka, ki hitsekwe a a ter a à megemir tar a bəɗ. 6 Tsaatsa ka, gà Yahuda a riŋ mandza ŋa, i təv gà ɓəzla guvəl mə̀r ata, tàa minera a təv mə̀r a ka, a sle a sik kurwa, na ta mawa à mə̀r a dukw ana ti ta ge a mə̀r a ŋgwal ŋa tsiye, ta gwaɗa a mə̀r ka, ku mege vatwa wara na ki zlwim a ya ka, ta hitse a aà kwiŋa. 7 I dəba ŋa ya ka, i le aà gà təv mandzəba ika dəba zlagam i bəɗ. A gà təv ata ka, i dzaya aɗəm gà sliwdze, gà mayahaba gər ŋa, kəla aà gà gwala. Gà masalama aà tar, gà suwal nda gà likiɗ aà tar . » 8 I samata gà təv mandzəba tar ata ka, i dəba ŋa ya, i gwaɗa a gà bàba ŋana, a gà Əbay nda gà mburma ana tserdze tar a riŋ i fata ya: « Kə gwim magəɗa a gà ɓəzla guvəl kwa tsa, mùm aba dərra a gər a, BATSAH kwa ŋa Mbulum kwa ka, batsah ŋa, dite biy meger magəɗa, a ge a guvəl agəra gà damər kurum, nda gà ɓəza kurum, gà dəm ŋana nda gà asləka ŋana, nda gà məkəs kurum, dite agəra gà ga kurum . » 9 I təv ana gà ɓəzla mene are mə̀r, tə sər aba ka, maa mbər mesire aà madzala gà gər tar, dite Mbulum tekeɗe ka, aka mbazla à mandza akaba ahəm tar. I fata ya kuɗa, mì mbəɗ gər aka mazlazla zlagam tserdze, ku mege weke a ndza a təv megemir ŋgar. 10 Ama a gər pat ata ya ka, gà mezehe gà mburma gà pəra, na ta ge megemir a. Aɗaba gà asiŋ ŋa, tə ndzək gà suwal, gà biy ŋgiɗ gà slakwa, dite gà biy ŋgiɗ aaha tar nda gà likiɗ, gà asiŋ a asa ka, nda gà andiw sayaw mege guvəl, Gà ɓəzla aka miɗ ŋa tserdze ka, tar ihər ta kèsle a gà mburma gà Yahuda. 11 Gà na tar a riŋ ihər ti zlezle a, zlagam ana a lawara batsah kwite ata ya, nda gà na ti ndzeke a kur a, aà mege dər megemir a ka, nda ahər ilik. Ahər ŋgiɗ ka, ta gise a dər dukw ahər. 12 Gà mburma ana tar a riŋ ti zlezle a ya ka, ku mege weke a riŋ madana masalama ŋa, ihər ika dəmkul. Mìsle ŋgiɗ ilik a zezeme a iye, mahadzàla ba ŋa aà məvàta mezleliŋ. 13 I fata ya ka, i gwaɗa a gà bàba ŋana nda gà Əbay, dite nda gà mburma ana tar a riŋ i fata tserdze ya. Mege megemir aaha ka, zlabatum ŋa a beha hinne. Dite araha kwa aà megemir ŋa ka, ka ndzeyekwe a aba tsa, kà ndzàyakwa ikaba ya ka, diriŋ diriŋ. 14 Na kàa tsarakum məvata gà mezleliŋ ka, dayumara i gà təv ana kurum iɗəm a, dite ka yahuməbara gər a təv gà ya. Mbulum a ge a guvəl aɗaba kwa. 15 Kamala taŋa ya, na mì gewa megemir a, daga agər mèkwède ya, haa tsikw aà məmbəzara gà mawusawus a. Gà mezehe gà asiŋ mə̀r ka, tar nda gà suwal ihər. 16 Akahər ata kuɗa na i gwaɗa a gà mburma, kəla aà mala aka miɗ gà mayahaba gər gà mburma ata ka, ti ta hinne a nda gà mburma ŋgar i Yeruzalem. Kamala taŋa ya, na ti ta kèsle a mə̀r i huɗ həvəɗ a, dite na ti ta ge a megemir ndaapat ŋana ya. 17 I fata ya, ku mege iye ŋa, ku mege damər gà, ku mege gà ɓəzla megemir gà, ku mege gà ɓəzla mekèsle ana tar a riŋ ti zezem a iye ya. Mì ndzəkawa ikaba gà petek mə̀r a tsidze, say na mìi dze akaba yam a.