Nehemiya 6

Gà ɓəzla mene are ta waya mandza magəɗa aà Nehemiya

1 I fata ya ka, gà Sambalat, Tubiya, Gesem gà Arabiya nda gà asiŋ gà ɓəzla mene are mə̀r ŋgiɗ pam, tə tsaraka ka, maa mà à zlagam ana a lawara batsah kwite ya, aà mbulum. Gà biye ihər asa tsa. Akahər ata kuɗa ka, Yàa dzaya aɗəm gà dukw mahəndəka a gà biye hərmaga ŋa zukw tsa. 2 Gà Sambalat nda Gesem, tə slərra mburma a təv gà ya, ti zeliŋ aà mayahaba gər nda gà tar a Kefirim, a tulwah ana tə zalar Unuw a ya. I madzala gà gər tar ka, ta waya aà megiŋ dukw ana ŋgwal ŋa tsiye. 3 I fata ya ka, i slər taraha gà ɓəzla məma a labara aà magwaɗa a taraha: « Mege megemir aà iye ka, hinne mba, dite i sle a aà medeha aà maləma akaba nda gà kurum tsa. Na Yàa daha i faha ya a təv kurum ka, megemir a ge a ba tsa. 4 I fata ya ka, ta mewiŋara ka, aà gà bazlam tar ata ya hiywe, haa sik faɗ. I mawa a tar aakaha ka, à gà bazlam ŋa ata, kamala taŋa ya hiywe mbaŋa. 5 I dəba ŋa ya, Sambalat a sləraha mala meslire ŋgar, ma sik əzləm ŋa. kamala taŋa ya hiywe nda gà mewetse wakita i hər ihər, metike aakahər ŋa tsa. 6 Araha na dukw ana ta wètsè aɗəm a, dukw gà mburma ana tar gà Yahuda tsa, tə ɗamawa ya. Dite Gesem tekeɗe a gwa aaka haya ya. Kurum nda gà damər yak gà Yahuda ka, sègèmè i gər kurum. Aɗaba taŋa na ka waya məma a mazlazla zlagam ana a lawara kwite ya a mbulum, dite ka, kər ŋa, kà waya mene Əbay tar. 7 Kàa pala gà ɓəzla məma à guma Mbulum aà metsike ya bazlam ŋa, a gà mburma ana i Yeruzalem a ka, kər kàa ne Əbay gà Yahuda. Dukw ata tserdze ya ka, Əbay gà Perisiya a tsereke a bise. Kamala taŋa ya ka, kər ŋa ka dara, kà fafəlakwa akaba a təv ilik ŋa. 8 I fata ya ka, i màr aakaha a bazlam ŋa, i gwaɗaraha ka: « dukw ana ki ɗeme a fit dze ya ka, parsa, a dara ka, i madzala gà gər yak a tserdze. 9 Aɗaba gà mburma ata tserdze ya ka, ti dze a mə̀r a ka, magəɗa. Aka biy tar ka, ti dedesle mə̀r a ahər, dite mìi miyak a à megemir ŋa kataya sifek pəra. Da BATSAH kwa ŋa, ne à iye mala ndzəɗa, nda təv megemir aaha.

10 A pat duwa ka, i da a bəra Semaya kəla Delaya, kəla kəla Metabel, aka ŋgat ahər ŋa, aà madàra aà məpəra aka iye ya tsa. A gwaɗiŋ, tama akaba a batsah ga mbulum, a təv ana tsəɗaŋŋa biy Mbulum a, həndə̀kama aaha aba, aɗaba gà ɓəzla mene are yak, ti dere a ta kiɗe a kər ndaavəɗ. 11 I dəba ŋa ya, i gwaɗar aaka: « kər kə gwa ana asləka mburma kamala iye aaha ya ka, a vele a ya? Dite iye ka, vatwa gà a riŋ aà mede a huɗ gà ana tsəɗaŋŋa biy Mbulum a tsa. Na Yàa ge kamala taŋa ya ka, i dzeye ka, aà mesife gà. Awaŋ diydiy iye ka, i de a a ga mbulum Batsah ŋa ata tsa. 12 I fata ya ka, i sər nda ndzer ka, Mbulum tsa na, a fèfiler a i ba Semaya ya. Ama a tsik taŋa ka, aɗaba gà Tubiya nda Sambalat na ta vəlar duwa aà metsikiŋ ya. 13 Aɗaba la dzeye na ta vəlar duwa aà metsikiŋ ya? Aà medze aà iye magəɗa, aà ka, i zazam metsehe ŋgar ana a tsikiŋ a. Dite ka, i ge bakal. Taŋa ka, aà vatwa məvəl tar ba, aà mege a iye aruwaŋ, dite hwarwa mandaɗa ba aka iye. 14 Da Mbulum gà, megemir gà Tubiya nda Sambalat ka, məmàkara a gər a, dite asa ka, nda mala məma guma mbulum məkəs ŋa ata zləm ŋa Nuwadiya ya, dite nda gà asiŋ gà ɓəzla məma guma Mbulum ŋgiɗ ana ti yaha vatwa aà medze aà iye magəɗa ya.

Ta wala mandə̀va aà mazlazla zlagam Yeruzalem

15 Zlagam ana a lawara batsah kwite ata ya, a ndəv ka, nda mehinne dzik səla gəra əzləm nda kiye ana tə zalar Elul a. I dəba mehinne dzik əzləm gəra sula ana a ge a ba megemir a. 16 I təv ana gà ɓəzla mene are mə̀r, tə tsaraka labara ata ya ka, gà mburma ana tar gà Yahuda tsiye tserdze, mandza ŋa ika gà ahəɗ ana ta mbeye mə̀r aaha ya ka, ta ge magəɗa, dite tar mandza ŋa tserdze ka, i dukw hwarwa. Tə sər megemir aaha a ge ba ya ka, nda mezleke Mbulum. 17 I huɗ gà mehinne ata tserdze ya ka, gà bàba ŋana i Yahuda ya, ta wetseweha wakita gà pat ŋgiɗ a Tubiya dite Tubiya ibam a fafəlawa a tar aakaha. 18 Aɗaba gà mburma hinne ika magər gà Yahuda ya, tə dza akaba ahəm nda gà Tubiya nda məvəla ba mimbeɗe, aɗaba ana ŋgat ka, malpa tar a. Aka zla dəm gà Yahuda, dəm Sekaniya kəla Ara. Dite Yəhuhanan kəla ŋgar aka zla dəm Mesulam kəla Berekiya. 19 Ti tsikawa ahər ka, dukw ana ŋgwal ŋa ya, na ika miɗ gà ya. Dite ta mawar ka, a dukw ana i tsikewa ya. Tubiya ŋgat mbaŋa ka, a wètsèwa gà wakita biy medzè aà iye magəɗa.