2 Əbay 12

Yuwas a ne Əbay gà Yahuda

1 Yuwas a ne Əbay ka, ŋgat mive təsəla. 2 I huɗ mive matəsəla ŋana, Yehu a ge ika mekwere ya ka, Yuwas a ne Əbay. A kwara mive dzik faɗ i Yeruzalem. Zləm mama ŋgar ka, Tsibiya dəm gà Ber-Seba. 3 Yuwas a gewe a ka, dukw ana ŋgwal ŋa ya, na i təv are BATSAH kwa ŋa ya, na i huɗ mandza bəra ŋgar a fit a. Aɗaba mala məbatsa duwa a Mbulum Yehuyada aka ɗifer à metsehe lele. 4 Ama kəla ka, gà təv mewisle ka, tàa bats tsa. Gà mayahaba gər gà mburma tə dawa aà məbatsa aaka gà duwa nda madula aaka gà dukw ana a ze hwaŋŋa lele ya a fata hiywe.

5 Yuwas a gwaɗa a gà ɓəzla məbatsa duwa a Mbulum: « Gà siŋgwe ana fit tə dawa dərra, aà mege megemir a ga BATSAH kwa ŋa ya, Siŋgwe hadam ana ku weke a pil a, kəla a ndzəɗa ŋgar a, siŋgwe ana ku weke a vile a nda meziwe gà gər ŋgar a BATSAH kwa ŋa ya ka, 6 gà ɓəzla məbatsa duwa a Mbulum, tə ndzaka gà siŋgwe ata, aà gà mburma tar a. Aà malambaɗa dər gà təv mendezle ana aà gà ga ata, tàa le ahər a.

7 Ama ka, i huɗ mive dzik səla gər ŋgar makər ŋana Yuwas a ge a ika mekwere ya ka, gà ɓəzla məbatsa duwa a Mbulum tàa lambaɗa gà təv mendezle ata aà ga BATSAH kwa ŋa ata ya tsa hiywe. 8 I fata ya ka, Əbay Yuwas a zal a gà Yehuyada mala məbatsa duwa a Mbulum nda gà asiŋ gà ɓəzla məbatsa duwa a Mbulum ŋgiɗ a gwaɗa a tar: « Aɗaba la na kàa lambaɗum gà təv mendezle ata aà ga BATSAH kwa ŋa ya tsiye? Kinehe ka, diydiy ki ndzìkwim a, siŋgwe aà gà ma kurum a asa tsa. Ama ka, miyakum dər aà malambaɗa ga BATSAH kwa ŋa. 9 Gà ɓəzla məbatsa duwa a Mbulum tàa gəs mandzə̀ka siŋgwe aà gà mburma ya, nda malambaɗa ga BATSAH kwa ŋa ya asa tsa.

10 Yehuyada mala məbatsa duwa a Mbulum a zla sahər a təm ahər biye a dukw mahəndəka der aaka ŋa, a tike aà guva təv madula aaka duwa a Mbulum, ndaka tseke ahər mezime mada a ga BATSAH kwa ŋa. Gà ɓəzla məbatsa duwa a Mbulum ana ta kaslawa biye hərmaga ya, tə dzawa gà siŋgwe ana tə ndzəkawaha a ga BATSAH kwa ŋa ya a fata. 11 I təv ana tə samata ka, siŋgwe aka rah a sahər ata ya ka, gà mala mewetse dukw ana i bəra Əbay ya, nda batsah mala məbatsa duwa a Mbulum, tə dawaha, ti ndzəkawa siŋgwe ata, i ga BATSAH kwa ŋa ti ɗemiŋa. 12-13 I təv ana tàa ɗama siŋgwe ata ya ka, tə dzawa siŋgwe ŋa, ahər a gà ɓəzla miɗ megemir ga ata. Gà mburma ata ta pəlawa dər gà ɓəzla malaka ga, nda gà ɓəzla mazlazla ga, nda gà ɓəzla məpapaza kur, tə sakamawa dər gà sla aram, nda məpapaza gà kur, nda gà asiŋ gà dukw ana ta ge a dər megemir malambaɗa ga ata ya, fit tserdze. 14 Ama ga dukw taf gà siŋgwe ana tə dawa dərra a ga BATSAH kwa ŋa ya ka, tàa ge dər megemir məvàɗà ya dər gà ɓəza tugwàɗ ana nda ndzemde ya, nda gà dukw membete dər aà akwa i lalampa ya, gà səra magwatsaka à məmbəz, gà mezleliŋ, nda gà asiŋ gà kazlaŋa megemir ŋgiɗ ana nda gura, nda ndzemde məvə̀ɗa kur siŋgwe ya tsa. 15 Ama tə dzawa gà siŋgwe ata fit ka, a gà ɓəzla aka miɗ megemir, aà malambaɗa ga BATSAH kwa ŋa. 16 Ama wura a wizewa siŋgwe ata ana ndaw aà gà ɓəzla aka miɗ megemir ata, ta pəlawa dər gà ɓəzla megemir a tsa. Ama ta gewe a dər megemir ka, ndaka vatwa ŋa lele. 17 Gà siŋgwe ana gà mburma tə dza aà məpəla gər dukw bakal tar a, nda siŋgwe ana tə dzawa aà məpəla à bakal a. Gà siŋgwe ata ka, tə dzawa a sahər ana i ga BATSAH kwa ŋa ya tsa, taŋa ka, biy gà ɓəzla məbatsa duwa a Mbulum.

Ta kəɗ Əbay Yuwas

18 Akahər ŋa ata ka, Hazayel Əbay gà Siriya a da à mege guvəl aà huɗ kwite Gat, a zla huɗ kwite ata, I dəba ŋa ya, a dzala a mege guvəl aà huɗ kwite Yeruzalem asa. 19 Yuwas Əbay gà Yahuda a ndzək gà ŋgwal gà dukw ana, gà bàba gà tsir ŋgar gà Yehusafat, Yehuram, nda Ahaziya, gà Əbay gà Yahuda, ti ne dər tsəɗaŋŋa pam biy BATSAH kwa ŋa ya, nda gà dukw maslawa ana ŋgat ŋa a ne dər tsəɗaŋŋa ya, gà gura ana fit riŋ i ga makasla gà limana BATSAH kwa ŋa ya, nda gà na i ga Əbay ya. A sləraha gà dukw ata fit a Hazayel Əbay gà Siriya. I dəba ŋa ya, a mà aà vatwa mada mege guvəl à Yeruzalem a. 20 Gà asiŋ gà megemir Yuwas nda gà dukw ana a ge tserdze ya ana riŋ mewetse ŋa « i wakita labara gà Əbay gà Yahuda ibam a . » 21-22 Gà ɓəzla aka miɗ gà sliwdze ŋgar sula, gà Yuzabad kəla Simeyat, nda Yehuzabad kəla Sumer, ta ma akaba ahəm aà Yuwas, ta kəɗ ŋgat, i Bet-Milu ika vatwa ana a da a Sila ya. Ti le a liwiŋ gà dive gà bàba gà tsir ŋgar i kwite Dawda. Kəla ŋgar Amatsiya a zla təv mendze mekwere ŋgar.