2 Əbay 5

Elize a mbəl à Naaman

1 Wele duwa riŋ zləm ŋgar, Naaman mala aka miɗ gà sliwdze Əbay gà Siriya, ŋgat ka ŋgwal mburma, batsah ŋgar ŋa a zləbawa a ŋgat. Aɗaba nda ahər ŋgar na BATSAH kwa ŋa a vəl gara a gà Siriya ya. Ama sliwdze ata slagama ŋa, yam a dzar are tsiye ka, mbəlak ba ihər.

2 Gà mayahaba gər gà ɓəzla makazala mburma gà Siriya tə da a aka ahəɗ gà Isərayel, tàa gəsara dəm duwa aà ɓele ya. A gewa megemir a məkəs Naaman. 3 A gwaɗa à məkəs ana a gewar megemir a: « Na mege batsah gà ŋa, mada a təv mala məmà à bazlam Mbulum ana i Samariya ya ka, a mbile a à ŋgat i dukw məməta mbəlak ba ŋgar aaha ya . » 4 Naaman a da, a tsik a Əbay: « dukw ana dəm ata tə gəsara i Isərayel a, a tsik a . » 5 I fata ya ka, Əbay gà Siriya ata a gwa: « Haya da a Samariya, i wètsèke a dər wakita aaha a Əbay gà Isərayel . » Naaman a mah ba a ndzək dər kur siŋgwe kiliw dərməka makər (300), gura kiliw dzik ndilik (60), nda gà tumbulum kurwa, aà ahər. 6 A vəl wakita ata a Əbay, araha na dukw ana mewetse ŋa iɗəm a: « Wakita aaha i wètsek aaha ya ka, i slərakàha ka, Naaman mala meslire gà, ka mbəl à ŋgat i dukw məməta mbəlak ba ŋgar a te . » 7 I dəba ana Əbay gà Isərayel a ndəv aà medzeŋgè wakita ata ya ka, a kwiyaɗa ikaba à gà petek ŋgar a, a gwa: « Wànà iye ana Mbulum a, na i kìɗe a à mburma, dite i mbile a dər a. Na wele aaha a slərra mala mbəlak ba aaha a təv gà, aà məmbəla à ŋgat i mbə̀lak ba ŋgar. Tsarakum, pərum ahər kwaŋ, wele aha riŋ a yehe a aà iye ka, ahəm.

8 I təv ana Elize mburma Mbulum a tsaraka ka, Əbay gà Isərayel aka kwayaɗa ikaba à gà petek ŋgar a ka, a slər mburma aà magwaɗa a Əbay: « Aàmala na kə kwiyaɗa ikaba aà gà petek yak a? Naaman madara a təv gà ya, a sir a dər ka, mala məmà à bazlam Mbulum ɗa i Isərayel! » 9 Naaman a da nda gà piris, ŋgar nda muta piris ŋgar, a hitse aka biye hərmaga mada a bəra Elize. 10 Elize a slər mburma a təv ŋgar a gwaɗar: « Da! Ka ndabaya a duluv Yurdan sik təsəla. Tsam ka, ki mbiliŋa, ki ndze a tsəɗaŋŋa . » 11 Naaman, a da nda matsəɓatsəɓ ŋa, a gwa: « I zlaŋa ka, a dera a təv gà, i ga ya, a hitse a dzeŋ aka miɗ gà, a zele a a zləm BATSAH kwa ŋa, Mbulum ŋgar. A tike a ahər ŋgar aka təv ana ŋgwal ŋa tsiye, na a mbile a à iye i mbəlak ba gà ya. 12 Wànà gà duluv Abana nda Parpar ana i kwite Damas a ana, tar gà ŋgwal ŋa, ika gà duluv ana i Isərayel a, fit tserdze tsiye? Wànà i ta ndabaya aɗəm ana, i ndze a tsəɗaŋŋa tsiye? A mbəɗ aba, a da nda matsəɓatsəɓ. 13 Gà ɓəzla meslire ŋgar tə sərkàha a təv ŋgar ta gwaɗar: « Dede gà, na mala məmà à bazlam Mbulum ma tsikik dukw ana mawùra ba ŋa a za taŋa ya ana, wànà ki ge a tsiye? Na ndəna a gwaɗak, da ndabaya a duluv a pər a ka, ki ndze a tsəɗaŋŋa ya. 14 Tsam ka, Naaman a ta mendebeye a duluv Yurdan ata, sik təsəla, kamala ana mburma Mbulum a tsiker a. Kwiye ba ŋgar a ne kamala biy kəla gawla ya. Aka ne tsəɗaŋŋa. 15 Gà Naaman nda gà ɓəzla sik ŋgar ta mbəɗ gər a təv mburma Mbulum. A daha a hitse aka miɗ ŋgar, a gwaɗar: « I sər kinehe ka, Mbulum ŋgiɗ riŋ ika gər ahəɗ tsa, say na Mbulum gà Isərayel ilik tsiye. I gək kamkam, gəs dukw taf ana ɓele yak a vileke a ya . » 16 Ama Elize a gwaɗar aaka: « BATSAH kwa ŋa riŋ nda mesife, ŋgat ana iye riŋ ihər i gere a megemir a, i gə̀se a aà kər a duwa tsidze! . » Naaman a hamar dər, ama a niw ahər. 17 Tsam ka, Naaman a gwaɗar: « Kàa niw aà iye kamala taŋa ka, vəl vatwa a mala meslire yak, aà mendzək a ahəɗ kwite aaha mule sula. Kamala taŋa ya, i vilewe a dukw taf matawala fəla ana tə dulawaha a Mbulum fit kweleŋ a, nda dukw taf matawala fəla magawuba gà Mbulum nda mburma ka, a BATSAH kwa ŋa ilik, tsəka i vilelewa a gà mbulum ŋgiɗ asa tsa. 18 Ama ka, BATSAH kwa ŋa mə pəl à bakal aaha a mala meslire yak: I təv ana batsah gà ŋa, a de a a ga fəla Rimmun aà madzar gurmits a bəɗ a ka, a gis a ba aà ahər gà. Dite iye tekeɗe ka, i dze a gurmits a bəɗ. Na i təv ana Yàa da, a ga Rimmun aà madzàr gurmits a bəɗ a ka, BATSAH kwa ŋa mə pəl aà bakal ata a mala meslire yak. 19 Elize a gwaɗar aaka: « Da nda zay! . »

I dəba ana Naaman a da aà ŋgat a izaɗ a ka, 20 Gehazi mala meslire Elize mburma Mbulum a dzala: « Mala ga gà aka niw magəsa dukw taf ata Naaman gà Siriya a dzàɗar a. BATSAH kwa ŋa riŋ nda mesife, i vele be a a təv ŋgar, ndzer ka, i ŋgetere a ihər duwa ya zaakwa . » 21 Gehazi a zazam Naaman. I təv ana Naaman a ŋgataraha a veleha a təv ŋgar a ka, a ndabara ika muta piris ŋgar a tsara, a da a təv ŋgar a gwaɗar: « Zay ibam a? » 22 Gehazi a gwaɗar aaka: « Zay. Mala ga gà a slərra iye ya, a gwaɗak ka, gà ɓəzla sik gà ɓəzla məma à guma Mbulum duwa naha sula, tə dara a təv gà i kwite Efərayim a, kinehe ŋa ata, i gək kamkam dziŋ a tarəra ndzemde məvəɗa kur siŋgwe ya, kiliw dzik makər (30) nda gà tumbulum sula. 23 Naaman a gwaɗar: « Gəs ndzemde məvəɗa kur siŋgwe naha kiliw dzik ndilik (60) . » A hamar dər hinne, a dzar gà ndzemde məvə̀ɗa kur siŋgwe ata, a gà kiwa sula, nda tumbulum sula. A dza, a gà ɓəzla meslire ŋgar sula, tə laka dər Gehazi. 24 I təv ana ti ndze a Ufel a ka, Gehazi a ndzək a tar gà buhwa ata nda gà petek ata ya, a dza a ga a ma ŋgar, dite a gwaɗa a gà ɓəzla meslire Naaman ata, dum ba, tə da. 25 Gehazi ŋa, a mbəɗara gər a təv mala ga ŋgar a. Elize a gwaɗar: « Ka dara ana i ŋga ya Gehazi? » A gwaɗar aaka: « Yàa da a təv a tsa . » 26 Elize a gwaɗar: « Wànà mezite mesife ga aka petiŋ dər tsiye na akahər ana, wele ata a ndabara i muta piris ŋgar a, aà maləma akaba nda kər a? Wànà ka dzala kinehe ana, ahər mandzə̀ka gà kur siŋgwe, gà petek, gà dizl uliviye, gà guvah viŋye, gà təmaŋ, gà sla, gà ɓəzla meslire gà asləka ŋa, nda gà məkəs ŋana ya? 27 Mbəlak ba Naaman ata ka, a swite a kurumiŋa, nda gà gwala yak aà biybiy. I təv ana Gehazi a da i təv Elize ya ka, mbəlak ba ata aka sutar. Ba ŋgar a mbəɗ herre kamala aləndza ya.