2 Əbay 9

Yehu a ne Əbay gà Isərayel

1 A pat duwa ka, mala məmà à bazlam Mbulum, Elize a zal a mburma ilik i liwiŋ gà ɓəzla sik gà ɓəzla məma à guma Mbulum a, a gwaɗar: « Hadzal ba yak, zla dis mal aaha, ka da dər a Ramut ana ika ahəɗ Galaad a. 2 Kàa ndzeha a fata ka, ki le a à Yehu kəla Yehusafat, kəla Nimsi. Kà zalar a i liwiŋ gà damər ŋgar a, kà da à ŋgat a meɗikwir ana i magər ga ya. 3 Ki zle a dis mal, ki mbiɗere a a gər, dite ki gweɗiŋ a: « Araha na dukw ana BATSAH kwa ŋa a gwa ya, i bah a aà kər mal aaha ka, i ne à kər Əbay gà Isərayel! Ki hindike a i ga ya, ka val aba tsara . » 4 Mala məma à guma Mbulum gawla ŋa ata, a da a Ramut ana ika ahəɗ Galaad a. 5 I təv ana a ndzeha ya ka, gà ɓəzla aka miɗ gà sliwdze gà Isərayel tàa yaha ba gər, a gwa: « Batsah gà ŋa, bazlam gà riŋ i tsikikiŋa . » Yehu a gwaɗar: « A weke ilik, ika magər mə̀r aaha fit a ? » A gwaɗar aaka: « A kər batsah gà ŋa . » 6 Yehu a hitse tə da a ga, dite mala məmà à bazlam Mbulum ata gawla ŋa ya, a mbəɗar mal a gər, a gwaɗar: « Araha na BATSAH kwa ŋa Mbulum gà Isərayel a gwa ya, mal aaha i bah a aà kər a ka, i ne a à kər Əbay aka gər mayahaba gər gà mburma gà, gà Isərayel. 7 Ki ta betse a gà mburma ana i bəra Ahav batsah yak ŋa ya, i pil a məmbəz gà ɓəzla meslire gà, gà ɓəzla məma à guma Mbulum nda biy gà asiŋ gà ɓəzla meslire gà ana, məkəs ŋgar Zezabel a bats a. 8 Gà mburma ana i gwala Ahav a fit a ka, ti dzeyiŋa. I ta dzeye a aà gà asləka gà mburma ana i ga i ma ŋgar a, gà ɓele nda gà mburma ana ti ziwe a gər tar i Isərayel a. 9 I ti ne a à huɗ ga Ahav ka, kamala biy Yerubuwam kəla Nevat a, kamala huɗ ga Basa kəla Ahiya. 10 Zezabel ka, gà kəra ta pepiɗe a ŋgat i dala gà Yizereyel. Wura a ti le a tsa . » I təv ana a fafəl aba ya ka, a həndə̀k i ga ya, a val aba.

11 I təv ana Yehu a dara i ga ya, a təv gà ɓəzla meslire batsah ŋgar ŋa ya ka, ta gwaɗar: « Kurum a riŋ zayzay beye? Agərla na mala məvuwa gər aaka a daha a təv yak a? . » Yehu a gwaɗa a tar aaka: « Kurum ŋa, ka sərum wele ŋa nda bazlam ŋgar ana a tsikewa ya . » 12 Gà mburma ata ta gwaɗar aaka: « Parsa ɗama a mə̀r dukw ana a ge ba ya . » Yehu a gwaɗa tar aaka: « Araha na gà dukw ana a tsikiŋ a. BATSAH kwa ŋa a gwa ka, i bah aà kər mal aà ki ne a à iye a Əbay gà Isərayel. 13 Tsəmma tsara ka, gà ɓəzla aka miɗ gà sliwdze, tə ndzək ikaba gà petek tar a, tə dza a bəɗ a Yehu, aka təv metsile ana a ɓil a aaka ya. Ta vat gà mezleliŋ ta gwa: « Yehu aka ne Əbay . »

Yehu a kəɗ Yehuram Əbay gà Isərayel

14 kərga naha ya, na Yehu kəla Yehusafat, kəla Nimsi a ge wirwir aka gər Yehuram, akahər ana gà Yehuram nda gà Isərayel tserdze, ta kaslawa kwite Ramut ana ika ahəɗ Galaad a, aà Hazayel Əbay gà Siriya ya. 15 Ama akahər ata ka, Əbay Yehuram aka mbəɗ gər à madana mbəlak a Yizereyel ana gà Siriya ta ger ika miɗ guvəl ana ta ge nda gà Hazayel Əbay gà Siriya ya. Ama Yehu a gwa: « Na kàa dzàlum aà mehitsiŋ a dəba ka, wura ilik ma da a bəra i huɗ kwite ya, ma ta ma à labara aaha, a Yizereyel tsa . » 16 I fata ya ka, Yehu a tsəl aka muta piris ŋgar, a da a Yizereyel, aɗaba Yehuram riŋ mahəna ŋa ika təv mehinne i fata. Ahaziya Əbay gà Yahuda a da a məpəra aaka ŋa.

17 Mala makasla huɗ kwite Yizereyel a riŋ mehitseŋa i ga tar ana ika gər ga ya, a ŋgataha a mayahaba gər gà mburma, a gwa: « Iye riŋ i ŋget a a mayahaba gər gà mburma naha ti deriŋa, » Yehuram a gwa: « Slər mburma nda piris, məval a təv tar, magwaɗa a tar: « Ka dumara ana biy zay ibam a? » 18 Wele ata a tsəl aka piris, a val a təv tar, a gwaɗa a tar: « Araha na dukw ana Əbay a gwa ya, ka dumara ana biy zay ibam a? » Yehu a gwaɗar aaka: Dukula yak nda mendze zay ya? Mbəɗ aba ka zazam iye . » Tsam ka, mala makasla huɗ kwite ata, a gwa: « Mala məma a labara aka ndze a təv tar, ama aka mara a ahəm a dəba ya asa tsa . » 19 Yehuram a slər misle ŋgiɗ nda piris ilik asa, a ndze tsìm a təv tar a gwaɗa a tar: « Araha na dukw ana Əbay a gwa ya: ‹ Wànà kà dumara ana biy zay ibam a? › Yehu a gwaɗar aaka asa: « Dukula yak nda mendze zay ya? » Mbəɗ aba ka zazam iye. 20 Mala makasla huɗ kwite ata a gwa: « Wele ata i slər masula ŋa ya ka, aka ndze a təv tar, ama aka mara ahəm a dəba ya asa tsa. Wura riŋ a digiz a piris ka, kamala madə̀gə̀za piris Yehu kəla Nimsi ya. Aɗaba a digize a ka, kamala mala məvuwa gər a.

21 Tsam ka, Yehuram a gwa: « Dzwìmiŋ lidza aka muta piris gà, ta dzar aaka. Gà Yehuram Əbay gà Isərayel nda Ahaziya Əbay gà Yahuda, tə dara i ga ya tə tsala a muta piris tar, aà maləma akaba nda gà Yehu. Ti le ahər i guvah Nabut gà Yizereyel. 22 I təv ana Yehuram a ŋgata a Yehu tsara ka, a gwaɗar: « Ka dara ana biy zay ibam a Yehu? » Yehu a gwaɗar: « mendze zay Dukula? Na mama yak Yezabel riŋ a ndiɗik gər à mandza gurmits a bəɗ a gà mbulum ana gà ndzer ŋa tsa, nda megeye gà dukw gà mede hiywe ya ya. 23 Yehuram a mbəɗ gər a dəba, a dzəba aà mevele nda mazalawaha aba a Ahaziya: « Ge metsehe Ahaziya! Hana ka, makala à mburma! » 24 I fata ya ka, Yehu a zla likìɗ ŋgar a mbàl dər Yehuram aka magər gà dzadzah sìmir a slala i wusaya pakw. Yehuram a dəɗ aà mbulum a a mət i muta piris ŋgar. 25 Yehu a gwaɗa a Bitkar mala aka miɗ gà sliwdze ŋgar. Zla, ka ti ye ŋgat a guvah Nabut gà Yizereyel. Məmàkara a gər a, dukw ana BATSAH kwa ŋa a tsik ahər, akahər ana mə mandzaŋa i muta piris,nda gà madə̀gə̀za muta piris, ki lekukwe a Əbay Ahav dede ŋgar a, a gwa ka: 26 Iye BATSAH kwa ŋa, aka ndza hinne tsa na, i ŋgat a a məmbəz gà Nabut nda gà ɓəza ŋgar ana, kà bats tar a! I tsike a parakka, i ta meke a aɗəm a à bakal yak kalkal kamala ana ki ge ya i guvah ata mbaŋa. Kinehe ka, zla məməta Yehuram, ka ti ye a guvah ata, kamala ana BATSAH kwa ŋa a gwa ya . »

Yehu a kəɗ Əbay gà Yahuda

27 I təv ana Ahaziya Əbay gà Yahuda, a ŋgatar kataya ka, a val ndaka vatwa ana a da a Bet-Gan a. Yehu a zazam ŋgat a gwa: « Lakayumar mbaŋa! » Tə lakayaraha a muta piris ŋgar aà matsəla a Gur bise nda Yivil-am. Dite a val aba a Megiddu, a da a mət a fata. 28 Gà ɓəzla meslire ŋgar ti tike a muta piris ŋgar tə da dər a Yeruzalem, ti le a liwiŋ gà dive gà tsir ŋgar i kwite Dawda. 29 I huɗ mive makurwa gər ŋgar ilik (11) ŋana Yehuram kəla Ahav a ge a ika mekwere ya ka, Ahaziya aà ne Əbay gà Yahuda.

Məməta Zezabel

30 Yehu a ndze a Yizereyel. I təv ana Zezabel a tsaraka ya ka, a geye gà dukw metsehine aà are, a ləmaɗa à ambəz ŋgar lele. A fərra a bəɗ ndaka biye mendiwek a. 31 Akahər ana Yehu a ndze aka biye hərmaga mada a huɗ kwite ya ka, Zezabel a gwa: « Ka dara ana biy zay ibam a Zimri, kər ana kə kəɗ batsah yak ŋa ya ? » 32 Yehu a zla gər aà mbulum, a fəraha aka biye mendiwek a gwa: « Weke na i dəba gà ya? Weke? Gà ɓəzla megemir ana i bəra Əbay ya sula, makər ta fər ahərra a bəɗ ndaka biye mendiwek a. 33 A gwaɗa a taraha: « Yumara a bəɗ a! » Ti yera a bəɗ a, məmbəz Zezabel a ndzizle aà dùdùŋ ga, nda gà piris, gà piris ta ɓala aaka. 34 I dəba ŋa ya, Yehu a da a ga a bəra Əbay, a zəm dukw mezime a, a sa dukw mese, dite a gwa: « Dumaha dzum zləm məkəs aka Mbulum a vəlar mezelme ya, lwìm ŋgat ka, aɗaba dəm Əbay . » 35 Tə dara a bəra ya, aà mele ŋa ka, ama ti le ka, aà atasl gər ŋa, gà sik nda gà ahər ŋa ɗekɗek pəra. 36 Ta mbəɗara gər a, tə ɗama a Yehu, a gwa: « Tàŋa ka, bazlam ana BATSAH kwa ŋa a tsik nda ahər mala meslire ŋgar Eliya gà Tisibiya ya ‹ Gà kəra ti ta pepiɗe a məməta Yezabel i dala Yizereyel a, 37 dite məməta Zezabel ka, a ne a irɗe i dala i guvah gà Yizereyel, dite wura ma gwa, naha ka, Zezabel asa tsa › . »