2 Əbay 7

Kwite Samariya ka tàa ge ahər guvəl dite a be aà gà ɓəzla mene are ŋgar a

1 Elize a gwa: « Dzum zləm a bazlam aaha BATSAH kwa ŋa a tsik a ya, araha na dukw ana a gwa ya: Ndidwe kərga naha ya ika biye hərmaga kwite Samariya ya ka, ta kele a aà gufa kiliw kurwa gər ŋgar sula (12), aà kur siŋgwe ilik. Kilu urga dzik səla gər ŋgar faɗ (24) ka, kur siŋgwe ilik mbaŋa . » 2 Batsah mala aka miɗ gà sliwdze ana Əbay a gəsawa ba aà ahər ŋgar a, a gwaɗa a mburma Mbulum: « Ku mege na BATSAH kwa ŋa mahandaka i gà biye ana aà gəza mbulum a, ana bazlam ata na a ge a ba kamala taŋa ya ya? . » Elize a gwaɗar aaka: « Ki ŋgetere a nda are yak, ama ki zeme a dukw ata tsa . »

3 Ika biye hərmaga mada a huɗ kwite ata ka, gà ɓəzla mbəlak ba riŋ mandzaŋa faɗ, ta gwaɗa aba ika magər ta: « Aàla na, ki ndzekwe a i faha ki vevekwe məməta ya? 4 Na kə gwaɗakwa, takwa a huɗ kwite ka, may riŋ, ki metekwiŋa. Na kàa ndzakwa i faha tekeɗe ka, ki metekwe a hiywe mbaŋa. Kinehe ka, takwa a təv mandzəba gà Siriya, tə dzawa kwa a tar aba kwa, na tàa miyak a kwa nda mesife ka, ki ndzekwe a a bəra, ama na tàa bats kwa ka, ki metekwe aba pəra. 5 Nda hawa ŋana, tə hitse tə da a təv mandzəba gà sliwdze gà Siriya. Tə ndzeha ka, tə suwaya i gà təv mandzəba gà Siriya fit tserdze, ama ka, wura riŋ ilik tsa. 6 BATSAH kwa ŋa aka mbər meɗe à miɓizle mede, gà sliwdze hinne nda gà piris nda gà muta piris, i təv mandzəba gà Siriya. Ta gwaɗaba ika magər tar: « A ge a ka, Əbay gà Isərayel aka sakama gà Əbay gà Hittiya nda gà Ezipt ya, tàa dara aà mege aà kwa guvəl a. 7 Gà mayahaba gər gà sliwdze gà Siriya ta hitse, tə taz nda hawa ŋa ata, i təv mandzəba tar a. Ta məsakaya à gà ga petek tar, gà piris tar, nda gà hezeŋwè tar. Ta məsak a təv mandzəba tar kataya, tə təz ta beye a aba tar.

8 I təv ana gà ɓəzla mbəlak ba ata tə suwaya i təv mandzəba ata ya ka, ta patsa a mekiriwe ga petek, tə zem dukw mezime, tə sa dukw mese. I dəba ŋa ya, ta ndzàka ya ba, gà ndzemde məvə̀ɗa kur siŋgwe, gà gura nda gà petek, tə da mekeheye. Ta mara ta patsa a mekiriwe ga petek ŋgiɗ asa, tə ndzàkayara iɗəm gà duwa ya, tə da mekeheye asa mbaŋa.

9 I dəba ŋa ya ka, ta gwaɗa aba ika magər tar: « Naha ki gekwe a ka, dukw ana ŋgwal ŋa tsiye! Pat aaha mbakum ka, ŋgwal pat, biy məma à ŋgwal labara. Na kàa ndzàkwa dər tiytiy tsikw aà ndidwe i mekwede ka, a ne a bakal kwa. Takwa tə tsikikwa dukw aaha a bəra Əbay.

10 Ta mbəɗ gər huɗ kwite, tə zal a gà ɓəzla makasla biye hərmaga, ta gwaɗa a tar: « Mì da a təv mandzəba gà mayahaba gər gà sliwdze gà Siriya ka, wura riŋ ilik tsidze. Maa tsaraka, biye ɗa wura tsa. Na a zehe riŋ ka, gà piris nda gà hezeŋwè ana gà madanaya ŋa ya, aaha gà ga petek tar, wura iɗəm tsa. 11 Gà ɓəzla makasla biye hərmaga ata tə zalaha a huɗ ga, a bəra Əbay, ta ma à taraha a labara ata. 12 Əbay a hitse a mbulum ndaavəɗ, a gwaɗa a gà ɓəzla aka miɗ gà sliwdze ŋgar: « I ɗif a a kurum a a dukw ana gà Siriya ta gekwe a ya. Tə sər ka, may riŋ a gekwiŋa. Aɗaba taŋa, tə dara i təv mandzəba tar a, tə da a makahaba a dala, ta gwaɗa aba ika magər tar: ‹ I təv ana gà sliwdze gà Isərayel tàa dara i Samariya ya ka, ki gə̀sekwebe a tar, dite ki tekwe a a huɗ kwite tar kuɗa › . » 13 Ilik ŋa i liwiŋ gà ɓəzla meslire Əbay ya, a gwaɗar: « ndzəkəkwa gà piris aaha əzləm ti zekwèha i huɗ kwite ya. A slaka ta metiŋa kamala gà mburma ana mandzaŋa i huɗ kwite ya. Slərakwa gà mburma nda gà piris aaha, ta pərra ikaba dukw ana a ge riŋ ba ya . » 14 Əbay a dza lidza aka gà muta piris sula, a slər dər gà sliwdze, aà mazazama təv sik gà sliwdze gà Siriya, tə sərra ikaba a dukw ana a ge riŋ ba ya. 15 Tə zazam təv sik tar tsikw a dulwa Yurdan. Ta fər aka vatwa ka, gà petek riŋ səsaffa nda gà asiŋ gà dukw ana a dzawa akahər ana gà Siriya riŋ ti tize a ya. Gà ɓəzla meslire ata ta mara tə ɗama a Əbay.

16 Tsam ka, gà mburma tə dara i huɗ kwite ya, tə da a mandzakara gà duwa i təv mandzəba gà sliwdze gà Siriya ya, Kərga taŋa ya, tə dzawa a gufa kiliw kurwa gər ŋgar sula (12), kige tsa urga kiliw dzik səla gər ŋgar faɗ (24) ka, aà kur siŋgwe ilik, kamala ana BATSAH kwa ŋa a tsik a. 17 Əbay a vəl vatwa a mala aka miɗ gà sliwdze ana a gəsawa ba aà ahər ŋgar, makasla biye hərmaga mada a huɗ kwite. Ama gà mayahaba gər gà mburma ta ɓala aaka ika biye hərmaga mada a huɗ kwite ata a mət. Kamala na Elize mburma Mbulum a tsik ahər, akahər ana Əbay gà Isərayel ana a daha a təv ŋgar a 18 Kamala na Elize a gwaɗa a Əbay ya: « Ndidwe kamala naha ya ka, ti sikim a gufa kiliw kurwa gər ŋgar sula (12), kige tsa urga kiliw dzik səla gər ŋgar faɗ (24) nda kur siŋgwe ilik na ika biye hərmaga kwite Samariya ya. 19 Mala aka miɗ gà sliwdze ata Əbay a gəsawa ba aà ahər ŋgar a, a gwaɗa a mburma Mbulum a: « Ku mege BATSAH kwa ŋa mahandaka i gà biye ana aà gəza a mbulum a tekeɗe ka, bazlam ata ka, a ge a ba kamala taŋa ya tsiye . » Elize a gwaɗar aaka ka: « Ar ka, lele, ki ŋgetere a nda are yak, ama ki zime a dukw ata tsa . » 20 Dukuməŋa ka, taŋa na a le aà mala aka miɗ gà sliwdze ata, Əbay a gəsawa ba aà ahər ŋgar a. Gà mayahaba gər gà mburma ta hə̀nasla dər aà biye hərmaga mada a huɗ kwite, a mət.