2 Əbay 13

Yuwakaz a ne Əbay gà Isərayel

1 I huɗ mive madzik səla gər ŋgar makər ŋana Yuwas kəla Ahaziya a ge ika mekwere ya ka, Yuwakaz kəla Yehu a ne Əbay gà Isərayel i Samariya. A kwara mive kurwa gər təsəla. 2 A gewa ka, dukw ana ŋgwal ŋa tsiye na i təv are BATSAH kwa ŋa ya, a zazam mege bakal dede ŋgar Yerubuwam kəla Nevat ana a bana dər aɗəm gà Isərayel a bakal a. Yuwas aka məsak dər tsa. 3 I fata ya ka, BATSAH kwa ŋa a dzəba aà mege matsəɓatsəɓ aka gà Isərayel, a dza tar ahər gà Hazayel Əbay gà Siriya nda kəla ŋgar Ben-Hadad. 4 Ama Yuwakaz a hama a BATSAH kwa ŋa dite BATSAH kwa ŋa a tsaraka gəs meheme ŋgar ata, aɗaba aka ŋgata a mesewere are gà Isərayel ana, Əbay gà Siriya a sle ter a za ya. 5 I fata ya ka, BATSAH kwa ŋa a slərra mala mibeye à gà Isərayel i ahər gà Siriya ya. Daga a gər taŋa ya, na gà Isərayel ta ŋgat mendze zay, tə ndzawa i mekiriwe ga petek tar kamala ana piŋŋe ya. 6 Ama akaba nda taŋa tekeɗe ka, tàa miyak à mazàzàma medzibe mege bakal gà Yerubuwam ana nda gà mburma ŋgar, ta bana aɗəm gà Isərayel a tsa, ta gewa hiywe. Ama məpàpə̀zà dizl Asera mbulum məkəs ŋana riŋ mandwàŋa ŋa hiywe i Samariya. 7 I gà sliwdze Əbay ya, fit ka, a zeha a Yuwakaz ka, gà ɓəzla matsala a muta piris dzik əzləm, gà muta piris kurwa. Gà sliwdze ana tar nda sik a, dəbuw kurwa. Aɗaba gà asiŋ a ka, Əbay gà Siriya aka dzeye a à tar fit. A ne a tar kamala bitekwe ana ta ɓalawa aaka ya.

8 Gà asiŋ gà megemir Yuwakaz, ana a geye ya ana riŋ mewetse ŋa i wakita labara gà Əbay gà Isərayel ibam a? 9 I təv ana Yuwakaz a mət a ka, ti le ŋgat a liwiŋ gà dive gà bàba gà tsir ŋgar i kwite Samariya, Kəla ŋgar Yuwas a zla təv mendze mekwere ŋgar.

Yuwas kəla Yuwakaz a ne Əbay gà Isərayel

10 I huɗ mive ma dzik makər gər ŋgar təsəla ŋana Yuwas Əbay gà Yahuda a ge a ika mekwere ya ka, Yuwas kəla Yuwakaz a ne Əbay gà Isərayel i Samariya. A kwara, mive kurwa gər ŋgar ndilik. 11 A gewa ka, dukw ana ŋgwal ŋa tsiye na i təv are BATSAH kwa ŋa ya. Aka miyak à mege bakal Yerubuwam kəla Nevat ana a bana aɗəm gà Isərayel a tsa. A gewa hiywe.

12 Gà asiŋ gà megemir i Yuwas, nda gà dukw ana a gewa ya, nda gà ndzəɗa ŋgar, ana a ge dər guvəl aà Amatsiya Əbay gà Yahuda ya. Gà dukw ata tserdze ya ana riŋ mewetse ŋa i wakita labara gà Əbay gà Isərayel ibam a? 13 I təv ana Yuwas a mət a ka, ti le ŋgat a liwiŋ gà dive gà Əbay gà Isərayel i Samariya, i fata ya ka, Yerubuwam a ndza aka təv mendze mekwere ŋgar.

Elize a mət

14 Akahər ana dukw məməta, a gəs Elize, a mite a dər a ka, Yuwas Əbay gà Isərayel, a da a təv ŋgar, a kirik aaka a bəɗ a tuwa a gwa: « Dede gà, dede gà, kər ka, ka za gà muta piris nda gà ɓəzla matsəla aaka ŋana i Isərayel a fit tserdze . » 15 Elize a gwaɗar: « Ndzək gà lìkiɗ nda gà sìmir! » Yuwas a ndzək gà lìkiɗ nda gà sìmir. 16-17 Elize a gwaɗa a Yuwas Əbay gà Isərayel: « Ŋgəl à lìkiɗ yak! » A ŋgəl dər. Elize a dza gà ahər ŋgar aka gər ahər Əbay, a gwaɗar: « Həndə̀k i biye mendiwek ana ndaka tseke are pat ana a mbizere ya! . » Yuwas a həndə̀k iɗəm a, Elize a gwaɗar asa: « Mbàl! » A mbàl, Elize a gwaɗar: « Naha ka, sìmir məmba aà gà ɓəzla guvəl ana i təv BATSAH kwa ŋa ya, sìmir ana ki mbe a à gà Siriya ya. Ki betse a gà Siriya i Afek, ki dzeye a teriŋa kweleŋ . » 18 Elize a gwaɗar asa: « Ndzək gà sìmir ŋgiɗ » I təv ana a ndzək a ka, a gwaɗa a Əbay gà Isərayel, mbàl dər ahəɗ, a mbàlaya dər ahəɗ sik makər dite a miyak dər. 19 Mburma Mbulum a ge matsəɓatsəɓ aka gər Əbay, a gwaɗar: « Ka mbàlaya ahəɗ ndeɗiŋa, sik əzləm kige tsa ndilik ka, ana ka, ki betse a gà Siriya, ki dzeye a a teriŋa kweleŋ. Ama kinehe ki betse a gà Siriya ka, sik makər pəra . »

20 Elize a mət, ti le ŋgat. Tsaatsa kəla viye ka, gà ɓəzla makəzala mburma tə dawa i Muwabiya a, aka ahəɗ gà Isərayel hiywe. 21 A pat duwa ka, gà mburma a riŋ ika dive, i fata ya tsara ka, ilik ŋa aà gà ɓəzla makazala mburma ata ya, pəzlaŋ aka daha. Ti ye məməta ata a dive Elize, tə təz aba tsara. I fata ya ka, məməta ata a ləm aà atasl Elize ka, mesife ŋgar a mara aba, a hitse a mbulum.

22 Hazayel Əbay gà Siriya a slewe za a gà Isərayel hinne na i huɗ mandza a bəra Əbay Yuwakaz a. 23 Ama gà Isərayel ti ndze are tsehe a BATSAH kwa ŋa hinne. A pat a tar ŋgwal ŋgar a mbəɗ aba a təv tar aɗaba masla tar ana ta gəs a nda Abəraham Izak dite nda Zakup a, a waya na a dzeye a a ter a ya, tə dùŋ tar diriŋ i təv are ŋgar a tsa. 24 Hazayel Əbay gà Siriya a mət, i dəba ŋa ya Ben-Hadad kəla ŋgar a ndza aka təv mendze mekwere ŋgar.

25 I fata ya ka, Yuwas kəla Yuwakaz a maya à gà huɗ kwite ihər Ben-Hadad kəla Hazayel a, Hazayel a ndzək nda guvəl ihər Yuwakaz dede Yuwas a. Yuwas a bats gà Ben-Hadad sik makər, dite a maya à gà kwite gà Isərayel.