Esdras 1

Ezra

Sirus a vəl vatwa a gà ɓele ana ta gasaha tar a, ta mbəɗ gər a ma

1 I huɗ malahalah mive ana Sirus, Əbay gà Perisiya a kwara huɗ kwite Babila ya ka, BATSAH kwa ŋa a zla madzala gà gər, aà maràha à bazlam ŋgar ana a tsik akahər ata, nda ahər mala məma à guma ŋgar Yeremiya ya. A piɗeke à madzala gà gər a Sirus, Əbay gà Perisiya ata, aà meneye gà bazlam aaha, ika mekwere ŋgar tserdze, metsikeye nda bazlam, mewetseye gà wakita, nda megweɗe. I fata ya ka, aka tsikeye gà bazlam ata: 2 « Araha, na dukw ana Sirus Əbay gà Perisiya a gwa ya: ‹ BATSAH kwa ŋa Mbulum ana i gər ŋa i mbulum a, aka viliŋ mekwere gər ahəɗ fit a ahər gà, ŋgat ŋa nda gər ŋgar, aka zla iye aà məmàr, à batsah ga ŋgar ata i Yeruzalem, ika ahəɗ Yahuda ya, a bəra. 3 Ku mege weke na ika magər kurum, a dara i gwala ŋgar a ka, iye ihər i gweɗe a ter a, ta mbəɗ gər a Yeruzalem aka ahəɗ Yahuda. I fata, na ti ta me a à mazlazla dər à ga mbulum BATSAH kwa ŋa, Mbulum gà Isərayel, Mbulum ana i Yeruzalem a! Gà gər a gwa ka, Mbulum tar mandza nda tar! 4 Ku mege i ŋga, i təv ana gà Isərayel, tar iɗəm a ka, gà mburma ana ika gà tseke tar ata ya, ti zleke a tar, aà mandza tar gà ndzemde məvə̀ɗa kur siŋgwe, nda gura, dite nda gà asiŋ gà ŋgwal gà dukw ŋgiɗ pampam. Ti dze ter a asa ka, gà dukw gənaw nda gà dukw taf ana, ta vile a nda meziwe gà gər tar, aà ga mbulum batsah ŋa ata i Yeruzalem a› . »

5 I fata ya ka, gà ɓəzla ga ana i Yahuda ya, nda ana i Bendzamen a, gà ɓəzla məbatsa duwa a Mbulum, nda gà gwala Lewi, ta mah ba aà mede, aà məma aà ga mbulum BATSAH kwa ŋa batsah ŋa ata a bəra a Yeruzalem. Gà taŋa tserdze ya ka, Mbulum aka piɗeke a a tar, ta mah ba aà mede fit tserdze. 6 Gà ɓəzla hərmaga tar fit tserdze, tə zlak tar, nda madzaya a tar, gà dukw maslàwa ana ta və̀ɗ nda ndzemde məvə̀ɗa kur siŋgwe ya, gà gura, nda gà ŋgwal gà dukw ŋgiɗ pampam. Tə dzaya a tar gà dukw gənaw asa. Gà ŋgwal gà dukw taf ŋgiɗ ana tsakala ŋa hinne ya. Dite asa ka, nda gà dukw taf ŋgiɗ ana pam pam ta vəl nda meziwe gà gər tar a.

7 Akahər ŋa ata ka, Nevuhadnetsar aka mbər mendzike gà dukw maslàwa ana i batsah ga mbulum BATSAH kwa ŋa ata i Yeruzalem a, aka dza a huɗ ga gà mbulum ŋgar. Əbay Sirus a yaha akaba gər a gà dukw ata fit kweleŋ. 8 I fata ya ka, Sirus Əbay gà Perisiya ata, a vəl məpala ahəm a Mittiridat mala makasla gà limana, dite, a ndzəkara gà dukw maslàwa ata ya, a ɗama, a dzar ahər a Sesbatsar mala makwara ahəɗ gà Yahuda. 9 Araha na wakita maɗama zləm gà dukw ata ya: Gà periŋte gura 30, gà periŋte ndzemde məvə̀ɗa kur siŋgwe 1 000, gà awìs 29. 10 Asa ka, gà səra gura 30, gà səra ndzemde məvə̀ɗa kur siŋgwe 410 dite gà kazlaŋa megemir ŋgiɗ pampam dəbuw (1 000). 11 Gà dukw maslawa ata mege ŋa nda gura, nda ndzemde məvə̀ɗa kur siŋgwe ya ka, ta gaw ba fit tserdze ka, 5 400. I təv ana gà ɓəzla medwìŋè ata, tə maharaba i kwite Babila ya, aà məmbəɗa gər a Yeruzalem a ka, Sesbatsar a ndzək dər akabara gà dukw ata ya, tserdze.