2 Əbay 2

Mbulum a zla Eliya a gər ŋa, a vəl təv mendze ŋgar a Elize

1 Araha, meme na BATSAH kwa ŋa a tsəl à Eliya a gər ŋa, a Mbulum nda vàràmà ya.

A pat duwa ka, gà Eliya nda Elize tə da i Gilgal a, 2 ti ndze a aà vatwa ka, Eliya a gwaɗa a Elize: « Kamkam, ndza a faha, aɗaba BATSAH kwa ŋa aka slər iye a Betel . » Elize a gwaɗar aaka: « BATSAH kwa ŋa riŋ nda mesife, dite kər riŋ nda mesife, i miseke a aà kər a tsa. Tsam ka, tə da akaba məma a Betel. 3 Gà ɓəzla sik gà ɓəzla məma à guma Mbulum ana i Betel a, tə dara a təv Elize ya, ta gwaɗar: « Wànà ka sər tsiye, mbakum ka, BATSAH kwa ŋa a tsìl a a batsah yak ŋa, a Mbulum a gər ŋa ya? » Elize a gwaɗa a tar aaka: « Iye tekeɗe ka, i sər mbaŋa, dzum tiytiy! . » 4 Eliya a gwaɗa a Elize asa, kamkam ndza ɗa a faha, aɗaba BATSAH kwa ŋa aka slər iye a Yeriku. Elize a gwaɗar aaka: « BATSAH kwa ŋana riŋ nda mesife , dite kər riŋ nda mesife, i miseke a aà kər a tsa » Tsam ka, tə da akaba a Yeriku. 5 Gà ɓəzla sik gà ɓəzla məma à guma Mbulum ana i Yeriku a, tə dara a təv Elize ya, ta gwaɗar: « Wànà ka sər tsiye, mbakum ka, BATSAH kwa ŋa a tsìl a a batsah yak a Mbulum a gər ŋa ya?» Elize a gwaɗa a tar aaka: « Iye tekeɗe ka, i sər mbaŋa, dzum tiytiy! . » 6 Eliya a gwaɗa a Elize asa, kamkam ndza ɗa a faha, aɗaba BATSAH kwa ŋa aka slər iye a guva dulwa Yurdan. Elize a gwaɗar aaka: « BATSAH kwa ŋa riŋ nda mesife, dite kər riŋ nda mesife, i miseke a aà kər a tsa » Tə da akaba sula mə̀ma a guva dulwa Yurdan.

7 Gà ɓəzla sik gà ɓəzla məma à guma Mbulum dzik əzləm (50), tə zazam tar, ti ndzeha ka, ta hitse izaɗ zaakwa aà gà Eliya nda Elize, ana tar ta hitse aka gìgìze dulwa Yurdan a. 8 Eliya a zla ikaba baramusa ya, a paɗa a lak dər a yam, yam a sàs ba ikaba ya. Tə tsala iɗəm a sula məma ahəɗ sifek sifek. 9 I təv ana tə tsala iɗəm, aka lide ŋgiɗ a ka, Eliya a gwaɗa a Elize: « Wiz dukw ana ka waya i vəlak, ələk ŋana ti te zle a iye, i təv yak a? » Elize a gwaɗar aaka: « Kamkam i waya ka, mezite mesife ana kà mawa dər à guma Mbulum a, ma dara aka gər gà ya, medzige sula, ma za biy yak. ^ª 10 Eliya a gwaɗar aaka: « Ka wiz ka, dukw ana mawùraba ŋa ya. Ama na kàa ŋgetiŋ tàa zla iye aà kər a ka, tàŋa ka, dukw ana ka wiz a ka, ki ŋgetiŋ a. Tsəka a ge a ba tsa . »

11 Akahər ana tar riŋ aà vatwa ta fefile a dər a ka, piris akwa, a ŋgile a à muta piris akwa tə sas ikaba tar a. Tsara ka, Eliya a tsəl a gər ŋa a mbulum nda vàràmà. 12 Elize a ŋgatar kərga taŋa ya ka, a wideye a gwa: « Tsir gà! Tsir gà! Gà muta piris nda gà ɓəzla matsala aaka ŋa ana i Isərayel a! . » I təv ana a ŋgatar asa tsiye ka, a gəs petek ŋgar a kwiyaɗa dər ikaba ya, medzige sula. 13 A zla baramusa ana Eliya a dəɗara ihər ika dzahdzah a, a mbəɗ gər aà guva Yurdan a a hitse aka gìgìze. 14 A zla baramusa ana Eliya a dəɗara ihər ika dzahdzah a, a lak dər a yam ata a gwa: « BATSAH kwa ŋa Mbulum Eliya dzena i ŋga? » A lak dər a yam ata asa, yam ata a sas ba ikaba ya, dite na Elize a tsə̀lara iɗəm a ya.

15 Gà ɓəzla sik gà ɓəzla məma à guma Mbulum ata i Yeriku tar mehitseŋa sər aka Elize ya, ta ŋgataha a dukw ana Elize a ge ya ka, ta gwa: « Mezite mesife Eliya mala məmà à bazlam Mbulum, ika Elize . » Tə dara aà maləma akaba nda gà ŋgat a, tə dza gurmits a bəɗ aka miɗ ŋgar. 16 I dəba ŋa ya, ta gwaɗar: « Gà slagama gà mburma ɗa ika magər mə̀r, gà ɓəzla meslire yak dzik əzləm. Vəl à tar vatwa tə da a mayaha batsah yak ŋa! Gà biy tsəka, mezite mesife BATSAH kwa ŋa, aka zla aka ya ba ŋgat aka gər kwite ya, kige tsa a tùlwah a. Ama Elize a gwaɗa a tar aaka: « Ka slərum tar tsa » 17 Ta mə̀r aba aà metsiker bazlam ata hiywe, mandəvandəv ŋa ka, a gwaɗa a tar: « Slərum tar pəra! » Tə slər gà ɓəzla slagama ata dzik əzləm a, ti yaha Eliya mehinne makər, ama tàa ŋgat tsa. 18 Ta mara a təv Elize a Yeriku a, a gwaɗa a tar: « Wànà Yàa gwaɗa a kurum tsiye, ka dum tsiye! »

19 Gà mburma ana i huɗ kwite Yeriku a ta gwaɗa a Elize: « Batsah mə̀r ŋa, samata kwaŋ, mendzena ɗa i huɗ kwite mə̀r a ka lele, ama yam ana ɗa ya ka, ŋgwal ŋa tsa, ahəɗ kwite mə̀r a gewa duwa tsa . » 20 Elize a gwa: « Ndwimiŋara sləwul aka awiya kukwah a . » Tə ndàr aakaha. 21 Elize a da aka biye yam ana a ŋgìz a ùwaɗ ùwaɗ a, a nda aɗəm sləwul ata a gwa: « Araha na dukw ana BATSAH kwa ŋa a gwa ya, Yàa ne aà yam aaha tsəɗaŋŋa. A betse a mburma asa tsa, dite ahəɗ tekeɗe ka, a ge a duwa kuɗa. 22 Yam ata a ne tsəɗaŋŋa haa mbakum, kərga ana Elize a tsik a.

23 Elize a da i Yeriku a, a Betel. Akahər ana riŋ a de a ika vatwa ya ka, gà ɓəza gà gawla tə dara i huɗ kwite ya, tə sawla aà ŋgat, ta gwaɗar: Mala mandə̀lasla da, mala mandə̀lasla da. 24 A mbəɗ aba a dəba, a pər aà tar a vəl a tar mezelme nda zləm BATSAH kwa ŋa: I fata ya tsara ka, gà kəra dala sula tə dara i ga ɗaf a, tə sasa ikaba i magər gà ɓəza gà gawla ata ya, dzik faɗ gər ŋgar sula (42). 25 I dəba ŋa ya ka, Elize a da a gər kwite Karmel, i fata na, a mbəɗara gər a Samariya ya.