2 Əbay 11

Ataliya a zla Əbay aà gà Yahuda ya

1 I təv ana Ataliya məmər Ahaziya, a tsaraka kəla ŋgar aka mət a ka, a dzəba aà məbatsa gà gwala Əbay fit tserdze. 2 Ama Yehuseba dəm Əbay Yehuram damər Ahaziya, a zla Yuwas kəla Ahaziya nda akəl, i liwiŋ gà ɓəza Əbay ana ta betse a tar a, a dza tar nda məkəs ana a vəlawar awah a, a ga mehinne ana a batsah ga Mbulum a, Ataliya a ŋgetere a tsiye, aɗaba taŋa tàa kəɗ ŋgat tsa. 3 Tə ndza i makaha ba nda məkəs ana a vəlawar awah a, mive ndilik i ga BATSAH kwa ŋa. Akahər ŋa ata ka, Ataliya na a kwere a gà Yahuda ya.

Ti tike Yuwas a Əbay

4 I huɗ mive matəsəla ŋana ya ka, batsah mala məbatsa duwa a Mbulum Yehuyada a ndzəkara gà ɓəzla aka miɗ gà sliwdze ika ahəɗ ŋgiɗ a, nda gà asiŋ gà sliwdze ana ta kaslawa ga Əbay nda batsah ga mbulum a. A da a tar a ga BATSAH kwa ŋa. A gəs aà tar masla, a vəl a tar mimbeɗe i ga BATSAH kwa ŋa, a ɗif a à tar aà kəla Əbay ata a kaha ya. 5 I fata ya ka, Yehuyada a vəl a tar məpala ahəm, a gwaɗa a tar: « Araha na dukw ana ki gwim a ya: '' Ndzəkum ba ikaba ya təv pampam makər, gà malahalah ŋana ta ge a megemir a pat Sabba ya ka, ta kesle a ga Əbay. 6 Gà masula ŋana ta kesle a biye hərmaga mada a Sur. Gà məmakər ŋana ta kesle a biye hərmaga ga, gà ɓəzla makasla Əbay ndaka dəba ga ya. Kamala taŋa ya, na gà sliwdze ata pampam makər ta kesle a ga Əbay ata aka mimbe aka mimbe ya. 7 Gà mayahaba gər gà sliwdze ana sula ta ge megemir a pat Sabba tsiye ka, ta kesle a ga BATSAH kwa ŋana ta kah aɗəm kəla Əbay ata ya. 8 Ki lewerwim a a Əbay tits nda gà dukw ahər kurum i ahər. Na wura a sirikehe a a kurum a ka, ki kiɗwim a ŋgat. Ndzum i təv Əbay, hiywe ku mege a de a a ŋga ya.

9 Gà ɓəzla aka miɗ gà sliwdze ata, ta ge kamala ana Yehuyada mala məbatsa duwa a Mbulum a gwaɗa a tar gwim a. Ku mege weke a ndzək gà mburma ŋgar ti dze a ba aà megemir a pat Sabba ya, nda gà sliwdze ana ti ndìve a a megemir a pat ŋa ata ya ka, ti de a a təv batsah mala məbatsa duwa a Mbulum Yehuyada. 10 Mala məbatsa duwa a Mbulum ata a dza gà suwal nda gà slakwa Dawda ana i ga BATSAH kwa ŋa ya, a gà ɓəzla aka miɗ gà sliwdze. 11 Gà sliwdze tə ndər ba, gəs ika tseke ahər mezime ya, tsikw aka tseke ahər gula, təv məvəla aaka duwa a Mbulum. Ku mege weke nda gà dukw ahər ŋgar i ahər, tə lawara Əbay. 12 I fata ya ka, Yehuyada a zlaha Yuwas, kəla Əbay ata, ti ndiwìɗer gər nda baramusa, ta vəlar wakita ana ta wetse aɗəm dukw ana Əbay a ge a fit tserdze ya, a dzar mal a gər a ne dər Əbay, ti ne dər Əbay, tə tatakwar à ahər ta gwa: « Əbay mandza aà bəra . »

13 I təv ana Ataliya a tsaraka Mewideye gà sliwdze, nda gà mayahaba gər gà mburma ya ka, a daha a təv mayahaba gər gà mburma a ga BATSAH kwa ŋa. 14 Ataliya a fər ikaba ya ka, Əbay riŋ mehitse ŋa bise nda mendweŋe batsah ga Mbulum, kamala ana məpala ahəm a tsik a, gà ɓəzla aka miɗ gà sliwdze, nda gà ɓəzla məvata mezleliŋ tar bise i təv Əbay. Gà mayahaba gər gà mburma ana ika ahəɗ kwite ata ya tserdze ya, tar i maŋgayaba. Gà ɓəzla məvata mezleliŋ a riŋ ta vete a mezleliŋ. Ataliya a kwayaɗa ikaba aà gà petek a, a wideye a gwa: « Tàa dzawa à kwa, tàa dzawa à kwa . »

15 Yehuyada mala məbatsa duwa a Mbulum a vəl məpala ahəm a gà ɓəzla aka miɗ gà sliwdze, a gwaɗa a tar: Gə̀sumara Ataliya i liwiŋ gà mburma ya, wele ana a waya a zezeme a ŋgat a ka, kəɗum ŋgat nda masalama, aɗaba taŋa mala məbatsa duwa a Mbulum a gwa ka: Ka ta kəɗum ŋgat i ga BATSAH kwa ŋa tsa. 16 Gà sliwdze ta gəsara iɗəm ŋgat a, ti de a dər a bəra Əbay ta ndze dər aka biye hərmaga gà piris ka, ta kəɗ ŋgat a fata.

17 Yehuyada a dan magəsa masla, aka magər gà BATSAH kwa ŋa, nda Əbay, nda gà mayahaba gər gà mburma, na dite gà mayahaba gər gà mburma ti ne gà biy BATSAH kwa ŋa ya. A dan magəsa masla aka magər gà Əbay nda gà mayahaba gər gà mburma asa. 18 Gà mayahaba gər gà mburma ana ika ahəɗ ata ya tserdze, tə da a ga Baal, ta mbazla dər fit, ta bats gà təv məvəla aaka duwa mbulum nda gà mendzikiɗe ba gà fəla ana a ta vaɗaya ya. Ta kəɗ Matan mala məbatsa duwa a Baal ika miɗ təv madula aaka duwa a mbulum ata. Yehuyada mala məbatsa duwa a mbulum a dza gà mburma aà makasla ga BATSAH kwa ŋa. 19 Yehuyada a yaha gər a gà ɓəzla aka miɗ gà sliwdze ana a ndzəkara ika ahəɗ ŋgiɗ a, nda gà ɓəzla aka miɗ gà sliwdze ana ta kesle a ga Əbay ya, dite nda gà mayahaba gər gà mburma ana ika ahəɗ kwite ata ya, fit tserdze. Tə lakara Yuwas a i ga BATSAH kwa ŋa ya, a bəra Əbay ya, tə da dər ndaka biye hərmaga gà sliwdze ana ta kaslawa ga Əbay ya. I fata ya ka, Yuwas a ndza aka təv mendze Əbay. 20 Gà mayahaba gər gà mburma ana i kwite ata ya, ta ŋgayaba fit tserdze, huɗ kwite ata, i mendze zay. Ataliya ka, tàa kəɗ i ga i bəra Əbay nda masalama.