2 Əbay 4

Elize a zlak madakwa məkəs duwa

1 A pat duwa, məkəs mala sik gà ɓəzla məma à guma Mbulum a tuwa aàba a Elize a gwaɗar: « Mala meslire yak, zal gà aka mət, kər ka sər mala meslire yak ka, a ge magəɗa a BATSAH kwa ŋa. tsaatsa araha mala gwedere ŋgar a dara aà magəsa gà ɓəza sula ya, à mene aà tar gà ɓele ŋgar . » 2 Elize a wiz ahər: « Dukula na i sle a aà megike a tsik a ? Tsìkiŋ dukw ana riŋ aà kər i ma yak a? Ɓele yak ka, duwa a riŋ i ma ŋgar tsidze fit kweleŋ, say kwalaba mal duwa pər a . » 3 Elize a gwaɗar aaka: « Daha ta wizeyarra gà mesìgìre ana duwa iɗəm tsiye, aà gà ɓəzla hərmaga yak a fit, zləməŋa na ki ŋgete a ya. 4 I təv ana kàa da a ma ya ka, hə̀ndə̀kum aba a ga nda gà ɓəza yak. Ka dzaya mal a gà mesìgìre ata. Kəla aà dis ana aka rah a ka, ki tikewa aba a tsaka ya. 5 I fata ya ka, məkəs ata a da aà Elize ya, a ta hə̀ndə̀k aba a ga, tar nda gà ɓəza ŋgar fit. Gà ɓəza ŋgar tə ndzàwaraha aà gà mesìgìre ata, a ràhayawa aɗəm a mal. 6 I təv ana gà mesìgìre ata, tə ràhaya fit a ka, a gwaɗa a kəla ŋgiɗ ilik: « Viliŋara mesìgìre ŋgiɗ a asa tsiye? » A gwaɗar aaka: « Mesìgìre ɗa asa tsa » Tsam ka, mal a ŋgəz asa tsa. 7 Məkəs ata a dara a ɗamar dukw ana a ge ba ya, a mburma Mbulum. Mburma Mbulum ata a gwaɗar aaka: « Da, ka dzawa a gà mal ata, ka pəl dər aàba gwadere yak a. Dukw ana aka zehe ya ka, ki zemwiweme a dər duwa nda gà ɓəza yak.

Elize a zlak məkəs duwa i Sunem

8 A pat duwa ka, Elize a da a Sunem. Məkəs duwa riŋ i fata, mala limana, a hamar hinne aà ma ta zəm dukw mezime i ma ŋgar a. A gər pat ŋa ata ya, Elize aka da nda taŋa ya ka, a dawa a mazəma ɗaf a ma ŋgar. 9 Məkəs ata a gwaɗa a zal ŋgar: « I sər ka, wele aaha a dawara a mà ma, ya ka, ŋgat ka, mburma Mbulum ndzer. 10 Ge mar kəla meɗìkwer aka gər ga ŋgiɗ. Ki dzèmer a aɗəm a gà sləlah, tabel, təv mendze nda lalampa. Aka təv ana aka dara a mà ma ya ka, a ndzewebe a i fata.

11 A pat duwa Elize a daha a mà tar ka, a tsəl a ga ata, ika gər ga ŋgiɗ a, a həna aɗəm. 12 I dəba ŋa ya, a gwaɗa a mala meslire ŋgar Gehazi: « Zal a məkəs gà Sunemitiya aka » A zalaraha a daha a hitse aka miɗ Gehazi. 13 Elize a gwaɗa a Gehazi: « Gwaɗar ka, kàa sewer are agəra mə̀r ka, hinne. Dukula na mì gik a ? Wànà mì ta fafəl aka gər yak, a Əbay kige tsa a mala aka miɗ gà sliwdze ya ? » Məkəs ata a gwaɗar aaka: « Awaŋ kəkaaha kurum hinne, iye ka, mandza ŋa, ika magər gà mburma gà ya . » 14 Elize a gwa: « Dukula na ki gemere a ya? » Gehazi a gwaɗar aaka: « Dukuməŋa ka, Kəla ŋgar riŋ tsa, dite zal ŋgar aka ge mandawal . » 15 Elize a gwa: « Zalaraha! » A zalaraha, a daha a hitse aka hərmaga. 16 Elize a gwaɗar: « Ndiziŋ kərga naha ya ka, kəla a ge a ika ahər yak . » Məkəs ata a gwaɗar: « Awaŋ, awaŋ Batsah gà ŋa, mburma Mbulum. Ka sawla a ɓele yak tsa . » 17 I dəba ŋa ya ka, məkəs ata aka ŋgat kəla. A wa kəla ata asləka ŋa, tits aka məpasla ahər ana Elize a tsiker a.

18 Kəla ata a gəl ba. A pat duwa ka, kəla ata a da a təv dede ŋgar a dala, tar riŋ ta ge a megemir nda gà ɓəzla məpalara duwa i dala ya. 19 Zàmma tsəka kəla ata a dzəba aà Mewideye a gwaɗa a dede ŋgar: « Gər gà! gər gà! » Dede ŋgar a gwaɗa a mala meslire ŋgar ilik: « zlaraha a mama ŋgar . » 20 Mala meslire ata, a zlaha kəla ata a mama ŋgar, mama ŋgar a tike aka sik haa magər pat, i dəba ŋa ya ka, a mət. 21 I fata ya ka, a da, a ta mehinne dər aba aka sləlah Elize mburma Mbulum a. A hə̀ndə̀k ahəraha, a dara a bəra ya. 22 A zalaha aba, a zal ŋgar a gwaɗar: « Kamkam sliriŋara mala meslire yak a ilik, nda hwezeŋè ya! I vele a dər tsəmma, a təv mburma Mbulum, i meriŋa. » 23 Zal ŋgar a gwaɗar: « Agər la na ki de a, a təv ŋgar mbakum a? kwets aka ndze a kəla kiye tsa, kige tsa pat Sabba tsa asa ya? . » Məkəs ata a gwaɗar aaka: « Biy zay! . » 24 A dza lidza aka hezweŋe, dite a gwaɗa a mala meslire ŋgar: « Tamà tsəmma tsəmma, ka hitse aà iye aka magər gà vatwa tsa, say na Yàa tsikik a . » 25 A da a təv mburma Mbulum aka gər kwite Karmel.

I təv ana mburma Mbulum a ŋgataraha diriŋ a ka, a gwaɗa a mala meslire ŋgar Gehazi: « Naha ka, məkəs gà Sunemitiya ata . » 26 Kamkam ŋgəzlaraha gər aà vatwa, ka wiz ahər: « kər riŋ zay beye? Zal yak riŋ zay zay beye? Dite kəla yak ana riŋ zay te beye? » Məkəs ata a gwaɗar aaka: « Mər riŋ zay . » 27 A ndzeha a kwite a təv mburma Mbulum ka, a gəs sik ŋgar. Gehazi a sərkàha, a waya a lìmere a ihər a ka, mburma Mbulum a gwaɗar: « Miyak à ŋgat, ar ka, marahaŋa nda matsəɓatsəɓ. Ama, BATSAH kwa ŋa aka kah aà iye dite aka petiŋ a dukw ana a gər ba gər a tsa . » 28 I fata ya ka a gwa: « Wànà Yàa wiz aà kər kəla ya, batsah gà ŋa ya? Yàa gwaɗak tsiye ka, kà sasa za a ɓele yak tsiye? » 29 Elize a gwaɗa a Gehazi: « Mah ba yak, ka da, ka zla dər zəva gà aà ahər. Na bəla kàa ləmum nda wura aà vatwa ka, kə ger wusa tsa. Na wura aka gək wusa ka, ka ta fafəlar aaka tsa. Kàa ndzeha ka, kà tike zəva gà aaha aka yam are kəla ata. 30 Ama məmər kəla ata a gwaɗa a Elize: « BATSAH kwa ŋa riŋ nda mesife, dite kər riŋ nda mesife mbaŋa. I sle a aà mede a za kər tsa! . » Elize a zazam ŋgat . » 31 Gehazi a lah a à tar, a tike zəva aka yam are kəla ata. Ama aka tsaraka miɓizle mesife tsa, aka ŋgatar a ɓìzlebe aba a tsa. Gehazi a mbəɗara gər, a təv Elize ya, a gwaɗar: « Kəla ata ka, aka ma arəv tsa . »

32 I təv ana Elize a ndzeha a ma ya ka, kəla ata riŋ ɓə̀laffa məməta ŋa, ika sləlah ŋgar. 33 Elize a pəts a ga a hə̀ndə̀kaha aba tar nda kəla ata, a hama a BATSAH kwa ŋa. 34 A həna aka kəla ata, a ndup tipis ŋgar aka bazlam kəla ata, are ŋgar ser aka are kəla ata, a dza gà ahər ŋgar akahər kəla ata, a ndza makərka aaka ŋa ikəka, ba kəla ata a dzəba aà mandza huzzwa. 35 A hitse a ikəka ya, a dzəba aà meseweye riŋ i ga ata, da a faha, da faha. A mbəɗ gər a kirik aaka asa. I fata ya ka, kəla ata a dzəba aà megeye wirdise wirdise sik tə̀sə̀la, tsam ka, kəla ata a zla ika are ya. 36 Elize a zalaha a Gehazi, a gwaɗar: « Zalaha a məkəs gà Sunemitiya aka . » Gehazi a zalar, a da a təv Elize, a gwaɗar: « Zla kəla yak . » 37 Məkəs ata a daha a kal aba aà sik Elize, luz yam are aka ahəɗ, dite a zla kəla ŋgar, a dara a bəra ya.

Elize a ne a à dukw mezime ana mawur ihər a, a ŋgwal ŋa

38 Elize a mbəɗara gər a Gilgal a. Tsaatsa ka, may riŋ ika ahəɗ ata. Gà ɓəza sik gà ɓəzla məma à guma Mbulum, riŋ mandzaŋa ika miɗ ŋgar. A gwaɗa a mala meslire ŋgar: « Tike batsah mesigire aka, aka akwa, kə takwaslakwara ala ya . » 39 Ilik aà tar a, a da a mayahara ala i dala ya. A le a ava mezleliŋ, a ŋgə̀lara mawa ŋana aà ala ya, arah dər a petek ŋgar, a da dərra a ma ya, a wats, a nda a mesìgìre. Wura a sər dukw ana a nda aɗəm a tsa. 40 Tə ndaɗa ala ata a gà mburma, i təv ana ta mə̀ndzər ala ata ya ka, tə dzəba aà Mewideye ta gwa: « Mburma mbulum ala aaha i mesigire ya ka, mawur ihər . » Ti sle aà mazəma ŋa tsa. 41 Mburma Mbulum a gwa: « Ndemiŋara gufa ya! » A nda gufa ata a mesìgìre a gwa: « Ndaɗum a gà mburma tə zəm. Ala ana i mesigire ya ka, mawur ihər asa tsa.

Elize a ne a dukw mezime ana hinne tsiye hinne

42 A pat duwa ka, wele duwa a dara i Baal Salisa ya. A daraha a peŋ malahalah gà dukw ana ta pala i bəɗ a: Peŋ urga dzik səla, buhwa ble awiyaŋa ana ilik. Elize a gwa: « Dzaya a mburma tə zəm . » 43 Mala meslire ŋgar a gwaɗar aaka: « Meme na i sle a aà medzeye a dukw aaha a gà mburma dərməka ya? (100) » A gwaɗar aaka asa: « Dzaya a gà mburma tə zam! Araha na dukw ana BATSAH kwa ŋa a gwa ya: ‹ Ki zemekwiŋa dite a zehe asa › . » 44 Mala meslire ŋgar a dzaya a gà mburma, tə zəm haa a zeha tar a, kərga ana BATSAH kwa ŋa a tsik a.