2 Əbay 3

Yehuram a ne Əbay gà Isərayel

1 I huɗ mive makurwa gər ŋgar tsamakər (18) ŋana Yehusafat Əbay gà Yahuda a ge a ika mekwere a ya ka, Yehuram kəla Ahav a ne Əbay gà Isərayel, i Samariya, a kwara mive kurwa gəra sula (12). 2 A ge ka, dukw ana a da a gər a BATSAH kwa ŋa tsiye. Ama kəla ka, aka ge kamala gà dede ŋgar nda mama ŋgar ana ta gewa ya tsa. A ndzah kur mazləba à Baal ana dede ŋgar a hitse dər a. 3 Ama a dan ba ka, bakal Yerubuwam kəla Nevat ana a ge, a bana aɗəm gà Isərayel a, aka mbə̀ɗar dəba tsa.

4 Mesa Əbay gà Muwab, mala magala gà dukw gənaw. A dzawa hadam ŋa a Yehuram Əbay gà Isərayel, kəla mive ka, gà ɓəza gà təmaŋ dəbuw dərməka (100 000). Dite gà hagwala tekeɗe dəbuw dərməka (100 000), nda gasgas ŋa dze. 5 I təv ana Ahav a mət a ka, Əbay gà Muwab a tsalaba à segeme a gər aka gər Əbay gà Isərayel. 6 Əbay Yehuram a dara i Samariya aà maɗama gà sliwdze gà Isərayel. 7 I dəba ŋa ya, a slər gà ɓəzla məmaya à labara ŋgar a təv Yehusafat Əbay gà Yahuda, a gwaɗar: « Əbay gà Muwab aka tsalaba à segeme a gər, aka gər gà, wànà ki dere, ki teme a aà mege guvəl aà Muwab a? » Əbay gà Yahuda a gwaɗar aaka: « I dehiŋa, mə nda iye nda kər ka, ilik, gà sliwdze gà ka, gà biy yak, gà piris gà tekeɗe, gà biy yak mbaŋa . » 8 A gwaɗar aaka asa: « Ndaka vatwa wara na ki teme a dər a? » Yehuram a gwaɗar aaka: « ndaka vatwa ana a da ndaka mandazla Edum a . »

9 Əbay gà Isərayel, Əbay gà Yahuda, aaha Əbay gà Edumiya tə da.Ta ge aà vatwa mehinne təsəla, tàa ŋgat yam aà mese gà sliwdze nda gà gənaw tar ana ti zezeme a tar a tsa. 10 Əbay gà Isərayel a gwa: « E E eh! a ge a ka, BATSAH kwa ŋa a yaha gər a gà Əbay aaha makər a ka, aà mandza tar ahər gà Muwabiya! » 11 Yehusafat a gwa: « Wànà mala məma aà guma BATSAH kwa ŋa ɗa ika magər kwa i faha te tsiye, mewize a kwa dukw ana BATSAH kwa ŋa a waya a ge a ya? » Ilik ŋa i liwiŋ gà ɓəzla meslire Əbay gà Isərayel a, a gwa: « Elize kəla Safat naha ɗa i faha, mala sik Eliya ana bise ya . » 12 Yehusafat a gwa: « Wele ata ka, bazlam BATSAH kwa ŋa i ba ŋgar . » Tsam ka, Yehusafat Əbay gà Isərayel, Yehusafat, aaha Əbay gà Edumiya tə da a təv Elize. 13 Elize a gwaɗa a Əbay gà Isərayel: « Dukula na ika màgər mà ya ? Da ka təv gà ɓəzla məma à guma mbulum dede yak, kige tsa aà gà ɓəzla məma à guma mbulum mama yak! » Əbay gà Isərayel a gwaɗar aaka: « Awaŋ, aɗaba BATSAH kwa ŋa a yaha gər, a gà Əbay aaha makər a ka, aà mandza tar ahər gà Muwabiya . » 14 Elize a gwa asa: « BATSAH kwa ŋa riŋ nda mesife, ŋgat na mala aka miɗ gà sliwdze ana, iye riŋ ihər i gere a meslire ya. I fefileke a ka, aɗaba i ge zìrwe ka, a Yehusafat Əbay gà Yahuda tsəka, i dze a kər a zləm tsa, i fire a aà kər a tsidze. 15 Ama kinehe ka, slirwimiŋara mala ndaraw a. Akahər ana mala ndaraw ata riŋ a dze gandzavəl a ka, ndzəɗa BATSAH kwa ŋa a dara aka Elize ya. 16 Dite a gwa: « Araha na dukw ana BATSAH kwa ŋa a gwa ya, leywim biye a dulwa aaha hinne. 17 Aɗaba araha na, dukw ana BATSAH kwa ŋa a gwa ya: Ki tserekwim a miɓizle a himbiɗ tsa dite ki ŋgetwime a a yam ana a dze ya tsa. Ama kəla ka, yam a rehe a dulwa aaha, ki slwime a aà mese ŋa, kurum nda gà dukw gənaw kurum. 18 Taŋa ka, dukw taf masakəŋa na i təv BATSAH kwa ŋa ya. A dze kurum a, gà Muwabiya ahər kurum asa. 19 Ki mbezleywim a à gà kwite ana malawaraŋa nda zlagam a, nda gà huɗ gà kwite ana gà ŋgwal ŋa ya fit, ki dzeywim a gà ŋgwal gà dizl ɗaf ana ta wuwa ya fit. Ki mbìseywim a à gà biye yam fit. Ki ta pesleywim a gà gurum, a gà ŋgwal gà guvah ana ta fata ya ya fit . » 20 Akahər məvəla dukw taf matawala fəla ana i mekwede ya ka, yam a dzəba aà mazlala ara ndara i Edum a, yam ata a rah aka ahəɗ kwite ata fit.

21 I təv ana gà Muwabiya tə sər aba, gà Əbay makər tàa dara, aà mege aà tar guvəl a ka, ti yaha gər a gà mburma ana mive tar mendzike dukw ahər guvəl ide ya, nda gà na tə za tar nda mive ya. Ta hitse aka kwiye. 22 I mekwede ŋana gà Muwabiya ta hitse a mbulum a ka, maŋgə̀h pat, a pàt ika gər yam a, ta ŋgat a a yam ata ika miɗ tar a ka, a ndza ndwùzzwa kamala məmbəz a. 23 Tə dzəba aà Mewideye ta gwa: « Naha ka məmbəz! a ge a ka, gà Əbay nda gà sliwdze tar, tàa bats ba ika magər tar nda masalama. Kwa gà Muwabiya kinehe ka, takwa a mandzə̀kabara gà limana tar a . » 24 Ti ndzeha a təv mandzəba gà Isərayel ka, gà Isərayel ta hitsera aà tar, aà mege guvəl a, ta bats gà Muwabiya ana ti tize a ika miɗ tar a. Tə zazam gà Muwabiya ndisl a ahəɗ kwite tar, ta bats tar . 25 Ta mbazlaya aà gà huɗ gà kwite tar, ku mege weke a tapaslaya gurum, tə ràhaya dər a gà guvah tar ana ta fata ya ya fit. Ta mbasaya a gà biye yam fit, tə dzaya à gà ŋgwal gà dizl ɗaf tar ana a wuwa ya. Na zehe ka, huɗ kwite Kir-hareset pəra, ama gà sliwdze ana ta gewa guvəl nda mekwìrkwìze ya, tə lawara, ta mbazla dər. 26 I təv ana Əbay gà Muwabiya a fər, guvəl ata aka dəɗ a taraha ya ka, a pala gà sliwdze dərməka təsəla (700), gà na ta gewa guvəl nda masalama ya, aà maŋgata vatwa ser aha aka Əbay gà Siriya, ama tə sle tsa. 27 Tsam ka, a zla maləkwara kəla ŋgar ana a ti zle a təv mendze mekwere ŋgar mba zləmana ya, a vəl aà dukw taf matawala fəla ana tə dulawaha a mbulum fit kweleŋ a, aka gər zlagam. I fata ya ka, a vəl batsah matsəɓatsəɓ a gà Isərayel hinne, ta miyak à tar, ta mbəɗ gər a ma, aka ahəɗ kwite tar.