2 Əbay
Ahaziya a ne Əbay gà Isərayel
1
1 I dəba məməta Əbay Ahav a ka, gà Muwabiya tə tsalaba a segeme a gər, aka gər gà Isərayel. 2 A pat duwa ka, Ahaziya a dəɗara i ga mehinne ŋgar ana ika gər ga ŋgiɗ i Samariya ya, ndaka biye mendiwek magəgər a. Mbəlak aka ndzàr hinne. A slər gà mburma, a gwaɗa tar: « Dum a təv Baal Zevuv Mbulum gà mburma ana i Ekrun a, aà masəra dər ka, i sle a aà mimbile i mbəlak mediɗe ga aha ya ibam a » 3 Ama gawla Mbulum BATSAH kwa ŋa a fafəl a Eliya gà Tisibiya a gwaɗar: « Hitse ka da, ka ləmum akaba gà ɓəzla məmaya à labara Əbay gà Samariya kə gwaɗa tar ‹ Wànà Mbulum riŋ i Isərayel tsiye na ki dwim a aà matsama duwa ka, a təv Baal Zevuv mbulum gà Ekrun a ›? 4 Aɗaba taŋa, araha na dukw ana BATSAH kwa ŋa a gwaɗa a Əbay kurum a. ‹ Ki hitsera ika sləlah ana kər mahəna ŋa ikəka ya asa tsa, nda ndzer ki mitiŋ a › . » Dite Eliya a da aba.5 Gà ɓəzla məma à labara ata ta mbəɗara gər a təv Əbay ya, a gwaɗa tar: « Aɗaba la na ka mbəɗum dər akabara gər a? » 6 Ta gwaɗar aaka: « Wele duwa a dara a təv mə̀r a ka, a gwaɗar mə̀r: ‹ Dum, mbəɗum gər a təv Əbay ana a slərra kurum a, kə gwaɗumar: ‹ Araha na dukw ana BATSAH kwa ŋa a gwa ya: « Wànà Mbulum a riŋ i Isərayel tsiye na ki dwim a a matsama duwa ka, a təv Baal Zevuv mbulum gà Ekrun a. Aɗaba taŋa, ki hitsera ika sləlah ana kər mahə̀na ŋa ikəka ya asa tsa, nda ndzer ki mitiŋ a › . » 7 Əbay Ahaziya a gwaɗa a tar: « Wànà wele ata a dara ka ləmum akaba ya, ana a ndza dzena meme, na a tsik a kurum gà bazlam ata ya? » 8 Ta gwaɗar aaka: « Wele ata ka, petek kwiye na ikəka ya, madana ba ŋa i magər ba ya nda kwiye . » Ahaziya a gwaɗa a tar: « Taŋa ka, Eliya gà Tisibiya . »
9 Ahaziya a slər, mala aka miɗ gà sliwdze ana a kwere a gà sliwdze dzik əzləm a, tə tsala akaba a gər kwite a təv Eliya. Mala aka miɗ gà sliwdze ata a gwaɗar: « Mburma Mbulum, Əbay a gwaɗak ka: ‹ tarəra! › » 10 Ama Eliya a gwaɗa a mala aka miɗ gà sliwdze ata: « Na ki ge, iye mburma Mbulum ka, akwa ma tarəra i gər ŋa ya, ma wànà kurum ndìrɓek. Kurum nda gà sliwdze yak aka dzik əzləm a! . » Akwa a tarəra i gər ŋa ya, a wànà tar, ŋgat nda gà sliwdze ŋgar ata dzik əzləm a, ndərɓek.
11 Ahaziya a slər, mala aka miɗ gà sliwdze ŋgiɗ ana a kwere a gà sliwdze dzik əzləm a. Mala aka miɗ gà sliwdze ata a gwaɗa a Eliya: « Mburma mbulum Ahaziya a gwaɗak ka, tsəmma tarəra a! . » 12 Ama Eliya a gwaɗa a tar aaka: « Na ki ge, iye mburma Mbulum ka, akwa ma tarəra i gər ŋa ya, ma wànà kurum ndərɓek. Kurum nda gà sliwdze yak aka dzik əzləm a! . » Akwa a tarəra i gər ŋa ya, a wànà tar, ŋgat nda gà sliwdze ŋgar ata dzik əzləm a, ndìrɓek. 13 Ahaziya a slər, məmakər mala aka miɗ gà sliwdze ana a kwere a gà sliwdze dzik əzləm a asa. I təv ana məmakər mala aka miɗ gà sliwdze ata a ndzeha ya ka, a dza gurmits a bəɗ aka miɗ Eliya, a ger kamkam, a gwaɗar: « Mburma Mbulum miyak à mesife gà nda biy gà mburma aaha dzik əzləm, mə̀r ika miɗ yak a te! . » 14 I sər akwa aka tarəra i gər ŋa ya, aka wànà gà malahalah gà ɓəzla aka miɗ gà sliwdze ata sula ya nda gà sliwdze tar. Ama kinehe ka, i gək kamkam mesak à iye nda mesife te. 15 Gawla Mbulum BATSAH kwa ŋa a gwaɗa a Eliya: « Tarum akaba, ki ger magəɗa tsa! » Tsam ka, Eliya a hitse, tə tar akabara nda gà ŋgat a, a təv Əbay ya. 16 Eliya a gwaɗa a Əbay, araha na dukw ana BATSAH kwa ŋa a tsik a: « Aɗaba kàa slər gà ɓəzla məmaya à labara aà matsama duwa a təv Baal Zevuv mbulum gà Ekrun. Wànà Mbulum riŋ i Isərayel tsiye na aà matsama ahər bazlam a? Aɗaba taŋa, ki hitsera ika sləlah ana kər mahə̀na ŋa ikəka ya asa tsa, ndzer ki mitiŋ a''.
17 Ahaziya a mət, kərga na BATSAH kwa ŋa a tsik a Eliya ya. Yehuram damər ŋgar a ndza aka təv mendze mekwere ŋgar, i huɗ mive masula ŋana Yehuram kəla Yehusafat Əbay gà Yahuda, a ge a ika mekwere ya, aɗaba ana kəla ŋgar riŋ tsiye.
18 Gà asiŋ gà labara Ahaziya, nda gà dukw ana a geye ya, ana tar riŋ mewetse ŋa i wakita labara gà Əbay gà Isərayel ibam a?