Zlaba a dəɗ a yam
6
1 A pat ŋgiɗ duwa gà ɓəzla sik gà ɓəzla məma à guma Mbulum ta gwaɗa a Elize: « Fər kwaŋ, təv mayahaba gər kwa aaha ka, a sle kwa asa tsa. 2 Vəl a mə̀r vatwa, mìi de a a dulwa Yurdan, ku mege weke a sesere a aram a, ki gekwa dər ga mayahaba gər kwa ŋgiɗ . » Elize a gwaɗa a tar aaka: « Dum . » 3 Ilik ŋa ika magər tar a a gwaɗar: « Kamkam zazam gà ɓəzla meslire yak . » Elize a gwaɗa a tar aaka: « Haya ki tekwiŋa . » 4 Tə da akaba nda gà ŋgat dze, ti ndze a dulwa Yurdan ka, tə dzəba aà masasa aram. 5 Akahər ana misle ŋgiɗ ilik, riŋ a sese a aram a ka, zlaba a sukwatara ikəka, a yam a. A wideye a gwa: « Wawaya batsah gà ŋa! i zlara ka, biy mburma ya . » 6 Mburma Mbulum a gwa: « A dəɗ ana a ŋga? » A ɗifer aà təv ana a dəɗ aɗəm a. Elize a sas ahər dizl ɗaf dasl, a ye a təv ana zlaba ata a dəɗ aɗəm a, pəlŋgər zlaba ata a dara aka gər yam. 7 Elize a gwaɗar: « Zlara . » Dite wele ata a dzakakaha ahər, a zlara.Elize a gasa gà sliwdze gà Siriya
8 Akahər ana Əbay gà Siriya riŋ a ge a guvəl aà gà Isərayel a ka, tə dza akaba ahəm nda gà bàba gà ɓəzla aka miɗ gà sliwdze ŋgar a gwa: « I ge a təv mandzəba gà ka, a faka . » 9 Mburma Mbulum a slər mburma a təv Əbay gà Isərayel aà ta gwaɗar: « Ge metsehe aà mada nda təv aaka, aɗaba gà Siriya ta ge a təv mandzəba tar a fata . » 10 Əbay gà Isərayel a slər gà sliwdze aà makasla təv ata mburma Mbulum a ɗifer dər a. Mburma Mbulum aka beyar a ɗaf a Əbay ka, sik diŋ diŋ, dite na a ge ba metsehe ya.
11 Arəv a da aà Əbay gà Siriya ya, agəra dukw ata. A zal a gà ɓəzla aka miɗ gà sliwdze ŋgar a gwaɗa a tar: « Wànà ki slwime a aà metsìkwimiŋ a wele ana ɗa ika magər kwa aaha tə dzawakaba ahəm nda gà Əbay gà Isərayel a ibam a! 12 Ilik ŋa ika màgər gà ɓəzla aka miɗ gà sliwdze ŋgar a, a gwaɗar: « Wura riŋ tsa, Əbay batsah gà ŋa. Ama Elize mala məmà à bazlam Mbulum ana i Isərayel a, ŋgat ka, na a ɗamawa gà dukw ana ki tsik a, i meɗikwir, a gər yak a, a Əbay gà Isərayel a . » 13 Əbay a gwa: « Dum ka da fərum, a təv ana ar iɗəm a? I slire a mburma ti te gə̀sereŋa . » Ta gwaɗar aaka: « Ar ka, i Dutan . »
14 Əbay a slər gà sliwdze hinne nda gà piris nda gà muta piris. Ti ndzeha ndaavəɗ, tə lawara huɗ kwite ata tits. 15 Ndidwe ŋana, i mekwede hedwe ka, mala meslire mburma Mbulum, a hitse à Mbulum a dara a bəra ya ka, a ŋgat a a gà sliwdze nda gà piris nda gà muta piris, tàa lawara huɗ kwite tits. A gwaɗa a Elize: « Batsah gà ŋa, ki geme a ana meme? . » 16 Elize a gwaɗar aaka: « Ki ge magəɗa tsa, gà mburma ana tar i təv mà ya ka,tar hinne, tə za gà mburma ana nda gà tar a . » 17 Elize a dzəba aà meheme a gwa: « BATSAH kwa ŋa, kamkam hə̀ndə̀k ika are a mala meslire gà aaha ma ŋgatar! . » BATSAH kwa ŋa a hə̀ndə̀kar ika are. A fər ikaba ya ka, kwite marahaŋa nda gà piris nda gà muta piris akwa, tə lawara Elize tits.
18 Gà sliwdze gà Siriya riŋ ti de a ndara a təv Elize, Elize a dzəba aà meheme a BATSAH kwa ŋa asa, a gwaɗar: « Kamkam, hə̀ndə̀k aka are aà gà mayahaba gər gà mburma aaha. BATSAH kwa ŋa a handaka a tar aka are kamala ana Elize a wiz a. 19 Elize a gwaɗa a tar: « Vatwa ŋa ka, ndənaha tsa, Huɗ kwite ŋa ka, naha tsa. Zazamum iye, i de a aà kurum a à təv wele ana ki yehwim a ya . » A da aà tar a Samariya. 20 I təv ana ti ndze a Samariya ka, Elize a gwa: « BATSAH kwa ŋa hə̀ndə̀k ika are gà mayahaba gər gà mburma aaha ya, ta ŋgata a vatwa . » BATSAH kwa ŋa a hə̀ndə̀k a tar ika are ya. Ta fər ikaba ya ka, tar i huɗ magər kwite Samariya.
21 I təv ana Əbay gà Isərayel a ŋgata gà sliwdze ata ya ka, a gwaɗa a Elize: « Dede gà, i bats tar a . » 22 Elize a gwaɗar aaka: « Awaŋ ka bats tar tsa. Wànà na, kàa gasara gà mburma ika miɗ guvəl a, nda masalama nda lìkiɗ yak ana, wànà kà batsawa a tar asa ya? Ama ka, vəl a tar dukw mezime tə zəm nda yam tə sa, dite ta mbəɗ gər a təv batsah tar ŋa. 23 Əbay gà Isərayel a de tar batsah dukw mezime, tə zəm, tə sa yam, i dəba ŋa ya, a mə̀sak aà tar, ta mbəɗ gər a təv batsah tar ŋa. Gà mayahaba gər gà ɓəzla makazala mburma gà Siriya tàa da a aka ahəɗ gà Isərayel a asa tsa.
May a ge a i kwite Samariya
24 I huɗ mendze zaakwa ya ka, Ben-Hadad Əbay gà Siriya a yaha gər a gà sliwdze ŋgar fit tserdze. Tə da a mandza maŋgwaɓa aà kwite Samariya. 25 Batsah may riŋ a ge a i huɗ kwite Samariya, dukw mezime riŋ asa tsidze. Aɗaba tàa ndza i mandza maŋgwaɓa ka, hinne gər hezeŋwè ª ilik pəra tekeɗe ka, ti sìkime a nda kur siŋgwe dzik tsamakər (80). Mezehe kiliw za maadagwar ª tekeɗe ibam ka, ti sìkime a nda kur siŋgwe əzləm, 26 A pat duwa, i təv ana Əbay gà Isərayel riŋ a seweye a ika gər zlagam ana a lawara huɗ kwite ŋgar a ka, məkəs duwa a tuwaraha aàba: « Dara zlak iye te, Əbay batsah gà ŋa. » 27 Ama Əbay a gwaɗar aaka: « Na BATSAH kwa ŋa aka zlak kər tsəna iye ana i sle a aà mezleke a kər ana nda Dukula? Kwets gà ble nda guzum riŋ aà iye aà məvəlak tsiye . » 28 Əbay a gwaɗar aaka asa: « Dukula na ka waya ya? » Məkəs ata a gwaɗar aaka: « Məkəs aaha a gweɗiŋ ka, zlara kəla yak a, ka papəɗama mbakum, ndidwe ka, ki pepeɗeme biy gà mbaŋa . » 29 Mì de kəla gà, mì papəɗ, ndidwe ŋana ka, i gwaɗar: « Zlamara kəla yak a ka papəɗama kuɗa tsiye ka, ama a kàhaba kəla ŋgar . » 30 I təv ana Əbay a tsaraka gà bazlam məkəs ata ya tsara ka, a kwayatsa ikaba aà gà petek ŋgar a. I təv ana Əbay a ma aka meseweye ŋgar aka, gà mayahaba gər gà mburma ta ŋgataraha, Əbay ka dza akaba, petek buhwa. 31 Əbay a gwa: « Mbulum miviliŋ batsah mesewere are, na gər aka ge ika Elize kəla Safat a mbakum . »
32 Tsaatsa, gà Elize nda gà bàba ŋana riŋ mandza ŋa, i ma ŋgar. Əbay a slər mburma a təv ŋgar. Ama ələk ana, mala meslire a ndzeha a təv ŋgar ka, Elize aka mbər megweɗe a gà bàba ŋa ata: « Samatum kwaŋ, mala məbatsa mburma aaka, aka slərra mburma, aà masasa ika iye gər a. Gwim metsehe i təv ana wele ata aka dara ya ka, hə̀ndə̀kum a ga. Ka vəlumar vatwa aà madaha a ga tsa. Tsarakum! Taŋa a ɗe a i dəba ŋgar a ka təv sik mala gà ŋgar! . » 33 Elize riŋ aà mifefile mba na mala məma à labara Əbay a ndzeha ya, a gwaɗar: « Mesewere are aaha a dara ka, i təv BATSAH kwa ŋa ya. Dukula na i veve a i təv BATSAH kwa ŋa asa ya? »