2 Əbay 10

Əbay Yehu a bats gà gwala Ahav a

1 Gà ɓəza Ahav riŋ i Samariya dzik təsəla (70). Yehu a wetseye gà wakita, a slər a huɗ kwite Samariya, a gà Əbay gà Yizereyel, gà bàba ŋana, dite a gà na ti ɗife a à metsehe a gà ɓəza ana i ga i bəra Əbay ya. Araha na dukw ana a wetse taraha ya: 2 « Gà ɓəza Əbay riŋ i təv Kurum. Gà muta piris nda gà piris, nda gà dukw ahər a riŋ i təv kurum, kurum mandza ŋa, i huɗ kwite ana, malawaraŋa lele nda zlagam a. I təv ana wakita aaha aka ndzeha a təv kurum a ka, 3 Ki fərum a, i liwiŋ gà ɓəza batsah kurum ŋa ya, wele ana ndzer, metike ba ŋgar ŋgwal ŋa ya. Tikwim ŋgat aka təv mendze mekwere dede ŋgar. Dite kə gayum ika ga batsah kurum ŋa ya. 4 Ta ge magəɗa hinne ta gwaɗa aba ika magər tar: « Araha gà Əbay sula ka, tàa sle aà mehitsera a vatwa tsəna, dite meme na ki slekwe a aà mehitsera a vatwa ya? 5 Wele ana fər a, a ga Əbay, mala makwara ahəɗ kwite ata, gà bàba ŋana, nda gà ɓəzla meɗife a à metsehe a gà ɓəza ana i ga i bəra ya, tə slər mburma a təv Yehu aà ta gwaɗar: « Mər ka, gà ɓəzla meslire yak, mìi ge a dukw ana tserdze ki tsik a a mə̀r a ya. Ama mìi tike a wura a Əbay tsa. Ge dukw ana gəzləŋ yak a waya ya . » 6 Yehu a wetse a taraha masula wakita, a gwaɗa a tar: « Na kurum gà biy gà, dite ki giswim a aà iye ahəm ka, sasum gər ika gà ɓəza batsah kurum ŋa ya fit, dite ka ndzikwimiŋara gà gər ŋa ya, ndidwe kərga naha ya a təv gà a Yizereyel a . » tsaatsa ka, gà ɓəza Əbay ata dzik təsəla ya ka, tar ka, i bəra gà mburma ana ti ɗifewa tar à metsehe ya, i huɗ kwite Samariya ya. 7 I təv ana wakita ata a le a aà tar a ka, ta gasa gà ɓəza Əbay ata dzik təsəla gà asləka ŋa ya, tə sasa ika tar gər a. Tə dzaya gər ŋa ata a gà tàkwasa, tə sləraha a Yehu a Yizereyel. 8 Mala məma labara a daha a tsik a Yehu a gwaɗa: « araha tàa ndzəkara gər gà ɓəza Əbay ya . » Yehu a gwa: « Yahumar gər təv sula, aà guva biye hərmaga mada a huɗ kwite haa ndidwe mekwede! » 9 I mèkwède ŋana Yehu a dara i ga ya ka, a hitse dzeŋ, a gwaɗa a gà mayahaba gər gà mburma tserdze: « Kurum ka, bakal kurum riŋ tsa! Iye na, a tsalaba à segeme a gər, aka gər batsah gà ŋa, Əbay Yehuram i kəɗ a, ama gà naha tserdze ya ana gà weke na ta bats tar a? 10 Sərum dər lele, bazlam BATSAH kwa ŋana a tsik aka gər ga Ahav a ka, ilik a diɗe a a bəɗ tsa. BATSAH kwa ŋa a rah ka, dukw ana a tsik nda ahər mala meslire ŋgar Eliya ya . » 11 I dəba taŋa ya ka, Yehu a bats gà mburma Ahav ana ti zeha i Yizereyel a fit. A bats, gà ɓəzla aka miɗ gà sliwdze, nda gà masla ŋgar, dite nda gà ɓəzla məbatsa duwa a mbulum ŋgar fit, aka mə̀sakar a wura ilik nda mesife tsidze.

12 I dəba ŋa ya, Yehu da a Samariya, a ndze a huɗ kwite gà ɓəzla makəva gà duwa a Bet-Eked, aà vatwa ka, 13 aka le a aà gà damər Ahaziya, Əbay gà Yahuda, a wiz a tar: « Kurum ana gà weke? » Ta gwaɗar aaka: « Mər ka, gà damər Ahaziya, mìi de a a mege wusa, a gà ɓəza Əbay, nda gà ɓəza məmər Əbay . » 14 Yehu a gwa: « Gasum tar nda mesife » Ta gasa tar nda mesife, ti zleye tar ɗa. Tə dza aà tar a sùwah ana i Bet-Eked a, tar dzik faɗ gər ŋgar sula, (42) wura ilik aka be aà tar a tsa.

15 Yehu a da i fata ya, aka le a a Yunadav kəla Rekav ana riŋ a dehe a a təv ŋgar a. Yehu a ger wusa a gwaɗar: « Ndzer yak riŋ nda iye kamala ana iye riŋ nda kər a ibam a? » Yunadav a gwaɗar aaka: « Haya! » Na kataya ka, vəlam ba ahər. Ta vəl aba ahər, Yehu a gəsaha ŋgat a təv ŋgar a muta piris ŋgar, 16 a gwaɗar: « Dara a təv gà ya, kà samata meme na i vəl ba gà a BATSAH kwa ŋa ya. Kərga tàŋa ya, na ta da akaba nda gà ŋgat nda muta piris ŋgar a. 17 I təv ana Yehu a ndzeha a a Samariya ya ka, a bats gà mburma ana ti zeha i gwala Ahav i Samariya ya fit. A dzeye a tar birɗek fit kamala na BATSAH kwa ŋa a tsik a Eliya ya.

Yehu a bats gà na tə zambaɗawa a Baal a

18 Yehu a yaha gər, a gà mayahaba gər gà mburma fit tserdze, a gwaɗa a tar: « Ahav a ge megemir a Baal ka, zaakwa pəra, ama iye Yehu ka, a i gere a megemir ka, a ze a dər biy Ahav kweleŋ fetitte. 19 Kinehe ka, zalwìmiŋara a gà ɓèzla məma guma Baal a fit, nda gà ɓəzla mazambaɗa a Baal, nda gà ɓəzla məbatsar duwa tserdze, wura ilik ma ta mezehe tsa. Aɗaba i ge a batsah magwalum aà məbatsa gà duwa a Baal. Wele ana aka niwara ya ka, ta kiɗiŋa. Yehu a ge wirwir ata kamala taŋa ya ka, aà məbatsa gà ɓəzla meslire Baal fit tserdze. 20 Yehu a gwa: « Yahum aba gər aà megirive a Baal, ti tsikeye a gà mburma fit tserdze. 21 Yehu a slərra ya gà ɓəzla məma a labara a Isərayel. Gà mburma ana ta gewe megemir a Baal a fit tserdze tə daha, wura ilik aka ze i ma tsa. Tə da a ga Baal ata, ɓìz tə rah aɗəm.

22 Yehu a gwaɗa a mala makasla gà petek. « Ndzəkara gà petek a gà ɓəzla mazambaɗa a Baal a fit . » A ndzək a tarəra petek ata ya. 23 I fata ya ka, Yehu nda Yunadab kəla Rekab tə da a ga Baal, Yehu a gwaɗa a gà ɓəzla meslire Baal: Pərum ikaba ya, na wura riŋ ika magər kurum i faha mala meslire BATSAH kwa ŋa tsa, say gà ɓəzla meslire Baal ɗekɗek a . »

24 Gà Yehu nda Yunadab tə daha a ga, aà məvəla dukw matawala fəla nda dukw ana tə dulawaha a mbulum fit kweleŋ a. Tsaatsa ka, Yehu aka mbər medzeye ɗa gà sliwdze dzik tsamakər aà dəbalaga a gwaɗa a tar: « Na wura ilik ika magər gà mburma aaha, i dza a kurum tar ahər a, wura aka be dər ilik ka, i kiɗe a aɗəm a ŋgat, avukw wele ata. 25 I dəba ana tə ndəv aàba à məvəla dukw matawala fəla ana tə dulawaha a mbulum fit kweleŋ a ka, Yehu a gwaɗa a gà sliwdze, nda gà ɓəzla aka miɗ tar fit tserdze: « Dumaha a ga, batsum tar fit tserdze, wura ilik mibe tsidze . » Ta bats tar nda masalama. Tə dzaya aà gà məməta ŋa diriŋ aà huɗ kwite ya. I fata ya ka, gà sliwdze nda gà ɓəzla aka miɗ tar, ta mbəɗ gər a huɗ kwite ana ga Baal iɗəm a. 26 Ta ndzəkara i ga Baal a, gà mendzikiɗe ba gà dukw mewisle ana ta ge nda dizl a, ta wànà. 27 I dəba ŋa ya, ta bats kur ana ta hitse dər agər a Baal a, ta mbazla à ga Baal ata ti ne dər təv halaga haa mbakum.

28 Kamala taŋa ya, na Yehu a dzeye iɗəm Baal i kwite Isərayel a. 29 Akaba nda taŋa dze ka, Yehu a ndiɗik gər aà mege bakal ana Yerubuwam kəla Nevat a ge, a bana aɗəm gà Isərayel a, nda mazləba a gà sla ana ta vaɗa nda gura i Betel nda Dan a.

30 BATSAH kwa ŋa a gwaɗa a Yehu: Kàa ge dukw ana ŋgwal ŋa a diŋ a gər i təv are gà ya, ki ge aà huɗ ga Ahav, kamala ana i waya ya. Aɗaba taŋa na gà ɓəza ya ka, wa ahər kəla wa ahər kəla medzige faɗ, ti ta ndze a ɗa ika mekwere gà Isərayel a. 31 Nda tàŋa fit ka, Yehu aka ge metsehe aà mazazama məpala ahəm BATSAH kwa ŋa Mbulum gà Isərayel nda gəzləŋ ngar ilik tsa. Aka məsak aà bakal ana Yerubuwam a ge a bana dər aɗəm gà Isərayel a tsa.

32 Akahər ŋa ata na, BATSAH kwa ŋa a dzəba aà menìkìɗe ahəɗ mekwere gà Isərayel a. A vəl vatwa a Hazayel Əbay gà Siriya, a ndzək gà ahəɗ Isərayel ana ika kwiye ya fit, a dəgəz iɗəm tar a. 33 A ndzək ka, daga ika dulwa Yurdan a, nda ka tseke pat ana a mbəzawara ya, ahəɗ Galaad nda Basan, ahəɗ gà gwala Gad, nda gà gwala Ruben, nda gà gwala Manasse, daga i Aruwer, ika gər dulwa Arnun a.

34 Gà asiŋ gà megemir Yehu nda gà dukw ana a geye a fit, nda ndzəɗa ŋgar a, ana wànà tàa wetse a huɗ wakita labara gà Əbay gà Isərayel i bam a? 35 Yehu a mət ti le ŋgat a liwiŋ gà dive gà tsir ŋgar i Samariya. Kəla ŋgar Yuhakas a zla təv mendze ŋgar. 36 Yehu a kwara gà Isərayel i Samariya ka, mive dzik səla gər ŋgar tsamakər.