Gà asiŋ gà Yahuda ŋgiɗ ta pa gudze a təv Nehemiya
5
1 A pat ŋgiɗ duwa ka, gà mayahaba gər gà asləka nda gà məkəs tar, ta ge gudze à gà Yahuda ŋgiɗ ana gà damər tar a. 2 Gà misle ŋgiɗ ta gwa: « gà ɓəza aà mə̀r ka, hinne, gà asləka nda gà dəm, mì waya aà maŋgata ble aà mezime, dite na mìi ndze a dər a. 3 Gà misle ŋgiɗ ta gwa i tar asa, i təv ana mì waya ble, akahər ana may a ge a mə̀r a ya ka, balaari mì dzawa gà guvah mə̀r, nda gà guvah viŋye mə̀r, dite nda gà, ga mə̀r ahər a gà mburma ya. 4 Gà misle ŋgiɗ i tar ta gwa asa, aà mandza hadàm a Əbay tekeɗe ka, mì zlawa siŋgwe ŋa ka, aà mburma ya, mìi dze ahər a gà guvah mə̀r, nda gà viŋye mə̀r kamala ana mì hitsewe tar dər ahər a gà mburma ya mbaŋa. 5 Tsaatsa, kwa ŋa tserdze ka, gwala kwa ŋa ilik. Gà ɓəza kwa tekeɗe kamala taŋa ya mbaŋa. Ama nda balaari, mìi dzeye a gà ɓəza mə̀r nda gà dəm mə̀r aà ɓele. Dite gà asiŋ gà dəm mə̀r kinehe ka, tàa mbər mèneye gà ɓele. Mìi sle aà megeye gà dukw ŋgiɗ pampam tsa. Aɗaba nda ndzer ka, maa mbər medzeweye aà gà guvah mə̀r, nda gà viŋye mə̀r. 6 I təv ana i tsaraka gà bazlam tar nda məpa gudze tar ata ya ka, a tsiɓìŋ tùrtùrtùr hinne. 7 I fata ya ka, i dzala məma à bakal a gà bàba ŋana, nda gà Əbay, i gwaɗa a tar: « Aɗaba Dukula dziye, na kà tikwim məba duwa aka gər gà damər kurum hinne, a za tar ndzəɗa dze ya ?. I dəba ya ka, i zalaya tar, a batsah mayahaba gər. 8 I təv ana ti yaha ba gər tserdze kamala taŋa ya ka, i gwaɗa a tar: « Kàa slekwe a aà məmburdwara gà damər kwa ana, tə dzawaya aà tar a gà mayahaba gər gà mburma ana tə sər Mbulum tsiye. Ama kurum ŋa, kà wayum dzàwùm aà ga damər kurum, gà asləka ŋana nda gà dəm ŋana a gà asiŋ kurum ŋa, gà asiŋ gà Yahuda ŋgiɗ. Tə ndza ndiktikke, tə sər dukw ana te gweɗe a aaka ya tsa. 9 I dəba ŋa ya, i gwa asa, dukw aaha ki gwim a ya ka, ŋgwal ŋa tsa. Ŋgulum ki ndzwim a ka, nda mege magəɗa a Mbulum i gəzləŋ kurum, na dite ki ŋgetwime a mendeve, nda təv mayahaba gər gà mburma ŋgiɗ ana ti ne gà ɓəzla mene are kwa ya tsiye. 10 Ku mege iye nda gà damər gà, nda gà mburma ana ta giŋ a megemir a ka, maa gasa ya a tar gà gwedere gà siŋgwe, nda gà ble mbaŋa. Miyakukwa tar dər aà gà dukw ana gà mburma ata ta mekwe a dər aɗəm a. 11 Makwa a tar, à gà guvah tar, nda gà viŋye tar, nda gà uliviye dite nda gà ga tar, a gà mayahaba gər gà mburma kwa mbakum aaha, ka wizwim a tar nùba aka gər siŋgwe, aka gər ble nda gà guzum, nda gà mal ana kà dzum a tar gwedere ŋa ya tsa. 12 I fata ya ka, ta gwɗar aaka: « Mìi ge a kamala ana ka tsike a, mìi me tar a à gà dukw ana mì gasa a tar a, dite mìi wiz a a ter a dukw ŋgiɗ asa tsidze. I dəba ŋa ya, i zal a gà ɓəzla məbatsa duwa a Mbulum kamala gà ɓəzla sida ya, dite i wiz aà gà bàba ŋana nda gà Əbay. I gwaɗa tar zəmum mimbeɗe aka dukw ana ka tsìkwim a. 13 Tsam ka, i gàgər à andiw gà, nda magwaɗa tar aaka: « Gà gər a gwa ka, Mbulum ma gagər à gà na ta gis a ahəm aà dukw ana ta tsik a tsiye, kamala taŋa ya mbaŋa. Gà gər a gwa ka, Mbulum mandzək gà ma tar, nda gà limana tar, dite tə ndza kataya dukw tar mege a riŋ tsa. I dəba ŋa ya, gà mayahaba gər gà mburma ta gwaɗar aaka: « Haya gà gər a gwa mege ba kamala taŋa ya ndzer kaɗəŋ. Tar tserdze tə lah dimis mazləba a BATSAH kwa ŋa. I dəba ŋa ya ka, gà bàba ŋana nda gà Əbay, ta ge dukw ana ti tsik ahər i sida ya. 14 Daga a gər pat ŋa ata ya, asa mbaŋa ka, ti zle iye, kamala mala makwara ahəɗ gà Yahuda ya, gəs aà mive dzik səla ya, tsikw a mive dzik makər gəra sula ana Əbay Artahsasta a kwara ya. I huɗ gà mive kurwa gəra sula ŋa ata ya ka, ku mege iye, ku mege gà damər gà, maa zəm dukw mezime, dukw ana ta pəl dər làmpa i ahər mala makwara ahəɗ ata ya tsa. 15 Ama gà malahalah gà ɓəzla makwara ahəɗ ata, ta kwarra, i dəba ga ya ka, tàa batsaya gà mburma ata nda mandza aka tar mibe duwa, aka gər gà mayahaba gər gà mburma. Dite aka gər gà dukw mezime, nda gà guzum ka, ta wizewa aaka aà tar asa kur siŋgwe dzik faɗ. Gà na ta mbe aka tar tekeɗe tə zəmawa nuba ika gà mayahaba gər gà mburma ya. Ama iye ka, i gəs ahəm a Mbulum, dite Yàa ge duwa ilik kamala taŋa ya a wura tsa. 16 Tsaatsa seyiŋ ivaɗ ka, Yàa ge megemir mazlazla zlagam ata a lawara kwite ya, nda ahər gà ŋa. Yàa səkəm guvah tsidze. Gà ɓəzla megemir gà, ana ta vəl ba aà megemir zlagam ata nda gà iye ŋa dze mbaŋa. Tar tekeɗe tàa səkəm guvah tsa mbaŋa asa. 17 Gà asiŋ gà mayahaba gər gà mburma ana ika magər gà Yahuda, dite gà Əbay ana mì zəmawa akaba ɗaf nda gà iye ya ka, tar ka, dərməka nda dzik əzləm, səkah aaka aà gà mburma ana tə dawara ika gà ahəɗ ana bise aà mə̀r a. 18 Kəla pat ka, gà mburma ta kə̀ɗawa sla ilik, nda gà təmaŋ ana gà magala ŋa ya ndilik, dite nda gà mendzìkwer. Kəla aà mehinne kurwa fit ka, ti tefewiŋeha guzum hinne, dite iye na i pəlayawa ya fit, Akaba nda taŋa dze tekeɗe ka, Yàa wiz mandza hadam ana mala makwara ahəɗ na gwa ya tsa. Nda ndzer ka, megemir ka, a wur tar ba a gà mayahaba gər gà mburma hinne. 19 Da, Mbulum gà, dukw ana i ge a à gà mayahaba gər gà mburma aaha fit tserdze ya ka, məmàkara a gər a, dite ki giŋ ŋgwal te.