2 Əbay 8

Elize a ɗif à may ana a ta ge a ba ya

1 A pat duwa ka, Elize a fafəl a məkəs ana a mbəlar a kəla ya: « Hitswìm i faha ya, kurum nda gà ma yak fit. Ndə̀zlum a təv ana ki slwime a a mendze a iɗəm tsik a. Aɗaba BATSAH kwa ŋa riŋ a zlere a may a kwite aaha ya, mive təsəla . » 2 Məkəs ata a ge kamala ana mala məmà à bazlam Mbulum aha a tsiker a. Tə ndə̀zl nda gà ma ŋgar fit aka ahəɗ gà Filistiya, tə ndza i fata mive təsəla. 3 Aka mandəvandəv mive matəsəla ŋana ka, məkəs aaha a mara nda gà ma ŋgar a ara ika ahəɗ kwite gà Filistiya ya, aka ahəɗ ŋgar a. A da mewize gà ga nda guvah ŋgar aà Əbay. 4 Akahər ŋa ata ka, gà Əbay riŋ ta fefile a nda Gehazi mala meslire Elize, mburma Mbulum. A gwaɗar: « Ɗemìŋara gà bàba gà dukw mene a à mburma ana Elize a ge ya fit . » 5 I təv ana Gehazi riŋ a ɗeme a à Əbay meme na Elize a mbəl à kəla i məməta ya ka, pəzlaŋ məkəs ana ta mbəlar à kəla ya, aka ndzeha a bəra Əbay, aà mewize a gà ga ŋgar nda guvah ŋgar. Gehazi a gwa: « Əbay batsah gà ŋa, məkəs ana Elize a mbəlar à kəla i məməta ya ka, tar aaha nda kəla ŋgar . » 6 Əbay a wiz a məkəs ata, dite a ɗamar gà dukw ana a ge ba ya fit. Əbay a vəl vatwa a mala aka miɗ gà sliwdze ŋgar, ilik a gwaɗar: « Ta mar aà gà dukw ŋgar fit, nda gà dukw ana ta gewa i guvah ŋgar a, daga a gər ana a da i faha ya, ndisl a pat ana mbakum a.

7 A pat duwa ka, Elize a da a Damas, tsaatsa, Ben-Hadad Əbay gà Siriya ka, ŋgwal ŋa tsa. Ta gwaɗa a Əbay: « Mburma Mbulum aka dara ndisl a faha ya . » 8 Əbay a gwaɗa a Hazayel: « Ndzək gà dukw taf aaha, ka da dər a təv mburma Mbulum. Kə gwaɗar: « Mewiz aà BATSAH kwa ŋa, aà masəra dər ikaba ya ka, wànà i mbile a i dukw məməta gà aaha ya ibam a? » 9 Hazayel a da a təv Elize, a ndzək dər gà dukw taf, gà ŋgwal gà dukw ana i Damas a, a dzaya aka gà zligweme dzik faɗ, a daha a hitse aka miɗ Elize, a gwaɗar: « Kəla yak Ben-Hadad Əbay gà Siriya a slərra iye a təv yak a, a gwaɗak ka: ‹ Wànà i mbile a i dukw məməta gà aaha ya ibam a ›? » 10 Elize a gwaɗar aaka: « Da gwaɗar ka, ki mbile a tsa. Aɗaba BATSAH kwa ŋa aka petiŋ dər ka, ki mitiŋa . » 11 Mburma Mbulum a fər aà Hazayel ndaslsla zàkwayiya, tsam ka, a dzəba a tuwa. 12 Hazayel a gwaɗar: « Aɗaba la na ki tuwe a ya, batsah gà ŋa? » Elize a gwaɗar aaka: « Aɗaba i sər mesewere are ana ki ta vile a a gà Isərayel a: ki ta weneye gà huɗ kwite tar ana malawarayaŋa nda zlagam a, ki ta betse a gà ɓəza gà gawla nda masalama, ki ta betse a gà ɓəza ndirkiz, ki ta teyera gà ɓəza i huɗ gà məkəs tar a. 13 Hazayel a gwaɗar: « Iye mala meslire yak ka, kəra taf a masakəŋa ana i sle a aà mege a gà bàba gà dukw ata ya? » Elize a gwaɗar aaka: « BATSAH kwa ŋa aka petiŋ dər, ki ti ne a Əbay gà Siriya . » 14 Hazayel a da aà Elize ya, a mbəɗ gər a təv batsah ŋgar ŋa Ben-Hadad, a gwaɗar: « Dukula na Elize a gwaɗak a? » A gwaɗar aaka: ‹ A gwaɗìŋ ka ki mbiliŋa ›! » 15 Ndidwe ŋana ka, Hazayel a zla petek mehinne a tike a yam, a hə̀ndə̀kar dər aka are à Əbay, a mət aɗəm, Hazayel a ne Əbay, a zla təv mendze mekwere ŋgar.

16 I huɗ mive mì əzləm ŋana ya, Yehuram kəla Ahav Əbay gà Isərayel a ge a ika mekwere ya ka, Yehuram kəla Yehusafat a ne Əbay gà Yahuda. 17 Akahər ana a ne Əbay ya ka, ŋgat mive dzik makər gər ŋgar sula (32). A kwara i Yeruzalem, mive tsamakər. 18 A zàzàm ka, mede gà Əbay gà Isərayel, kamala gà mburma ana i ga i bəra Ahav a, aɗaba məkəs ŋgar ka, dəm Ahav. A gewa ka, dukw ana a da a gər a BATSAH kwa ŋa tsiye. 19 Ama BATSAH kwa ŋa a waya medzeye a a mekwere gà Yahuda tsa, agəra mala meslire ŋgar Dawda. Aɗaba aka mbər megweɗe a Dawda nda gà gà ɓəza ŋgar ka, ka, mekwere a de a i ahər kurum a tsa, aà biybiy. 20 Akahər ana Yehuram ika kwere a ya ka, gà Edumiya ta tsalaba a segeme a gər aka mekwere gà Yahuda, ti tike aba Əbay tar. 21 Yehuram a da a Tsayir nda gà muta piris guvəl ŋgar fit, a hitse a mbulum ndaavəɗ, a dùŋ gà Edumiya ana tə lawar a ya, nda gà ɓəzla aka miɗ gà muta piris tar fit. Ama gà sliwdze gà Yahuda tə taz aà tar a ma ya. 22 Daga a gər taŋa ya na, gà Edumiya tə ŋgat meziwe gà gər tar haa mbakum ihər gà Yahuda ya. Akahər ŋa ata ka, huɗ kwite Livna a tsalaba aà segeme a gər aka gər gà Yahuda mbaŋa. 23 Gà dukw ana Yehuram a ge ya fit nda gà asiŋ gà megemir ŋgar ana, wànà mewetse ŋa riŋ i wakita labara gà Əbay gà Yahuda ibam a. 24 Yehuram a mət, ti le ŋgat a liwiŋ gà tsir ŋgar i kwite Dawda. Ahaziya kəla ŋgar a ndza aka təv mendze mekwere ŋgar.

25 I huɗ mive makurwa gər ŋgar sula (12) ŋana Yehuram kəla Ahav Əbay gà Isərayel a a ge a ika mekwere ya ka, Ahaziya kəla Yehuram a ne Əbay gà Yahuda. 26 Ahaziya ŋgat ka, mive dzik səla gər ŋgar sula (22) na a ne Əbay ya. A kwara mive ilik i Yeruzalem, zləm mama ŋgar Atali, dəm Umri Əbay gà Isərayel. 27 A zazam ka, vatwa gà mburma Ahav, a gewa ka, dukw ana a da a gər a BATSAH kwa ŋa tsiye, kamala gà mburma Ahav a. Aɗaba ana a zla dəm tar a. 28 Gà Yehuram kəla Ahav nda Ahaziya tə da aà mege guvəl aà Hazayel Əbay gà Siriya a kwite Ramut ana ika ahəɗ Galaad a. Gà Siriya ta ge mbəlak a Əbay Yehuram. 29 Əbay Yehuram a mbəɗ gər a Yizereyel à madana mbəlak ŋgar ata ta ger i Ramut ika miɗ guvəl ana ta ge aà Hazayel Əbay gà Siriya ya. Ahaziya kəla Yehuram Əbay gà Yahuda a da a Yizereyel à məpəra aka Yehuram kəla Ahav. Aɗaba ŋgat, ŋgwal ŋa tsa.